سێبەری قەلەبەردم واناوە
جە هێجران تۆ هەر سات مەرگمەن
قەترە قەترەی زۆخ نە ڕووی جەرگمەن
جار جار قەڵەم کەم مارۆ وەختێو گەرەکت بۊ وەسفوو سیماو نازارێوێ کەری. جار جاریچ مەراقێو ئینا دڵتەنە و گەرەکتا بە هەر جۊرێو بېیەن باریش سەرو کاغەزی، دیسان چاگەیچ قەڵەمەکەت نمێت چەنی و ئانە کە جە دڵۆ مەی، نمەنیشۆنە سەرو نویستەکەیت.
دوێ حەفتێ چېوەڵ وەختێو کتېبەکەم تەمامنا، داتاکەم گیسنانە تاکو چېوێو سەرش بنوېسو. هەڵای گەرماو گەرم بێنێ و ئایېروو تراژدیەکا کە یۊ شۆنەو یۆیەرە وانێنېشاوە، دڵ و دەروونمش تازە تەکانە دایبێ و هەڵای قووڵ نەبیەبێنېرە دلێشانە.
چن ڕوێ وېیەرد. دیسان هەرچیم کەرد هیچم پەی ناما بنوېسو. چېش بتاو بنوېسو؟!
ئاخر ئی خەم و ڕەنجە جە کەشو شاهۆی گەورەتەرا، وەلێم دڵوو من تەنیا ئیندەو سیرەکوڵېوێن!
چېش هەن بنویسی وەختێو ئەڎایوە، کەفەنوو یەرێ کوڕاش هەڵای زەرد نەبېیەن، ملۆ سەرو مەزاروو دوێ کوڕەکەیتەریش کە، تیروارانێ بېیېنۍ وهەرچاگە کریێنێ چېروو خاکیۆ.
کام دڵ و دەروون متاوۆ وەرگەو ئا ساتەیە گېرۆ، وەختێو ئەڎا بە چنگێ و بە دەسێ، هۆڵۍ مڎۆ خاکەکەی لا دۊ تاکو دیمەنوو کوڕەکاش پەی ئاخر جاری وینۆ! وەلێم ئیجازەو ئا کاریشە پەنە نمەڎا. دماو هەشت ڕوێ جەنازەکا بەرمارۆ تاکو بەرۊشاوە پەی لاو ئەو یەرە کوڕەکەیش، چا وەختەنە ملۆنە چیروو لاشەکا و بە یاردی چن کەسېوی بەرزێشا کەراوە تاکو بنیاشا سەرو ڕکابوو ماشینەکەیۆ، ۋنی مجیۊ ملو سەرەیشەرە و سەرتاپاو لاشەیش پۆژیۆرە جە ۋنەو کوڕەکاش.
ئیسە مەلەکە وەختێو ئینەیە جە زوانی ئەڎایش گېڵنۆوە، وێچش دڵش گریای گریۆ. هەڵای باروو خەموو جە دەس دای پەنج برایاش نەسرەوتەن، خەمی گەورەو مەرگو شوەکەیچش مەی ملشەرە.
پاسە دیارا هەڵای وەسێش نېیا و گەردوونی کەردێنۆ چەم! ئی جارە جەرگش سۆچنۆ و کەرۊش بە قەقنەس! کناچە تاقانەکێچش ملۆ شۆنەو پەنج براکەییش و شوە نازارەکەیشەرە.
نامۍ کتېبی سێبەری قەلەبەرد
ئی کتېبە ویرەوەریێ دادە مەلەکەی مستەفا سۆڵتانیێنێ.
ئی کتېبمە من پېسە ڕۊمانێوی دەس پەنە کەرد. ئا خەم و ئازارێ کە دلێشەنە شۆنەو یۆیەرە ئەینێ، چەنیشا بێنێ و ئێحساسشا کەرېنێ. چوونکوم وېم دوور و نزیک چەنی فرەو ئا بەسەرئامایا بە تایبەت دەورانوو ئێنقلابوو (57)یەنە بېیەنا.
چی کتېبەنە (مەلەکە) پېسە ژەنێوێ مەینە مێڎان و ئانە کە دیەنش، بە بۍ هیچ پەردەپۊشیێو ژەنانە باسش کەرۊ. کە بە پەیلوای من، ئانە گەورەتەرین یاگێ هێقمەو ئی کتېبېیەنە.
هۆرسەنگنای سیاسی و یاگێ کۊمەڵایەتی ئی کتېبیە، گېڵۆوە سەرو ئا کەسا کە مواناشۆ. هەر کەس بەپاو پەیلوای ئیدئۆلۆژیکی وېش، سەرش نویستەنش و باسش کەردەن.
چی ماوە کەمەنە کە ئی کتېبە وەڵا بېیەنۆ، کەوتەن وەروو چەمڎاری و پەیجۊری بەشێو جە کەسایەتیە سیاسیەکا، هەر ئینە وېش، پەی هەر کتېبێوی نیشانېوە عالە و سەرکۆتێنە.
ئی کتېبە ئیسە دلۍ وەشانخانەو (49) کتېبېیەنە هەن و چا ڕایوە کریۆ سفارشش دەیدێ. پاسە بزانوو ئیسە جە پانیشتو کوردەسانیچەنە، سلیمانی و هەولێر و هەڵبجەنە دەس گنۆ.
ئارەزوو ساقی و سڵامەتی پەی داده مەلەکەی کەروو.
ڕەزا بەهمەنی.[1]