میرزا ئۆلقاڎر، چی شېعرە توولانیېنە شین مەگېرۊن پەی شېخ محەمەد عەزیز نەجارەی، کە دیارەن شېخێ نامڎاری زانای خاوەن سەڵتەنەت بییەن، ئاڎ گرد و زانست و عیرفان و دەسەڵاتش جیائاستەن، کۊچشکەردەن پەی هەواری خاڵی.
یا حوکم ئەقدەس
یا حوکمی ئەقدەس بۍ‌هەمتای فەردەن
لاڵ بام شای ئازیز وەفاتش کەردەن
ئاخ ئاخ پەی ئه و زات هیچکەس نەدارە
داخ پەی ئه و زاتەی سپا و سالارە
ئه و کار نیکوو هیچ کەس نەکەردە
جە ئەولیاهان گشت گره و بەردە
هانا پەی ئه و شېخ بەستامی تەرزە
سەڎای بزورگیش جە عالەم بەرزە
پېم دەرە دەخیل پای خەیاڵ لەنگەن
مەساف بە سات زندەگیم تەنگەن
حەکیم ها جەستەم ئالوودەی دەردەن
لاڵ بام شای ئازیز وەفاتش کەردەن
ئه و کۊچ ساڵان نۊهەوار کەردە
تەشریف هەوارگەی مەزاران بەردە
وە فدای ڕەخت و خاو شادەستوورت بام
وەفدای جای خاڵی بۍ حزوورت بام
وە فدای جەبهە شان ئەسڵ فکرت بام
حەڵقەی دەروېشان کورەی زکرت بام
فدای هەوارگەی تازەی چۊڵت بام
وە فدای تۊی کەفەن لونگ کۊڵت بام
وە فدای سپا و سان کەس نەدارت بام
فدای ئامۊشۊی پاوە شارت بام
دەخیل سوار بە بەکەلیانەوە
به و سوپای عەزیم دەروېشانەوە
گەلە بۍ ‌شوان موڵک بۍ ساحېوە
زەراعەت بۍ ‌ناز ئەشجارت پەشېوە
حەق هەر وە تۊش دان ئیزن و ئیجازە
لایەق هەر بە تۊن ئەملاک تازە
خۊ تۊ مەئزوونی جە لای خوداوە
تەعمیر کەر جە نۊ جامیعەی پاوە
کەش و کۊ و کەمەر سارا و سەرزەمین
پەی فەوت ئازیز ها نە زاری و شین
گرۊی دەروېشان هەرکام پەی وېشان
جە دەرگای فەڵەک یا هوو مەکېشان
تەختەی سەرکانی دایېم جاشانەن
دەوران مەرقەڎ تەکیەگاشانەن
خسووس خاتونی خاتر پەڕخارەن
شیرینی تاعەت ئەشکۆفەی دارەن
ماچۊ ئاخ سەردار سایەدارەکەم
مەعرووف دەوڵەت شا و خونکارەکەم
ئاغەی میهرەبان ئاوات وازەکەم
ئاغەی بوڵەند بەخت جای نیازەکەم
تووتی شەکەرخان شەکەر ڕازەکەم
شاباز شش‌دانگ بۍ نیازەکەم
قیبلەگای یەقین دنیا و دینەکەم
ڕۊشنی ڕووی پاک سەرزەمینەکەم
شای ڕیازەت کېش شەوبېدارەکەم
جە ڕۊی قیامەت مایەدارەکەم
شای ساحیب کەمەند بەهرەمەندەکەم
پیر پاک‌نەزەر حەق پەسەندەکەم
دارای کەماندار بۍ نەزیرەکەم
وەباڵ هیممەت ئەقلیم گیرەکەم
کان مەعریفەت کۊی کەماڵەکەم
شەوچرای گەوهەر دانەی لاڵەکەم
مورشید ئیرشاد سوخەن سەنجەکەم
دەریای مەعریفەت کۊگای گەنجەکەم
گەنجوەر خازن گەنج پاکەکەم
دەفینەی پەنهان سەرای خاکەکەم
خۊ شېخ موحەممەد دەس جە وېش وەردان
چوون ئاهووی تەنیا سەر لېش شېویان
سەرکانیش کەردەن وە زەید و ماوا
ئیمساڵ بېزارەن جە هەواس ئاوا
ماچۊ هامسەران یەک‌یەک بار کەردەن
یەک نە شۊن یەک لوان ۋیەردەن
هەر من وا مەندەم جە دمای یاران
چوون سەنگ سفتەی کۊنە هەواران
با منیچ وەڕای سەرمەزاراندا
هەی بکەم وە شۊن کۊچ یاراندا
نە مەیل هەوای پورت شاهۊشەن
نە عەزم دیڎەن ئەهل پاوەشەن
دایېم نجارش نەقش زەمیرەن
چوونکە جای خاسان خاکش دڵگیرەن
وە تاجت قەسەم شای تەکیەداران
عالەم سەرعیەن وېنەی ساداران
پردەکان یەک یەک گشت دیاریەن
تا ڕۊی قیامەت یادگاریەن
ئاغەی شاعەلی تەڵەبکارتەن
شەوان تا وە ڕۊ ئینتزارتەن
بەڵۍ مەواچۊ یانی چە نەردەن
ئەم ساڵ شای ئازیز گوزەر نەکەردەن
کەس نەواچۊ شېخ وەفاتش کەردەن
تەشریف پەی حزوور پېغەمبەر بەردەن
دادەنی دنیا چەنی وېش بەردەن
ئەڵبەت جە حەق گشت خەریدش کەردەن
ڕەسم بزورگیش وە جا ئاوردەن
خۊ شېخ موحەممەد وە موخلیس کەردەن
یا شېخ چېش واچوون دەسەڵات چېشەن
خەیر و شەڕ هەردوو بە دەست وېشەن
کۍ قیاس ۋزۊ سنعش بشمارۊ
هەی کۊکۊ ڕەحمەت وە قەبرش وارۊ
هەق وېش فەرماوان زائیقەتولمەوت
زیڕوح بەشەر مەبۊ ببۊ فەوت
هەزار و سێسەد چەنی بیست و دوو
وەفاتش کەردەن ئه و شېخ یا هوو
سەڎ هەزار سەڵوات دەوازدە ئیکرام
وە ڕەوزەی ڕەسووڵ عەلەیە سەلام.[1]