واتەو گۊشگېرتەی مېیانو ئاسمانی و زەمینی
بەشۊ هەشتەمۍ
زەمین جە داخیۍ واچە زلەکا ئاسمانینە جۊشیا، پەنەش وات: شانازی بە عەرشو ۋېتۆ کەری، کە تۊ عەرشت هەنو من نیام، ئەی نمەزانی کە فەرمایېشتو حەزرەتیەن کە فەرماوانش: دڵو ئینسانی مٶمینی و ئیمانداری عەرشو ڕەحمانییەن، ئەی تۊ نمەزانی من خاوەنو کۊ عەرەفاتینا، یانەو خوڎای ئینا دلۍ منەنە، شارە پیروزەکەو مەککەی ئینا سەرو منۆ، تەۋەنە سیاۋەکۍ ئینا چېگە، سەرچەمەو زەمزەمی جە ناخو منەنە مزیۊرە، چانەی زیاتەریچ چوار یارۍ نازارۍ پېخامئاوەریم هەنۍ، ئیتر وەسېن دەمدرېژی ئەی ئاسمان.
سەرزەمین جە خەم هەم جۊش ۋەردەوە
قوفڵ قاپی گەنج جواب کەردەوە
وات هەی ئاسمان قیل و قاڵ مەکەر
وېت تەمام خەرەف بېکەماڵ مەکەر
من کۊی عەرەفات سەحرای شامم هەن
کەعبەی (مُعَظّم) قیبلەی عامم هەن
مەنزڵگای مەحشەر عەرەساتم هەن
مەککەی موبارەک جای نەجاتم هەن
سەرچەمەی زەمزەم کافوور بېزم هەن
(حَجَرالاسوَد) عەترئامېزم هەن
خاستەر مەدینەی مونەوۋەرم هەن
هەم حوجرەی حەرەم پەڕ گەوهەرم هەن
هیچکەس بۍ (وضو) نامش نەبەردەن
قیاسش چەنی بەهەشت نەکەردەن
ئیمام ئیسلام سەرزەمینم هەن
چواریار پاک بۍ قەرینم هەن
فەڵەک وە بەرزی تۊ فاخیرەم هەن
عەشەرەی عەزیز موبەشیرەم هەن
فەرمووڎەی حەزرەت خەیلێ عەیانەن
قەلب موئمنان عەرشی ڕەحمانەن
دنیا و مافیها (حورالعَین) م هەن
سەرمایەی شاڎیی دنیا و دینم هەن
ئیمام شافعی قەوڵ یەقینم هەن
(اولیاءالله) هان پاک دینم هەن
ئاسمان وەسەن ماجەرای بازی
هەنی کۊتاکەر زوبان درازی.[1]