ڕەسمێ قەڎیمی قولانۍ _ قولەقانۍ
تەئریخ هەر ئانە نییا ڕەسمو هەیکەلو دەسەڵاتدارێ پۆ کەشێوە بە قوڵەنگە بەرشا ئاردەبۆ، یان گۆزەڵێوە نېیەنە چېرو خاکینە وێزاشۆو چن سکە کۊنېش چەنەبا، تەئریخ تەنیا دیوارێ کۊن نییا کە چین بە چین سەرو یوترینیۆ نریابۆ، جاری چانە هەن ڕەسمێ سېیاو و چەرمە تەئریخو شۊنەماو سەڎ ساڵا شۊنۊ وېشرە جېیامازۊ.
ئی ڕەسمە یۆن چا ڕەسما، کە ساڵەو هەزارو نۆسەو حەفتا و ششی جە خەرمانەکەو (ماما شکێنە) جە هانەو دڼی، باقی نەسڕوڵڵا بەگی گېرتەن، (باقی نەسڕوڵڵا بەگ (01-07-1954ز.) _ (28-06-2021ز.)، کە بەعزێ هەرزێو گەنجې ئا کاتینێ قولانی کەرا.
(قولانۍ_ قولەقانۍ): یوەنە چا گەما ئا سەردەمی کە هەرزەکارۍ پەی عارەزو وېشا ئی قولانېشا کەرڎېنە، وە گەمێوەن کە ئشۆم پەرمی وېترەو چەنەت بێ جا تاوی کەریش، ئی گەمە پەنج بە پەنج یام شش بە ششا، وەرانوەرو یۊترینیوە مردا، چا سەردەمەنە دەگاو ئېمەنە سەرو بانیوە کریێ، بانتلیرو بانەکەی ڕاس کەرېنێو کەرېنېش (شار). هەردوۍ دەسەکې وەیوەشا بې، هەر جارێ سەرەو یۊیشابێ پەی وەیوێ، وەیوە دماو گرڎیوە بې، یۊی کەرېنێ وەیوە ئشییا ئازاو کرژ بییێ، دماو ئانەی وېشا حازر کەرېنێ، وەرانوەرو یۊترینی بېنې، دەسەو یەخە شنیێنێ یۊترینی، بە چۊکە یۊترینی وزێنێ، قڕقەمێ یۊترینیچ دڕێنېرە، هەرچی قڵۆپچێ بېنې گرڎ کنیێنێ، هەڵمەتە دێنێ پەی وەیوێ، ئەر وەیوەشا وستێ ئانە جەماعەتو وەیوێ دۆڕیێبېنې، ئەر وەیوەیچ شارش کەرڎێو یاوێ لاو بانتلیرەکەی ئانە نیشانێ بەردەیۆ جەماعەتو وەیوێ بې.
عەفان دەرەمەڕی.[1]
Dette produktet har blitt skrevet på et språk (هەورامی - Kurdish Hawrami), klikk på ikonet
![](https://www.kurdipedia.org/images/flags/ku.png)
for å åpne elementet på originalspråket!
ئی بابەتۍ بە زۋانی (هەورامی - Kurdish Hawrami) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
![](https://www.kurdipedia.org/images/flags/ku.png)
ی کلیک کەرە!
Dette produktet har blitt sett 20 ganger
Skriv din kommentar om dette elementet!