مېمانو ناوەختی گلەیېش سەرو وېشەنۍ
جاران مېمان و مېمانداری باوێ فرە وەشبۍ، بەشێ جە وەشی ژیوای دلۍ مېماندارینە بۍ، ئام و شۊ، سەردای، مەنەیۆ، سەوقاتی بەردەی، ئینۍ چن بەهایێ گرانبەهێ بېنۍ کە چا سەردەمە کۊنانە خەڵکی شانازیشان پۆوە کەرېنۍ.بڕێ جار مېمان جە ناوەختەنە لوۍ یانەو ئەشناسێوەش، ئانەیچ بە هۊکارو دماکۆتەی جە ڕانە و مەحتەل بییەیش، یام هاگاڎار نەبییەی ساحیب یانەی. ئەچا وەختانە یانەکە هەرچیش بیەبۊ نیانش وەردەمو مېمانەکەیش، ئیتر نان و ماس، یام سیراجی و کەرۍ و هەنگوین، هەرچی خوڎای دابیێ، وەختێ ژەنەو یانەی واردەکەی نیۍ وەردەمو مېمانەکەی پەنەش واچۍ: خوانەکېت ئانۍ نیەنە، بەڵام ئیتر مېمانو ناوەختی گلەیېش سەرو وېشەنی، پەی ئانەی پاسە مېمانەکەی بیاونۊنە هەکە خەتاو وېش بیېنە، گەر هاگاڎارېش کەردێنۍ مېمانداری عالتەرش کەرېنۍ[1].