تەماکۊ (چەرداخە)
هؽزى سەرؽ تەماکۋکەیم دا، شوکر پەى خواى گەشو پەرداخ بؽ، بڕؽ جە گەڵاکاو واریش (بنؽش) یاوؽنؽ و زەردؽ بیؽنؽ، (پاسە بزانوو بنپەل و تەماکۋکەى یاوان)، پەوچى مشۋم وؽما حازر کەرمؽ پەى بنپەل کەرڎەى و تەماکۋ دایوەنەى..
کوڕوتاتەیش من سەعبؽ ملو پەى هەڵەبجەى پەنەوازەکاو تەماکۋ دایوەنەى مارو، ڕەنگاى بازؽ (بەن و تەماکۋدایوەنەى (شریتؽ) و گونیؽ وفەردە تەماکۋى و خلێنەو بازؽ بزمارى چەرداخؽ و ، چەنى (5) پەنج چڵ دارؽ (چنارؽ) درێژؽ دەرەو بېیارؽ و دەرەقوڵی و (10) دە کۋڵەکؽ گولانؽ نەرەینؽ (تاوؽرەیا و دەرەمەڕیا) ما گەرەکؽ و لازامؽما با)، جا سەعبؽ وەڵؽنە بازاڕەرە (قەیسەری ودوکانەکارە) گؽڵو، بەشکیم چؽ لاو لالۋ (عبدالکریم / لالۋئەوکە) و لالۋ حەسەنو فەرەجو هەیاسیۋ دەسؽم گنا، ئەر نا مەجبور مشۋم بلو پەى هەڵەبجەى باروشا..
ئانەبی تاتەم سەعبؽ زوو لوا پەى بازاڕى شوکر پەى خواى گرڎ چؽوەکاو لازماتو تەماکۋ پؽکنایش دەسکۆتؽبؽنؽ، ئؽمەیچ دماو نانوچایى سەعبى واتش ڕۋڵە بەیدؽم چەنى و یاردیم دەیدؽ با ئا کۋڵەکؽ و دارؽ و چنارو چەرداخا کۋمؽرەو حازرکەرمؽ، بەشکیم زوو دەسکەرمؽ بە بنپەلو تەماکۋکەى (بنپەلو تەماکۋکەى کەرمؽ).
خاس تاتە گېیان ئؽمە گرڎما حازرؽنمؽ، سەعبؽ زوو هەربە فؽنکاى حیشتاى وەرەتاو نەزیابؽ قەڵاتؽ، چەنى برایەکام و واڵەکؽم حەوشەگۆرەکؽ پەشتؽماوە دەسماکەرد بە چاڵ ورکەندەى و کۋڵەکە کوایرەى، من زوو زوو ئاوى ئارؽنؽ پەى تاتەیم و برایەکام تاوەڵؽنە چاڵەو کۋڵەکەکا کەنمؽ و بەخەیر کۋمؽشارە، برؽکؽم وەردەسى تاتەیم کەرېؽنؽ، یۋما تەوەنیش دؽ دەسۋ، یۋیچما کۋڵەکؽش پەى گؽرؽ، یۋیچما هەڕەش پەى حازر کەرؽ و گؽرؽوە، خاسبى فرەش نەبەرد هەر (10)دە کۋڵەکەکەما کوؽرە هەر چن بازؽشا پەى ئیسەى (پەى بنپەلى)ڕەنگاى زیاﮆؽبا وەلؽ قەیمەکەرۋ، پەى دلؽبەرى لازمؽما با، پەوچى قەیمەکەرۋ با ئیسە حازرشا کەرمؽ تاکو دماتەر نەک نەپەردەچیۋما..
جا برام کۋڵەکېما کوؽرەو هەریۊشا تەقریب (دوە مەترؽ ) بەینشا بې (مەسافەشا بؽ) بەپاو بەن و شریتەو تەماکۊکەى مەسافەما پەى دیارى کەردؽ، دارەکؽما (چنارە درؽژەکېؽما ) هەر پەنجشا وستؽما سەرو هەر دە کۋڵەکە نەرەینەکارە، چوار بەرؽ چەرداخەما دروسە کەرڎە، پؽسە واتما پەى دلؽبەرو سەرپەلیچ فرە دەردەما وەرۊ نەجاتما بۊ جە بؽ چەرداخى، جا جوان بەتەلى قایم و حەبلەى عالە تڼ وتۊڵؽ و حؽقمؽ و مەحکەمؽما کەردؽ.
تاتەم ماچۋ (تاتەم واتش) ئادەى ڕۋڵە گېیان ئا بزماراو چەرداخا بارە هەکە هؽزى لاو لالۊ ئەوکەیۆ ئاردؽبؽنؽم ، با یەکجار هەرمانەکېما کەرڎېنە، بزمارەکایچ کۋمؽرە سەرو (دارە/ چنارە) کارە، جا ما بەینو هەر بزمارؽ (4) پەنجؽ تاتەیم بېدؽ، وەلؽ منیچ بزمارى کوؽنؽرە ئاکاتە بەین و بزمارؽ و بزمارؽتەرى (5) پەنجؽ من بؽ، (هەر پەنج پەنجؽ منو بزمارؽ کوؽنؽرە تاکو گرڎو (دار/ چنار) ڕەکاما بزمارکۋ کەردؽ..
ئانەبؽ ( چاڵیما هورکەندؽ پەى کۋڵەکا، تەوەنیما نیؽ و خڕچنؽما کەردؽ و هەڕەیچا دؽ پۋوە، دماتەر دارەکیما وستؽ بەین وچەڵەمەو کۋڵەکەکاوجوان پاکو پوخت بەستؽماوە مەحکەمؽما کەردؽ و دماتەریچ بزمارەکؽما کوؽرە)، ئیسە ئیتر چەرداخەما حازرەنە پەى تەماکۋ هوروستەى وەرو وەرى تاکو وشک بۋو، دماتەر شریتەکؽ کریا بە گورزؽ وگورزەکؽچ بریا پەى زیڼانى و دماجار مەیا بەرو وزیا دلؽ صڼوقیى و کریا بە فەردؽ.
خاس بى دماو مانیایؽ فرەو گرﮆیما، نەبەرﮆش تاکو نیمەڕۋ چەرداخەما حازرەو بازرە کەرڎە پەى تەماکۋ دایوەنەى.
هیدایەت هۆرامی.[1]