یاڎەوەریەکېم
بەشو: دوۍ
ساتەوەخت، چارەک بە یەکوو شەوۍ بێنە، دوێ گڵۆپێ یانەی سەرو سەرەیمەوە درۆشیێنێوە و سەرجەم ڕۊشنایی وزێنێ هەیوانەو یانە ( هاڵ) . چەودیمەنە دەنگو موسیقی بە تام و لەزەتێوە پژگیێ شوارەو دێرەوەختێوە هامنی پەڕجە هەسارەو گەڵاوێژی. تەلەفزیۆنەکە لاشەش هیشتا گەرما و کەمتەر جە چارەکە ساعەتێوەن بېدەنگ بییەن. جە عەسرەوە تاکو ئیسە کاوېژ کەرۊنە و دروێ چەکنۆ!چەمۍووم وست یانەی پاک و پوختەکریا و گزی دریا. پەنجەرەو هەیوانەکێما مڎیۊنە مانگێ و فێنکایی مجۊرە لاشەی بۍ دەم و زوانیما. جاربەجار دەنگو لاستیکوو ماشینێوە جە کۊڵانەکێ ئۆ دیموو یانەیما، خشیێنە سەرو گۊشام، واچی یان نەواچی ئازارەم دێنە.مەژگیچم پڕچنێ و کەلیمەکام نەوینێنێ. جارەوەخت سیسەرگێ هەیوانەو بەری جریکنێنێ و لاشەو شەوەزەنگێ پڕچنێنێنە درەختە تۆزاوییە بۍ سەمەروو بۍ بەرەکامان. بە هێوری ساعەت بە یەکوو شەوۍ نزیک بییەبێوە. منیچش قەنچنابێنێنە لاو دەفتەرە یادداشتەکام، قەڵەم دەسمەوە وەنەوزێ دێنە و ناسازبێنە. پېسە وەرۋۍ تازۍ، خرمەو پایاش سەرو دیڎەو کاغەزییەرە خشیێ و کەلیمێ ئازێ جیای. ئیسە ویرم کەوتەوە کە ئارۊ ڕۊ جە ئەدابییەم بێنە. بەپاو یادداشتە پەراوێز کریاکاو تاتەیم، دیارا گەلەخەرمان بېیەن و مانگەو بەرەکەتی بېیېنە، یام بۍ ڕزقی و وشکەساڵی پېسە ئێساڵی (1346ک) ی ڕۊجیاری. هەرچی ویر کەروەوە، مڎیەو پی لاو پەولاو وېمەرە، بێدەنگی و سکووت سەرەش کەردەنانە و گرسانانە یانە. وانایچ نمەچڵاکنۆمرە و نمەبەرۆموە. تاماشام جە سکووتی و کەل و پەلو یانەی، نمەتەمامیۆ. جە وېم بەرنەشوونە ئەجۊ ڕۊمان نویسێوە وردبین و تێژنا کە چوارچېوەو ڕۊمانەکێ ئەژمار کەرۊنە و وزۆنەش ویرو هۊشوو قەڵەمەکەیش. دەسېوە موبلمانی قوپیا و تەلەفزیۆنێوە لاڵ و ساعەتێوە دیوارییە؛ قول و قاچ مەڕیا و موبایلێوە فرە دۊ و چن تابلۆ فەرشێ کەم قسێ و هورسپاریای. دەسەگوڵېوە موبارەکیی و نازار و شاعێرەئاسای بە سەلێقەو هام فکر و هام ڤیرەکێم و هام ژیواکێم. ئۆ دیمیچنە، کتېبخانېوە ئەرامەنە و چن کتېبێ ئەوەنەونیایوە و بەتاڵ قوتاڵێ و دەم و لچ وشک بیېوەی! کەوتێنێ ملو یۆترینیرە و دەسو تەپ و تۊزەو کووچە وکۊڵانە بێساحێب و بۍ کەلامەکێ، کە قرخەشان تاکو لاو نویسەرەکەیشان مەی! نە تاریخی گرەوەچووچ مازۆنە هەناسە کېشان و نە کۊرۆنای نەحس و مەنحووس. کتېبەکەو (میلان کوندێرای) ، زندگی جای دیگری است. (ژیوای ئینا یاگێو تەروە) ، نەبۊنە کە چن ڕوێن گرتەناشرە و داستانێوە جە ئەوەپەشیمانیی و سەرخوردەگیی دەورانوو لاویییەتی، شاعێرێوە جوانی کۊرنۆوە.
بە زوانێوە ساکار و ساڎە و عال، لەزەتش تەمام نمەبۊ، لوانەنە بێخوو دڎانام! حەر ئینە بېیەن بە باعێس کە ڕۊ جە ئەدابییەیم هۊشم بشۆوە و بە تاجە گوڵېوە کە پېشکەشان کەردەبۍنا، تەکانێوە وەروو و کتېب و وانای و نویستەیم وزوونە کەنارېوە و چڵاکیەورە دلێ وېم.وېم کە شێعرێوەنە ماچوو:
من ئینانا چېگە و
سکووت بېیەن بەپێخۆرم.
بورهان ئەختەر.[1]