ڕانویسی یۆگیری هۆرامی
ئۊسا سەردەمو شیرکەت لوای، کابرا جە دەگایېوەو هۆرامانیۆ پېسەو نۊتشەی، پەی کاری لوێ پەی شارێوی غەریب پېسەو تارانی. فرەو جارا ڕېک گنێ هاموەڵاتیێ نۆتشیێ چنەش پەرسێنێ، ئەرۍ ئانە چاگە کورڎێ ئینەی لاتاوە؟ کابرای نۆتشیچ جە جوابەنە یا واچۍ ئەرۍ مەسەلەن دوێ مەهابادیێ و بۊکانیێ ئینەی لاماوە، یا ئەر تەنیا نۆتشیێ لاشاوە بېیەیانێ جە جوابوو ئی پەرسێنە کە ئایا کوردێچ ئینەی لاتاوە واچۍ ئەرۍ فڵانە کەس و فڵانەکەس ( ئاڎیچێ نۆتشیێ) ئینەی لامەوە. دیارا ئا کەسە پەوکی پەرسێ (کورڎێ) ئینای لاتاوە، چوون مەبەستش تەنیا نۆتشیێ یا هۆرامیێ نەبېنێ. ئا کەسیچە جواب دېوە ئینەیە زانێ کە کورڎ بېیەی سێفەتێوی هامبەشا بەینوو نۆتشی و سنەیی و مەریوانی و مەهابادی وبۊکانی و.... یەنە. پەوکی ئەریچ تەنیا نۆتشیێ لاشۆ بېیەیانێ جە جوابوو ئا پەرسێنە کە کۊرڎێ هەنێ لاتۆ دیسان واچۍ ئەرۍ فڵانەکسی نۆتشیچ ئینا لامۆ.
ئیسە ئەر ئا کەسە پەرسەکێ پەرسۆ مەبەستش تەنیا ئانە بېیەیا بزانۆ هۆرامی زوانێ ئینەی چا شیرکەتەنە، پەرسێ هۆرامیێ ئینەی لاتەوە؟ یا ئەر تەنیا مەبەستش ئانە بېیەیا بزانۆ کە نۆتشیێ ئینەی چا شیرکەتەنە، پەرسێ نۆتشیێ ئینەی لاتەوە یا نا؟ جوابەکەیچش فرە ساڎە و ڕۊشن بێ!
گەرەکمانە واچمێ ئانە کە چ چەمکێو مشۊ جە چ کانتێکستێوەنە بە هەرمانە بریۊ، فرە چېوێوی ساڎەن و عەواموو کۊمەڵگاو ئېمەیچ بە شێوازێوی غەریزی ئی چەمکا دەقێق بە هەرمانە بەرا. ئینە کە یۊ پېسەو ئېمە ناچارا گرڎ جارێو سەرو کاربەستوو دەقێقوو چەمکەکا تەئکید کەرۊوە، بۊنەو پیچیدەگی بابەتەکەی نیا, بڕېو جەرەیانێ ئەنقەس بابەتەکا شێونا. چوون خروکشا مەی ونە نامۍو کوردی، تەنانەت یاگێڤۆ کە درۆسا و لازما بەرا. باردێ وەروو چەما ئا کابرا نۆتشیە چنەش پەرسیۆ ئایا شېرکەتەنە هۆرامیێ ئینەی لاتەوە؟ ئاڎیچ جە جوابەنە واچۆ ئەرۍ هۆرامیێ ئینەی لامەوە، دوێ دانە مەهابادیێ و یۆی بۊکانی! ئەر کەسېو پاسە جواب دۆوە یا ئەجۊت لاقەتیێ کەرۊ یا مزانی کە بنەڕەتەنە نەیاوانەنە باسەکەی. ئیسەیچ ئینە کە هەر چا شاروو نۊتشەیەنە پەی بەشدار بېیەی جە کۆڕێوەنە شەرەتەشا نېیەنەرە مشۊ بە ڕانویسی یۆگیری (هۆرامی)بۊ ، ڕېک پێسنەنە جە کابرای نۆتشی پەرسابۆشا شېرکەتەنە هۆرامیێ ئینەی لاتەوە؟ ئاڎیچ جوابش دابۊوە, بەڵۍ مەهابادی وبۊکانیێو!
هەر عاڼە بۍ مەنتێق و لەجووج!
مۆدەڕڕێس سەعیدی.[1]