ژیونایۆ شېعرەی هۆرامیۍ
بەشۍ: یەکەمە
نویستەی: #ڕەئوف مەحموودپوور#
زوانی سەردەمیانە
قسێوە:
وەختێ ژمارە یەکوو بەیانیه و ژیونایۆ شێعرەی هۆرامیێم وست وەردەسو هۆگراو فەرهەنگی، تاک و تراکێ جە دۆسا جیای ئانەی بلا بنج و بناوانوو تیۆری باسەکەیەرە و پەی دۆڵەمەند کەردەی بابەتەکەی با به هامشانێ، لەیەکدایشاوە ڕەهەندېوەتەرش گرت وەر، ئینەیچ لاو منۆ تاکو ڕادېوە وەرچەم و وەرۋینی کریا بێ. جە ڕاسیەنە من ساڵانی ساڵا پەی ورووژنای ئا باسا ماتڵم کەردەن تاکو دەق گنۆ وەردەس و بابەتە تیۆریەکێ بە پشتیوانی فاکتی و دەقی گنا وەرباس. هەرپاسە من چا بەیانېیەنە باسوو ڕۆتێوەم کەرد و سەعیەم کەردە بە موختەسەری ئەزموونوو دەقەکاو ئا ڕۆتیە وزوو وەرچەم. چوونکای ئەزموونوو بڕێ بەیانیام جە بەشوو شێعرەی سۆرانیێنە بۍ کە گلەیێ ئانەیش شۊنیوە بێنێ کە ئا بەیانیە بە دەقی پەشت قایم نیا، پەوکای سەعیەم کەردە باسەکاو منیچ نەبا هامڕەهەندی ئەچامنە.
من باسوو ئا بابەتە تیۆریکیامە کەردەن کە جە دەقە شێعریەکانە ڕەنگشا دانۆ. بەهەرحاڵ، ئیسەیچ جە درێژهو ئا باسانە بابەتێوەتەر وزوو وەرسەرنجوو هۆگراو شێعرێ.
زوانی سەردەمیانە
فرەو وەختا جە باسو بابەتە ئەدەبیەکانە، زوان ئا کەلیمە لووسکەڵێنە کە وېش برمانۆو هەرکەس بە لەونێوە درکنۊش و هورش بازنۆ. وەختێ سەرنجه و بڕێ جە باسە ڕەخنەییەکاو سەرو شێعرێ دریۆ، وینیۆ کە وچیان ئی شێعرێ ئەر زیاتەر خزۆ لاو زوانیەرە یام... بۍ ئانەی باسوو وردەکاریەکا کریۆو وچیۆ کە مەنزوور جە زوانی چا یاگانە چېشا و گەمەکە مەشیۆ کام لارە گلیۆ؟!
بەڵام حاشاش چەنە نمەکریۆ کە گەمەی زوانی بەشێوە بنەڕەتی شێعرێن و بەبێ وەرچەم نەگېرتەیش بیناکێ سسته و هەرۆڵەنە.هەرپاسنە کە پەی وێناکاریی ڕەنگ و پەی چۆتاشیی داروچۆ پەسای بنەڕەتیێنێ. کەلیمێ و زوانیچ پەسای بنەڕەتی شێعرێنێ و پەی ژیونایۆ شێعرەی هۆرامیێچ ئەشۆ سەرنجەش دریۆ پەنەو پەی سەردەمیانە کەردەیشۆ پەلەقاژێ کریۆ.
ئاسایین کە پەی ئی گەمە زوانیەیە ئېمە بلمێ شۆنەو پێوەریەرە و زانمێ گەرەکمانە چکۆوە گنمێ ڕا و پەی کۆگەی بلمێ. پەوکای لازما وەڵێ گرد چیوێنە شەن و کەو کارە زوانیەکاو دەقە شێعریە وەرینەکاما کەرمۍ و بزانمێ چا دەقانە سەروو زوانی چېش کریان و چەنی سەرنجەش پەنە دریێنە، دەرەتانوو گەمە زوانیەکا ئینا چە ئاستێوەنەو بەریناییش چڼەن. پەی ئی کاریچە ئېمە مەشیۆ دەقە جیدییە وەرینەکاما توا کەرمېوە و جیاوازیەکاو ئا دەقایچە دەسنیشان کەرمۍ و بەپێوەرشا گېرمێ.[1]