پەی مەسعود عەباسی
نویستەی: #جەلیل عەباسی#
ئاااااای مەسعود گېیان
تاسێم کەرڎەبێنی و فرە بېتاقەتت بېنې
نەمانێ مۆبایلەکەیم. پەنجەم نییا سەرو نامە وەشەکېت.. زەنگ لوا و تۊ دەنگت نەبی.. هەرچی چڕیم و چەمەڕا مەنا، جوابت نەدانێوە.
دڵم پەی وېم مەنەرە: واچی دڵش چەنەم ئېشابۆ، پاسە بې موبالاتا چەنیم؟
پرمەو گرەوەی گېرتەبېنې کە خیاڵی سەوداسەرم چڵاکیارە.. ویرم کەوتۆ کە زوۆن جیات ئاستەنا.
واتم: ئیسە چەنی (حەمەی و جەمیلی و سەلیمی و کاکەلێ) گېیانی یۊتا گرتەن و ئینایدێ سێبەرەو تایڵێ باخچە ڕەنگینەکەو خواڵەینە.. وەرو دەمیشەنە چوارمێکەتا پێکان و گۊشتا دارانەرە پەی گفتولفتە شیرینەکەیش.
شمە گلەیێ (دوانزەبرایا)ش لاوە کەرڎې: چی ئاستشا (کېمنە) پاسە کۆسش گنۊ؟ چی دەسشا نەگېرت سەرەمارە و ئاستشا پاسە هەریۆما گنۊ وەڵاتێ.. چی ئیزنشا دا سەرەمەرگیچەنە خوڕەو ئاوەو (چەمە)ی نەبۊ یاسینیما؟
ئەرۍ، نازارە ئازار چەشتەکەم، واتم ئیسە خەریکێ دەردەدڵینێ چەنی خواڵەی و ئەویچ قسێ شیرینېشا مڎۆ گۊشەرە و جارجار هەنجیرێ کۆچەکاو یا تیسکێ دەرەبۆڵەو باخچەئاوەڎانەکەو وېش مازۊرە وەردەمشا و مەزاقشا شیرین کەرۊ. ئێتر چ جایشا هەنە سەرو من و بېتاقەتیەکامۆ؟ ئێتر چکۆ پەردەچیۊشا جوابو ئاهوناڵەو من بڎاوە.
ئازیز گېیان...
دەی شەڵای گلەیێ منیچتا یاونێنێ لاش کە: چی شمەش چەنە کەردا.
ویر نە سەرینت زار زار مەناڵۆ
خاک یانەی نۆت وە دیڎە ماڵۆ
تۆ هیچ نیت وەتەنگ بېقەراریی ئەو
جە ئەلویدای سەخت شین و زاریی ئەو
نمەڎەی جواو لامل گوڵاو ڕەنگ
دڵ ماتەن، دووریت کەرڎەنش دڵتەنگ
خۆ من هەڵای بڕوام نەکەرڎېنە تۊ جیا ئاستەبوو.. هەڵای بڕوا مەکەرو چەنەم پېوار بېیەبی. مەزانۇو نا، ئی دنیا بەرینێ بې تۊ بە چېشی نازۆ؟ ئاخر ئی دنیا دڵسەرد و ڕۊحمەردێ چەنی تاواش دەسو تۊ بازۆ؟ چەنی دڵش ئاما جەوېش کەرۊت و کیانۆتەرە نادیار؟
ئااااااای بېتاقەتتەنا ئازیز
دەی هیچنا، گەر وەرمیچەنە بۊ جوابو تەلەفۆنەکەیم دۆ.
مەلوول و دڵتەنگ پېواریتەنا
تامەزرۆی لەنجەی پێراریتەنا
ئاهېر دووریت کەرڎەنا قەقنەس
یادم نمەشی ئازیزتەرین کەس.[1]