بە تاوانو کناچە بییەیم
بەشۍ: یەکەمە
هۆرئەوەگېڵنای: گوڵزار شەریفی
نامېم پاییزەنە، ئیسە هەکە ۋېیەردەو وېم گېڵنوە پەیتا پام نیان دلۍ 28 ساڵا.
ئەسڵیەتم خەڵکوو یۊ جە شارەکاو شماڵین، بەڵام تاران جە ئەڎای بیێنا و چاگەنە مژیوو.
من ئەوەڵین زاوڕۆنا و دوێ براڵێ جە وېم وردیتەرێم هەنێ. وەزعەی ماڵیەما فرە خاسە و یۊ چا یانە دەوڵەمەڼا بێنمێ. ئاخر بابەم قاڵی ورەشیش بێ. بە واتەو ئەڎا گەورێم (ئەڎاو ئەڎایم) بابەم فرە کوڕ وەشەویس بێ.
ئەڎا گەورێم واچۍ وەختێو ئەڎام لەمەش پەڕە بۍ بە من لوا پەی (سۆنوگرافی) هەکە بابەم زاناش زاڕۆش (من) کناچېنە، مشتێو مەحکەمەش کېشا دیوارەرە و تن قێڕناش ئاخ کناچۍ؟ من فرە قینیم مەی کناچۍ، کناچۍ زایېفێنێ هەمیشە مشۊم چەمەڎاریشا کەری. ئی گردە ماڵ و مەعاشمە چېش پەنە کەروو وەختێو زاڕۆم کناچېنە؟ ئێمکانش نېیەن بازوو کوڕېو ڕاوە بەی و بە نامۍ زەمای گردی هەڵموو قووت کەرۊ. فەقەت لاڵیێدېوە جە خوڎای سۆنۆگرافیەکە هەڵەبۊ.
بابەم پا ئۆمێڎە هەکە من یەک جە سەڎی کوڕ بوو تامڵش کەرد تاکو بە دنیا ئامانۍ. وەختێو چەمش پەنە کەوتانی و دڵنیا بی کە کناچېنا پېسەو دنیا وڕۆ ملشەرە و ماتش کەرد. تاکو ماواو چن حەفتا بۊڵنابېیەنش ملو ئەڎای هەژارێمەرە. پاسە بزانوو ئەسڵەن منش نەگېرتێنا باوەشی و تەماشاش نەکردێبیێنا. هەر چی گەورەتەرە بێنێ خاستەر زانێنێ بە ڕەفتاراو بابەیم و بێ‌موحێبەتی کەردەیش بە من، ڕاس ڕاسی پېسەو دانێو بێگانەی بێنێ. هەر چی کەرېنا تاکو نەختێو نزیکم گنۆوە و یەک زەڕە دونۆم، بۍ سووڎ بێ. ئەسڵەن ویرم نێ چکۆ و کەی منش گېرتێنا باوشیوە. منیچ فرە حەز کەرېنا پېسەو کناچە مامۆزاکێم هەکە مامۆم چەنیش گەمە کەرۍ و لوێ قۆرخەشەرە بوو، بەڵام بابەم بە حەدیە ڕووتاڵ بێ، چەنەش تەرسێنا و ڕوەشوە نەلێنا. دەقێقەن ئەڎام بە پېچەوانەو بابەیم هەمیشە موحێبەتم پەنە کەرۍ، قوروان و سەڎەقەم بۍ و ماچ وارانم کەرۍ. ڕۊ بە ڕۊ گەورێ و گەورەتەرە بێنا. وەختێو پەنج ساڵێم بێ، ڕوێوشا ئەڎام بە قۆرپ و هۆڕ هۆرێستەوە و حاڵش شێویا، بە بابەیم واتش مشۊم بلمێ پەی ئازمایشی پاسە بزانوو دوەگېیانە بوو.
چا وەختەنە بابەم تەماشایېوە قووڵوو من هەکە غەزەبش چەنە وارێ کەرد و دمای ڕوەش کەردە ئەڎایم و واتش: دوعای کەرە ئی جارە کوڕبۊ وەیلا مەجبوورەنا ئا کارە پەنەم ناوەش هەن کەرووش. تەرسانی و حێبەتیێنە نزیکوو ئەڎایم کەوتانیوە و سەرەنجوو ڕۊخساریش دام، دیم دلۍ چەماش هەرسی پەنگشا واردەبێوە و بە بابەیم واتش: جە خوڎای تەرسە و کفرێ مەکەرە، حەر چیبۊ فەقەت سالمبۊ. من تاڵێو موو پاییزەی نمەواڕوە بە سەڎ دانە کوڕێ. بڎیە پەیش ماچی خوڎا نیشتەنەرە و تایبەتی دیمەنش نەقاشی کەردێنە. بابام لایېوەش کەرد لاموە و واتش: وەشڵەی کوڕ بېیایا. ئاخر کناچی پەی چېشی خاسەنە؟ ئەڎام بە تووڕیەوە لاش کەرد لاو بابەیموە و حیچش نەوات. دمایی ئامە باوەشیش کەردە منەرە و واتش: کناچە شیرینە زەریفەکێم، تۊ وېت مزانی چن وەشەویسەنی پەیم. بابەت شۊخیت چەنی کەرۊ. فرە حەز کەرېنا قسەکاو ئەڎایم باوەڕ کەروو، بەڵام ڕاسەکېش بەپاو زاڕۆڵەیمەرە فرە زاناتەرە بێنێ.
بەپاو ئاوەزیمەرە، خاستەر یاوێنانە مەبەستوو بابەیم. زانێنا ئەڎام پا قسانە فەقەت گەرەکش بۍ دڵداریم بڎەوە.
درۆسەن هەکە قسەکانوو بابەیم ناڕەحەتش کەردێبێنێ، بەڵام پەڕ بە دڵ وەشحاڵە بێنێ. چوون کە قەرار بۍ ئەڎام زاڕۊڵېوە تەر بە دنیا بارۆ تابۊ بە هام‌گەمەم. خۆلاسە دمای ماوایە ئەڎام پاش نېیا دلۍ نۆ مانگا و خوڎا کوڕېوەش پەنە دا. براکەم کوڕېو وەشڵە و خەپوو خڕ بێ. بابەم گاوېوەش پەی سەرە بڕی و هەر چی قەوم و کەسما بۍ خوڵکەش کەردێ. چوون مانگەو مەولووڎی بۍ نامېش نېیا موحەمەد. بابەم وەشیێ موحەمەدینە پایێش نەگنێنێ زەمین. وېرەگانی ئێوە و موحەمەدی گېرێ باوەشیشوە و نازش دێ و دونېش. منیچ هەر چی ئانەمە وینایا خەمش پەنە وەرێنا و ناڕەحەتە بێنا. چوون منیچ بە ئاواتە بێنێ پاسە دونایانېش. هەمیشە بۊنەو ئانەیوە کەس ناڕەحەتیش نەوێنایانێ سەرەم وزێنارە ملو دەفتەرکەیمەرە وېم خجڵنێنا بە وێنە کېشتایوە. حەزێو فرەم بە کتېب و دەفتەری بێ. حەر پابۊنەوە ئا وەختیە حەفت ساڵێ بێنێ ئەڎام کومەکش کەردانی دوێ کەلاسێم بە یەک ساڵ تەمامنای.[1]