ڕاپۆرتو ڕاوەلوای ششۆمین هەمامەو کوڵەداستانێ هۆرامیێ
ششۆمین هەمامەو کوڵەداستانێ هۆرامیێ ڕۊ پەنجشەممەی (27)وو پاژەرەژوو #1403 ک.ڕ#)،بەشانازی و شکۆیوی بێ‌وێنەوه، شارو نۊتشەینە لوا ڕاوە.
هەرپاسه خەریکا شێنەی شێنەی بەرگنۆ؛ تایبەتی تایبەو کوڵەداستانێ هۆرامیێ دلێو ئەدەبېیاتی هۆرامیەنه، بێجگەم لابەردەی تۊزەو ویرەوەشېیەی و کەمتەرخەمی سەرو بەشێو جه ئەدەبی کوردیەوه؛ ئەنەوسەی هېز و هازێوێ بەردەوامێ بۍ دلێو جەماوەری فەرهەنگی هۆرامانی و ئەرەنیای و ڕاوەبەردەی ئی هەمامەیه، بەردەوامی بەڕۆ و درێژەو ئی ڕۊتیەنه. به وەشحاڵیەوه، به ئاوەزی_فەلسەفی، لێرەی یەهەردار و ئەقڵیەتوو سەردەمی و هېزو بەشێوی فرەو
ئاوزیارەو مەکۆو هۆرامانی و به یاردی پېشینەی فەرهەنگی ئی کۆنه وەڵاتیه، ئی ڕۊته ئیسه بەردەواما و گۊشه و کەنارو وەڵاتیەنه، شێنەی شێنەی بەڵام مانیایینەژناس، ڕا پیمۆ و ڕوو به سەرکەل ملۆنه. ئیسه ئێتر فەزاو داستانێ کریاینەوه و خەریکا به شێوازێوی فەڼی زانستی قەوام گېرۆنه.
ئی هەمامە بە حازر بېیەیو ئەژمارېوی وەرچەم جە نویسەرا و فەرهەنگ‌دۆساو هۆرامانی سەعات دوو دماو نیمەڕۆی ساڵۆنه و کتېبخانه و نۊتشەینە بە ئەوەوانای قورئانی پیرۊزی دەسش پنە کەرد. دماتەر بەیانیه و دەبیرخانه و هەمامەی لاو خاتوو فەرزانەی مۆمنیەوە وانیاوە و شۊنیشەرە مامۊسا مەڵڵا ئەحمەد موبارەکشاهی وەرپەرسوو کتېبخانەی گرڎیو شاروو نۊتشەی خێرئامای مێمانەکاش کەرد و بەرنامه و هەمامەی بە سوخەنڕانی دوکتر هێدایەت مەحموودی بەخشدارو نۆسووڎەٚێ درێژەش پنە دریا. شۊنیشەرە کاکە ئێبراهیم شەمس سەرو ڕۊتو ڕاوەلوای پەنج دەورە وەڵینەکاو هەمامەی باسێوی کۆتاشا کەرد.
داوەرێ هەمامەی بەینوو (55) داستاناو بەشوو نویستەینە دە داستانێ و بەینوو (10) داستاناو بەشوو هۆرەوەگېڵناینە (5) داستانېشا هۊرچنیێ‌بێنێ کە بەشوو نویستەینە یەرێ داستانێ و بەشوو هۆرەوەگېڵناینه دوێ داستانېشا وانیایوە.
داستانێ ئەوەوانیای بەشوو نویستەی:
1. پله و یەکی؛ داستانه و (قانوون)ی، نویسته و (نایێب مێنبەری).
2. پله و دوێ؛ داستانه و (بلۆقێ)، نویسته و (ئێرشاد ئەزەغ»)ی.
3. پلەو یەرۆمی؛ داستانەو (ئەشقی ئەوەشاریا)ی، هەکه بۊنەو حازر نەبېیەی نویسەری دلێو هەمامەینه، داستانه و پله و چوارۆمی به نامۍو (تاموو ژیوای») به نویستەی خاتوو (مەهین کەریمی)، وانیاوە.
داستانێ ئەوەوانیای بەشوو هۆرەوەگېڵنای:
1. داستانه و (مەرگی دووباره)ی، هۆرەوەگېڵنای خاتوو (نارنج بوهلوولیفەڕ).
2. داستانه و (گرەوە لەعنەتیەکه)ی، هۆرەوەگېڵنای کاکه (ئێبراهیم میکە عەلی).
داوەری ئی دەورەیه؛ کاکه کوورش ئەمینی و خاتوو ئامینێ(ژوان ڕەحیمی) و پېشکەشکار کاکە (هۆرامان ڕۊستەمی) بېیېنۍ.
بەینوو ئەوەوانای داستانەکانە، داوەرێ هەمامەی سەرو دوێ داستانێ ئەوەڵ و دوەمیەوه، باسێوی فەننی داستانېشا پېشکەش کەرد. درێژەو هەمامەینه، پەیاموو ئەنجومەن ئەدەبی مەریوانی پەی ششۆمین هەمامه و کوڵەداستانێ هۆرامیێ لاو (کاکە عەتا وەلدی)وە وانیاوە. بەینوو دوێ بەشێ هەمامەینه، هونەرمەند فەرزاد مەهدینیا، بەزمېوی هۆرامیشا پېشکەشو حازرا کەرد.
کۆتایی هەمامەینە بە ئا ئازیزا داستانەکېشا بەشوو نویستەینه پله و یەک تاکو یەرێ و بەشوو هۆرەوەگېڵناینە پله و یەک و دوېشا ئاردەن؛ خەڵاتی_نەقدی، تەندیسوو_هەمامەی و سپاسنامەو هۊرچنیای داستانێ پېشکەش کریا بە سەرجەمو ئا ئازیزا داستانەکېشا بەشو نویستەینە پله و (4) تاکو ی و بەشوو هۆرەوەگېڵناینە پله و (3 تاکو 5)یشا ئاردەن سپاسنامه و هۊرچنیای داستانێ و بە گردو ئا ئازیزا داستانەشا کیاستێنە، سپاسنامه و کیانای داستانێ پېشکەش کریا. هەمامە سەعات شش و نیم وېرەگای کۆتاییش ئاما.
بە ئەرکوو سەرو شانه و وېما مزانمۍ جە گردو ئا ئازیزا که یارڎیشا دایېمێ تاکو ئی هەمامە بە ڕېک و پێکی بلۆ ڕاوە دەسوەشی کەرمۍ، بە تایبەت؛
* سننۆقوو «هانا»و نۆتشېیاو مەریوانی.
* سننۆقوو «سارێژ»وو نۆتشېیاو سنەی.
* شۆرای ئێسلامی شاروو نۊتشەی.
* شارەوانی نۊتشەی.
* نمایەندەگی ئامووزش و پەروەرشوو نۊتشەی.
* کتېبخانەی گرڎی شاروو نۊتشەی.
* کتېبخانەی گرڎی شارەسانوو پاوەی.
* ئەنجومەن ئەدەبی کتېبخانه و نۊتشەی.
* سپاس و دەسوەشی دووبارە پەی گرڎوو ئا ئازیزا کە داستانەشا کیاستە پەی هەمامەی و گرڎوو ئا وەشەویسا کە پەی ڕاوەبەردەی هەمامەی زەحمەتشا کېشا.
دەبیرخانه و ششۆمین هەمامه و کوڵەداستانێ هۆرامیێ
نۊتشە - 28وو پاژەرەژوو (#1403ک.ڕ#).[1]