سەرنجێ سەرو شېعرەکاو (ڕەئوف مەحموودپووری
بەشۍ: دوەمە
نوستەی: #سوهەیب فاروق#
ئاڎ جە ڕاو زوانى تازە یۊ و ناموونیشانى تازە یۆ، ناڕاستەو خۊ پەنەما ماچۊ، ئی نەوە تازە مشۊم ورگیرو دنیاوینیېوە تازەىبۊپەى زوانى، زوان پېسە سەرەکیتەرین کۊڵەکى پەى قنج مردناى شوناسى وېمانەى.
ئېمە دلێ شیعرە و (محموودپوور) ینەو بە شیعرەو ئاڎى چڵاکیایمێرە، شیعرەو ڕەئوفى زەنگو کڵێسەى بۍ پەى چڵاکنایرە ئېمە، کە واتش پەنەما ساڵەى تازێ و شیعرەى تازێ و دەلا قێوە تازە پەى ویناى دنێى ئانا ڕاوە (هەسارېوە وەرمش زڕیا) و کەوت ڕا .ئیتر دلێ شیعرەو ئى شاعیرینە ڕەوانبێژى و وەسفى تەقلیدى و، کەلیمێ سوویێ و چنجار بەکار ئامێ بە واتاى کۆنە و بەیەک واتاحزوورشا کەما، ئیتر زوان لاو ئێڎیوە بە بەردەوام تۆک ورمڎۆ، و زیڼە بۊوە، زوان لاو ئێڎیوە تۆتۆن، هەرجارەو توېش ورمڎۆ، کژەو مارینە زوو زوو وزۆش و تازە بۊوە.
ئاڐ ماچۊ:
(هەر ئاماى بۍ و هیجران جووڵیا
هەرماچە بۍ و ماروەزەنیا
هەرساوى بۍ و چەم هورفڕیا) .
ئاخر ئەر ئینە تازەکەردە یۊ زوانى و فڕەداى تۆکڵى کۆنەو زوانى نەبۊ چېشا؟ یان کە ماچۊ:
جە گێجەنەو سەردەميەنه
هەراسان
تەنیا هەرسێ قەڵەم.
تویچ هەرپاسە
بۍ ڕەنگ سفرەت
شیعرە خیچ
گۊرانیەى ویرووس گرتێ.
دلێ مەکتەبو شیعرەو شاعیرینە ئانەى وینمێ کە شاعیر تەقەلا پەى پەروەردەکەردەى تاکێوە بونیاڎنەرى بەقوەتى ڕچەماڕى کەرۊ، کەموشتاق بۊ بە بەیانکەردەى و داهێنانى (ئاردەینە) ى تازەى، کە ئینەیچ ئاتاجش بە نۆعێوەتەر تازەى جە یاواینە، جە شیعرێ و تەنانەت جە تارېخوی کولتوور و زوان و کۊمەڵگەین، جە تاکیوە هەرمانە کەرۊ سەروکۆیى و دماجار ئا (کۆ) بۊ بە جەمعەبۊ بە شوناسى تەمامەتى، هەرپاسە هەرمانە سەرو درووسکەردەى شەخسێوە کەرۊ، کە تاوۊ شوناسوو هۆرامیبیەى وېش دلێ وېشنەو کۊمەڵگەینە یاونۆ باڵا، ئیتر ئى تاکە لاو دەستەڵاتی و ئایدۆلۆژیاى و نەریتیوە نەتاوۊ دەسەمۆکریۆ، تاکێوە سرک و جووڵیا، یانى تاکێوە، ویرۆکەردە و ڕۊشنویربۊ، ڕۊشنویر بە ماناى ئارۊییانێ ڕۊشنویر پېسەو بکەرێوە واقیعى کە تاوۊ فاڕیاى ئەنجام بڎۆ.
وەلێ چېگەنە پرسیارێوە قوتە بۊوە، ئاخۆم ئا (شخص) ە تاکە کە شاعیر ئینا وەرمشەنە، هەن و ئاماڎەن؟ ئاخۆ تاچن ئا تاکە کەسێوە هەرمانکەرو وردوین و دوور وینا؟ ئاخۆم ئا تاکە کە شاعیر وەرمش پۆوە وینۆ، ئاخۆم شاعیر وەرمە کەش ئامابۆ دى.[1]