یاڎەوەریەکېم
بەشو: سېڼزەی
قژېش تاکو لاو کڵۆکیش ئەینێ، سەرتاپۊشی سورمەیی، گۆرەوایېوە سیاو و بەنین، ئەجۍ گەرەکش بێنە کەس ناسکیش نەچڵاکنۆرە. قژۍ خاوێ و نازارێ، واچینی دلێ وڕێنە وتێنێ. قەسابخانە تاکو بنۆ گۊشاش لاکە گۊشتا گرتەبێرە و جمەش ئەی.قەسابەکە بەحتوو میاچەمایش بییەبێنە. سەرنجم دا چن دەفعێ وەخت بۍ دەسا وېش بڕۊنە و ۋنی و گۊشت تێکەڵێ بانە! پووڵەکەشدا پنە، بێدەنگ و بە هێوەری سەرەش هورچەرخناوە و کەوتەڕا. سیماش جە جەسەیش زاڕۆڵەتەر ئەرمانێنە. چەنی لەنجەولارەکەیش قژەکاش شانېوەشان وست و تۊزەشا کەوتە سەرو فەرشوو پیادەڕەوەکەی. بۍ ئینەی کەسېو بزانۆنە و کەسیچ چڵاکنۆرە، جە دووکانەکەی دوورە کەوتەوە.بێ ئێخیار شۆنەو قژەکاشرە دیێنێ کە گرد کەسش وستەبۍ خیابان، کووچەو کۊڵان قیامەتشەن! ئاوەختە نەزانام ئینانا قەسابییەنە و شۆنەو کاریرە کیاستەناشا. بۍ ئانەی وێچم بزانوونە، خەریک بێنێ جە دەفەتەرە یادداشتەکەو موبایلەکەیم ئەوەڵ کەلێمەو ئی یادداشتییە بنوېسونە. ئامانێ وېمرە، کەلیمێ موبایلەکەمەنە پەنگشان واردەبێوە و چەمېم خێل و خێچ کەوتێبێنێ. چەمێوەم قەسابەکەیوە بۍ کە جە وەشیێنە دەسەکاش نەبڕۊنە و، چەمێوەیچم تەماشاو سەروسیماو ئا کناچڵە وەشڵێوە بێنە. کەلیمێ بە هوژمەوە ئامێ و نوقموو چەمام بیێ، نویستەی ئاماو کەلیمێ ئامێ، هیشتای نە قەڵەمەکەم پێویێ و نە دەفتەروو یادداشتەکام و نە بیناییم. قەڵەم وېش شارەدەوە، دەفتەر تەڕو تڵیس بینە. چڵاکیانېرە، خەریک بۍ موبایلەکەم دەسمەوە پڕتەوازیۆنە. دەم و دەس وېم گرتەوە. هیشتای یادداشتەکام سەرو کیبوردوو موبایلەکەیمەوە پرخەشان ئەی و جم و جۆڵش ئی وەروو ئەو وەر کەرېنە، ئەجۍ جیوەش کریاڼە! پیایێ وەش سیما و نەرم و نیان هاوارش کەرد سفارشەکەت ئاماڎەن. نەزانام کەی و چە وەخت یاوانێ سەرو خیابانی. بە بۍ ئێختیار تاکسیېوەم گرت. بوەو بەرامەو قژاژ بە درێژایی پیادەڕەوەکەی تاکو (باوەڕەشیی) پژگیابێ.
بورهان ئەختەر.[1]