دیای هۆرامییانەو (سەی عەفان) ی
نویستەی: #سوهەیب فاروق#
من هەڵۆی بەرزی لووتکەی داڵانیم
هەرگیز وەک قاڵاو ناکەومە چینە
(مەلاحەسەنوو دزڵیۍ)
وەروو ئانەیە وېت بشناسی و وېت بی و بتاوی وېت واچی شەرتە نېیەنە نویسەر و ڕۊنامەوان و ساعیب دکتۆرا و پی ئێچ دی و چېو بی، ئینسان بەس چەمۍ کەرۊوە بەڕاسی بڎیۆوە وېشرە وېش وێزۆوە. ئجۆم دیکارتا گەر غەڵەت نەبوو، ماچۊ فرەو جارا خونڎەواری قۆرتێ وەش کەرۊ وەردەمو وێوێستەیۆنە، یانێ نەخۆنڎەوارێ چوون وەردەمش چۆڵا زووتەر وېش وێزۆوە، ئینە کاک سەیڎ عەفان چێنە ماچۊش ڕېک ئینەما هۊش وزۆوە.
جوانترین وینای پەی وېمانەبییەی و سروشتیببېیەی و بێمنەتی و کۊمۆناڵی و وێڕاوەبەری، دەسی مانیاو سەرو لەمێ تێری و ژیوای بە هارەقوو دلێچەمای و زانای قەڎروو عافیەتی و بەرەکەتوو یانەی لاو ئی پیایۆ بەرگنۆ، بڎیەیدێ چن وەش لکەکۊرێ بەینوو ئینسانی و تەبێعەتی کەرۊوە، وەختێ باسوو تۆریای ئینسانی و تەبیعەی کەرۊ، دیایێ تەمام وېمانە و هۆرامییانە، گېرا گردیوە دوێ یەرێ جار وەرەڕوو نەڎیەبۆم وەلێ ماوێن پەیجۊروو نویستەیەکاشنە چن وېمانێنێ، ئی واتەیەو سەیڎی نیشانەما مڎۆ کە یانەش چن ئاوەڎانا و ئا جەمۆبییەیە وەشش کەردەن ئاستوو عایلەینە چەنینا، ئی وینایە پەی تاتێوە ساعیب زارۆڵەی و پیێوە ساعیب ژەنی مەکریۆ، ئەر ئاڎێچێ هامدەمێش نەبا، چڼ وەشا ئینسان چېوە دەرەسیستمبۊ، چېوە بندیوار و دەسپانکەرەوە نەبۊ، چېوە وېشبۊ.
چی سەرڎەمنە گەشەپێدانی مرۊیی مێ بە باوشێ مەلزەمێ و فلاشێ و پاوەر پۆینتێوە مزانیی وەشبەختی عایلەی ورەشۆ بە بڕێ زەڕ، وەلێم چوون تەکنیکی و پیشەیین و جبەرۆ مێ، مەنیشۆ دلێ و یاگێ مەگېرۆ، سێ عەفان ئیسەتێ لاو منۆ ڕاهێنەر و ڕاهێنەرەکان، مودەرێبا، سەیڎ عەفان بە وېش مودەڕێبا پانەی نېیا دیل کارنگی و برادەرەکېش نەوانێنێوە، پانەی نېیا کۊرسوو بزنسینە و کۊرسوو تەرکیزینە بەشداریش نەکەردەن، پانەی نېیا کتېبوو مامۆستای یەک خولەکی و چل ڕېگابۊ سەرکۆتنیش نەوانێنێ، ئینسان کە ڕۊشن بی چینەن، ئینەن چەمکریاوەیی نەک ئانە فرەتەرین شارۍ و پارکێ و شارعێ و قیتارێش دیێنێ.
جا سەیڎ عەفان وەروو ئانەی هۆرامی نېیا کە بە زوان و جلێ و گۆچانە و فەرەنجی هۆرامین، هۆرامین چوون ویرۆکەردەیش هۆرامییانەی تەمام وېمانەن، ئانەش کە خیاڵشا گېڵوە وبۊوە بە هۆرامی وەڵێ ڤیستیڤاڵی و فەرەنجی و کڵاشی و ڕوسقەی و گیلاخەی و بیبینی پانینە مشۊ گېڵوو پەی ئی ویری دلێ وېشنە، پی ویری بیوە بە وېت پەویشا بە تۆکڵ وېمانەنی و بە مەژگە بێگانە.[1]