باسێوی کۊتا سەرو ڕۊمانەو (سیاو ڕێحانەی) ی
بەشۍ: دوەمە
نویستەی: #هەورامان ڕۆستەمی#
جە بەشوو فەزا سازیەنە (setting):
نویسەر چا یاگانە کە باسوو کەش و هەوا و ژیوگاو هۆرامانی کەرۊ، تەمام وانەری بەرۊوە پەی دلێ
هەوارەکاو هۆرامانی و هەست کەرۊ بوەو چنوور و سوورە هەراڵەی و خاڵخاڵوو سەرکەشەکاو هۆرامانی وینۆ، بەڵام بە پېچەوانەوە جە هۊرچنیەو نامۍ کەسایەتیەکانە بە پەیلواو من خاس هەرمانەش نەکەردێنە و بەداخەوە نامەکێ هیچکام هۆرامیانێ نېیەنێ و ئینە وېش تەئسیرش هەن سەرو پەیوەنی وانەری چەنی دلېنە و فەزاو ڕۊمانەکێ. هەرپاسە خاڵێوەتەرە لاوازە چی بەشەنە ئانێنە کە نامۍ دەگا یام شارەکا دیارە نېیەنە، نویسەر بە ئاسۇڎەیی تاوێ، ئەریچ دڵش نەبۍ پوە کە نامۍ ڕاسیەو دەگاکا واچۆ، نامېوەتەرەشا پەی بنیۆ. نەبېیەی نامۍ شار و دەگایەکا کەمېو سەر شێونۆ ئەو وانەری هەرپاسە کە ئېمە تاکو ئاخروو داستانەکێ نەزاناما کە قارەمانوو داستانەکێ هەرمانە و هەرمانش چېشا و ئینا کام ئێدارەنە!
جە بەشوو دیالۆگیەنە (dialogue):
تا ڕادېو خاس هەرمانە کریەینە، بەڵام بڕېو یاگەکانە نویسەر چن دانێ هەڵێش کەردێنێ، نویسەر جە وەڵێنەو ڕۊمانەکێنە نویستەنش کە لەهجەو هەر کەسی بەڼا بە فاڕیای دەگا یام شارەکا فاڕیۆ! جە حاڵێوەنە جگەم لەهجەو نازەنینێ کە ئاڎیچە فرەو یاگەکانە هەر پېسەو ئەویشان هیچ جیاوازیش چەنی ئەو کەسایەتیەکا نیا، پەی نموونەی نازەنینە و مەنسوور هام شاریێنێ، بەڵام وەختوو دیالۆگەکاشانە یەکجار چەنی یەکترینی فەرق کەرا.
جە بەشوو زاویە دیدیەنە (point of view) :
زاویەو دید و ڕوایەتوو ئی ڕۊمانێ یەرۆم کەسا (دانای کل) .یۆ جە تایبەتمەنیەکاو ڕۊمانێوێ عالێ ئانەن بتاڤۆ زاویە دید جە درێژەو ڕۊمانەکێنە بە شێوێوی ڕېک‌وپێک فاریۆ بە نۆعێو کە وانەری ئەزیەت نەبۊ، هەڵبەت ئینە نەزەرێ تاکیۆ منەنە و نمەتاڤۆ عەیب بۊ پەی ڕۊمانێوێ، بەڵام متاومۍ ئەر نویسەر ئا تەواناییشەبۊ، پېسەو تایبەتمەنیێوی خاسی نامېش بەرمێ. ڕاوی ئی داستانێ جە درێژایی ڕۊمانەکێنە بە یەک فۆرما و مەفاڕیۆ، جگەم ئانەی ڕوایەتوو داستانەکێ جە زوانی یەرۆم کەسی تاکیەوە مژنەومێ، پېسەو دانای کۆلی هەرمانە کەرۊ و ملۆنە دلێ زەینەو گردو کەسایەتیەکا و تەنانەت بڕېو یاگێچەنە تەوزیحی ئێزافە مڎۆ و نەتیجە گیریچ کەرۊ، پېسەو ئا وەختیە کە تاریفێ ئشق و ئاشقی مڎۆ.
بەڵام هەزار حەیف و ئەفسووس کە چېگەنە مشیۊم ئېشارە کەروو بە چن خاڵا کە ئەسڵەن حەزشا پەنە مەکەروو و بەداخەوە ئی چن خاڵە یەکجار ڕۊمانەکێ کاک حەمەڕەزای وەشەویسیش لاوازە کەردێنە و کەردەنش هەرمانۍو کە یۊ پېسەو من ئەر کەسېو داواو ڕۊمانێوێ ڕېک‌ و پێکی هۆرامیانېش چەنە کەرۊ، نەتاڤۆ ئی ڕۊمانېشە پەنە بژناسۆ.[1]