نامۍ: جەهانبەخش غەفووری
نازنام: پەخشە
نامۊ تاتەی: غەفوری
ڕۊ پېڎابېیەی: #1-7-1936#
ڕۊ مەرڎەی: #03-11-2023#
یاگۊ پېڎابېیەی: #شۊشمۍ_هۆرامان#
یاگۊ مەرڎەی: جوانڕۆ
$ژیۋاینامە$
هونەرمەندی (جەهانبەخش غەفووری) ئەشناسیا بە (پەخشە) جە دەگا زەریفەکۍ (شۊشمۍ) سەر بە شارەدەگاو (نۆسوڎۍ) وەرکۆتو کوردەسانی ئامان دنیاوە، دلۍ سەرزەمینو ئاواز و سەڎاو سیاوچەمانەینە چەمېش کەردېنێ، چەنی گۆرەبېیەیش ئاوازە ڕەسەنەکۍ هۆرامانی چەنی ڕۊحیش ئامېتۍ بیېنۍ، ئیتر هەر چاگۆ دەسش نیان ۋڵەو گۊشاشو بە بەرزی کەشە سەربەرزەکا هۆرامانی هاوار و سەڎاو سیاوچەمانەیش دێنە ئاسمانو کوردەواریرە.
دمای ئانەی ژیوای هامسەریش نیان پېوەرە، ڕوەش کەردېنە کوردەسانو عێراقی و ناوچەو شارەزووری نیشتەجا بېیەن، چاکە زیاتەر ئەشناسیان، شاڎیۍ و زەماۋڼەکېش بە بەزمە وەشەکاش گەرمتەر کەردېنۍ.
پەخشەی هونەرمەند شان بە شانو کەڵە هونەرمەڼە گۊرانی واچەکا هۆرامانی (ماموسا عوسمان و ماموسا حەمەحسێن و جەمیل نۆسووڎی، سەباح هۆرامی، .....هتد) ئاوازەکۍ سیاوچەمانەی و دەرەیۍ و چەپڵېش چڕیېنۍ گۊشی خەڵکی و سرووشتیرە.
جەهانبەخشی غەفوریی، هونەمەندە تایبەتەکەو هۆرامانی، خوتانو ستایلی و پۊشاکی و ڕیتمو تایبەو وېش بۍ، نە کەسی شۍ و نە حیچکەسیچ ئاڎی مشۊ.
هونەرمەند پەخشە جە نیارەی و ڕېکۋستەی ئاوازە ڕیتمیەکان، زیاتەریچ ئاوازە شاڎەکانە مامۊسێوە شارەزابۍ.
پەخشەی هونەرمەند، دلۍ جەژنە نەتەوەییەکانە، پېسە جەژنەو نەوروزی، دلۍ شاڎیەکانە، دلۍ دیوەخانەکانە، دلۍ کۊنیشتە هونەریەکانە بە بەزمە شاڎەکاش، بە سەلېقێوە هونەری زەریف وېش خزنانە دلۍ دڵو گۊش گېر و وەردەنگەکاش.
پەخشە، کەلەبەرێ گۆرېش جە هونەرو هۆرامانی و کوردەوارینە پەڕەکەردۆ، ئاڎ دلۍ شاڎیەکانە بە بەرزمەکانو (ئاوەڎان جوانڕۆ، گوڵە هۆ گوڵە چنووری، کرمان کرمانە، مەیلەنگێنە، ئەی کەڵی مل بەرز، کەمەرە لەرزێنە، کراسەکەت حەریرە )ی زۆقێ و جووڵێوە تەرش بەخشا پا زەماۋڼا، پەخشە جە ژیوایشەنە تەنیا چن ڕوێ وانگاو زۊرەملېنە وانانش، کەچی فرەو بەیتە شېعرەو گۊرانیەکاش هینۍ وېش بېنۍ.
جە چەمپەنەکۆتەیێنە هونەرمەند پەخشە ماچۊ: من جە وڵاتو عێراقینە جە ئەڎێ بېیەنا، وەختێ هامسەرەکېش کۊچی دمایین کەرۊ، مەگېڵۊوە پەی ئێرانی و جە شارەدەگاو جوانڕۊی پاڵو بەگزاڎەکانە مەژیوۊن، هەر ئاڎۍ ژەنیش پەی ماراوەو تاکو دما ساتەکانو ژیوایش هەر چاگە مەنۊوە. تاریخو (03-11-2023ز) جە ماواو وېش (جوانڕۆ) کۊچی دمایینش کەردەن.
ئەسعەد ڕەشید.[1]