پەیکی ئازادی
مزگێنی بێ هات ساڵی نوێ
خۆشی دوای خۆشی جوێ بە جوێ
بڵێن بەخت چیدی نەنوێ
ئەستێرەی مەش سەری ناسوێ
وەبیروو دێ چمان دی دوێ؟
زوو راپەڕن مەبن شلوێ!
ئەوا هات پەیکی ئازادی
بە ڕووخۆشی و کەیف وشادی
کۆشێ گوڵی گەشی پێیە
مەعلووم بەشی مەشی پێیە
سەری قەندیلی خاڵ خاڵە
لێی شێن بوو سوێسنە و هەڵاڵە
چی دی مەکەن ئاﮪ و ناڵە
ئیستیعمار سێحری بەتاڵە
هەوای دەنگی ئەو شمشاڵە
هاوار دەکا هۆهۆ خاڵە
ئەوا هات پەیکی ئازادی
بە ڕوو خۆشی و کەیف وشادی
کۆشێ گوڵی گەشی پێیە
مەعلووم بەشی مەشی پێیە
لەسەر ڕا دێ ئاوی هەڵدێر
سەحرا شینە و مەزرا زەنوێر
حاحای شوانە و دەنگی بلوێر
زۆرمان دی دەوری تاڵ و سوێر
کوردینە ڕاپەڕن وەک شێر
وەختە هەلە تا نەبوە دێر
ئەوا هات پەیکی ئازادی
بە ڕوو خۆشی وکەیف وشادی
کۆشێ گوڵی گەشی پێیە
مەعلووم بەشی مەشی پێیە
بە حوکمی پادشای جەببار
بە ئیعجازی نەبی موختار
تێک ڕووخا کاخی ئیستیعمار
خەم ڕۆیی لەگەڵ بەفری پار
دنیا تۆڵەیە و دار بە دار
ڕێک و پێک و یەک بن ئەوجار
ئەوا هات پەیکی ئازادی
بە ڕوو خۆشی و کەیف وشادی
کۆشێ گوڵی گەشی پێیە
مەعلووم بەشی مەشی پێیە
شینی خوێنی لاوی کوردن
هەرچی گوڵی سوور ولالەن
لەسەر مەزاری شەهیدان
شلێران مەردەنگی و لالەن
شاری کورد و کوردستانی
یەک یەک وەک مەیدانی ژالەن
ئەوا هات پەیکی ئازادی
بەڕوو خۆشی و کەیف و شادی
کۆشێ گوڵی گەشی پێیە
مەعلووم بەشی مەشی پێیە
سەرچاوە: #دیوانی حەقیقی#
هۆزانەوان: عەباسی #حەقیقی# [1] [2]
Dette produktet har blitt skrevet på et språk (کوردیی ناوەڕاست), klikk på ikonet
![](https://www.kurdipedia.org/images/flags/ku.png)
for å åpne elementet på originalspråket!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Dette produktet har blitt sett 142 ganger
Skriv din kommentar om dette elementet!