قۊناغەو هەرزەکاریم
بەشۍ: دواڼزەهەمە
ژیواو گوزەرانم جە سویدەنە
جە بەشی وەڵینېیەنە باسم کەرد کە ساڵەو (1989ز) هەرمانەم جە زانکۆنە هۊرگیرتە، وە جەڕاو ئا هەرمانېوە ئاشنایم چەنی کتېبو کتېبخانەی و حەرپاسە چەنی کۊمەڵېو کەسایەتی ڕووشنی، جە سویدیاو هەم جە خارجیایچ پېڎا کەرد.
ساڵەی دماینەش هامسەرگیریم چەنی ئەڎاو (هێلین) ی کەرد. هامنو (1991ز) :چ دماو حۆت ساڵا سەفەریوی دوورو درېژم جە ڕاو سووریایۆ کەرد پەی ئێرانی، بە نیازو دیڎاری چەنی ئەڎێمو کەسوکاری جە ئوردوگاکاو کرماشانېیەنە.
خاسیەتو تایبەتمەندیی وانای جە سویدەنە ئانەنە کە تو تاوی حەرکەی بوارت پێ ڕەخسیا دەسپەنە کەری، حەر کەیچ نەڕەخسیا تاوی وچانېوە دەی، حەر پاسێچە بەردەوام بیۆ. پەی مەسرەفو وانایچ جە حکومەتی وام (قەرزی) تایبە هور گیری چەنی میقدارېو دەرماڵێچ. هەڵبەتە حەتا زووتەر تەمامیەی بە قازانجت تەمامیۊ.
من چوون چەنی زرووفو وڵاتیو ئابووری ویم فرە بەرزو نزم کەرېنۍ، حەر پاسێچە چەنی واناکێچم بەرزو نزم کەرېنۍ، ماوێو وانېنی و ماوېویچ هەرمانە کەرېنۍ، ئیتر پا جۊرە دۆرو دواڼزە ساڵېوش پەنە شی تاکو تەمامنام، وەنزیکەو چوار دەفتەرایچ قەرزو وانایچم ئاما سەر کە وەشبەختانە تاکو نویستەو ئی تێکستیە وە دماو (25) ساڵا ئەوەدایش، تەنیا دواڼزە وەرەقا چا قەرزەیە باقی مەنەن. (ئی زانیاریە تەنیا پێ ئانەیەنە کە بەڵە ئیمکانیاتەکە هەن، بەڵام نەک بەخۆڕایی)
کۊڕەوەکەو (1991ز) سەرگەرمو هەرمانېنە بېنۍ، فرە ناڕەحتی بېنۍ، دوراو دووریچ هیچ نەکریۍ. مان گېرینمۍ، جادەپیمایی کەرېنمۍ، عەکسۍ وەڵێ کەرېنمێ، جل و بەرگ و داو دەرمانیچ گلېر کەرېنمێ. جارجاریچ تەشەبز کەرېنۍ ئۆ هامهەرمانەکام، ئانېشا کە ئینگلیزۍ بېنۍ و ئەمریکیۍ، کە بە نامۍ منۆ تەلەفون کەرا پەی سەفارەتەکاو وېشا کە پەی ئا وەزعۍ هەڵوێستشا بوو، ئاڎییچۍ نەکەرېنېش نامەردی، تەلەفون کەرېنۍو وەعدی هور گېرېنۍ چی بابەتا. دماو کۆڕەوەکەیچ، وە ئەوە کېشېیاو حکومەتو عێراقی و ئەرەمەرزیای هەرېمو کوردەسانی، کتېبۍ عالۍ مناسبېچم پەی هۊر چنېنۍ، منیچ کیانېنېشا پەی نمایەنداو هەرېمی جە ستۆکهۆڵمەنە.
(1992ز) هێلین گېیانە پیڎا بیە، شەوەکېش حەفلەو دوکتۆراو هامساکێمانە بېنمۍ، مېمانەکېشا دیشا کە ئەڎاو هێلینی ئینا ئی سەعاتو ئۆ سەعاتەنە، یوە یوەی ئەیینۍ وەرۆ ئارەزوو موەفەقیش پەی کەرېنۍ. حەفلە تەمامېیاو ئامایمێ یانە. سەعات دۆرو چوارو ساحبی هەرمانەم پێ پېڎا بیە، سەعات دۆرو نۊیچ (بەبە) شا دلۍ عەرەبانېوی شیشێنېیەنە ئارد پەی لایم، واتم کوڕا یان کناچۍ؟ مامانەکېچ ماچۊ وېت تەماشەش کەرە. ئاوەختە عاڎەت بۍ وەختو کۆنتروڵ کەردەیەنە جە تەرسەو ئەرو (پەنە ناوەش) بېیەی، ڕەگەزو بەبەی ئاشکرا نەکەرېنۍ، بە تایبە پەی ئەڎاو تاتەو شەرقیا.
کە ئامایمێ یانە دیما وەرو بەرەکێما پەڕ بېیەن هەدیۍ بەبە گولانەی.
فاروق سان ئەحمەد.[1]