ئانەیچە وەفاو پیای
شامراد و توورانەی ژەنیش ماوەو سی ساڵێ بێ، ژەن و شوو بێنێ، شامراد توورانەش فرە وەشە سیێ و جە ژیوایش فرە ڕازی بێ.
ڕۊزگار پاسە چەرخیا، شەوۍوە توورانە دلێ بەرەو یانە هامساکەیشانە گنۆ وەروو پەلامارەو تووتەو ساحێب یانەکەی و دماو چن ڕوێوی زجر و ئێش و ئازار، مرۊ و جە دنیای ملۆ.
مەرگو توورانێ شامرادی تێک مدۆ و زۆق و شۆقش چەنە مسانۆ، هەر پابۊنۆ شامراد تاکو ماوێوی درێژ وېش زیندانی کەرۊ و جە هۆدە گولانەکەو وېش و توورانێنە نمێ بەر.
پی هەرمانېشە زارۆڵەکېش وەنەش عاجزێ با و گنا ویروو ئانەیە چارەسەرێو پەی تاتەیشا بېزاوە.
ماوێوتەرش پۆ مشۊ شامراد هەر ئانە بەزمێش با، تاکو ئاخرش زارۆڵەکېش گرد پانەیە مېیاوا تاکو ژەنېوەش پەی بارا بەشکووم مرکیۆرە و خاسبۊ.
زارۆڵەکېش بە دڵ و گېیان گېڵا دەگایا دۆر و بەریەرە و کناچۍوەی جوانەی زەریفەی پەڕە باوشڵێش پەی مێزاوە و ماراش پەیش.
چن ڕوېش پۆ مشۊ، شامراد گەشبۊوە و پێقەو سمێڵاش مێ. گنۆ ویروو ئانەیە هەمبۊنەو ژەنە تازەکېشۆ و هەمیچ پەی قەدر زانای جە زارۆڵەکاش جەژنېوە گېرۆ.
ملۆ پەنج سەرێ کاوڕێ مسانۆ و زارۆلەکاش جەمێ کەرۊوە و ماچۊ:
ڕۆڵە خوا موانەتیتا دۆ، ئیسە من وەزعەم فرە خاسەنە، شکور پەی خوای پرگم نەمەنەن چەنە، ئانا پەنج سەرێ کاوڕێم ئەسێنێ و گردی کەروو نەزرە.
چی پەنج سەرەیە، دوېشا سەرە بڕدێ و گوشتەکەیشا دەیدێ بە فەقیر و هەژاری.
دانێویچشا بەش کەردێ بەر و هامسایارە.
یۆتەریچشا قاورمېوی عالش چەنە وەش کەردێ و بەشێویچش کەردێ کەباب پەی جەژنەو ئۍ شەویما.
زارۆڵەکېش گرد بە وەشحاڵیۆ مەبارەک بادی دووبارە جە تاتەیشا کەرا و پەرساش چەنە:
ئەی تاتە گېیان کاوڕە پەنجەمینەکەی چېش پەنە کەرمۍ؟
تاتەشا بە دەم و چەمېوی شادۆ جوابشا مدۆوە و ماچۊ:
ڕۆڵە گېیان ئانەیشا خاس خاس قەسابی کەردی و بە گوشت و پېشێوە وزدێش وەروو ئا تووتەیە کە ئەداتا گرتەش.[1]