دوای ئەو زولم و ستەمەی لەلایەن تاقمی تیرۆریستی داعش دەرهەق بە یەزیدییەکان و خاتوو نادیە موراد کرا، کەدوور بوو لەهەموو بەهاکانی ئایینی و یاسایی و ئەوپەڕی دڕەندەییان لەبەرامبەردا ئەنجامدرا، نەتەوە یەکگرتووەکان خاتوو (نادیە موراد)ی وەک باڵیۆزی نیازپاکی UN و نوێنەری قوربانیانی ئافرەت و گەلە ستەمدیدەکەی دەستنیشانکرد و بەمەش ئەم خاتوونە بووە یەکەم کچی کورد ئەم پلە شایستەیەی پێببەخشرێت.
خاتوو نادیە موراد و کچانی یەزیدی بەقەد ئەوەی لەلایەن تاقمی تیرۆریستی داعش بەوپەڕی دڕەندەیی لاقەکران و غەدریان لێکرا، هەزاران جار لەوە زیاتر لەناخی تاکی کورد و سەرجەم مرۆڤایەتی پایە بەرزبوون و ئازایەتی و خۆڕاگرییان بووە سیمبۆلی بەرخودان و خەباتی گەلی کوردستان و، ئەم خاتوونە ئێستا نوێنەرايەتی سەرجەم چەوساوە و ئافرەتە ژێردەستەکان دەکات که لەلایەن عەقلی دۆگماو کۆنەپەرستی جەستەیان کڕین و فرۆشتنی لەسەر دەکرێت.
ئێمە لە یەکێتی نەتەوەیی دیموکراتی کوردستان YNDK پیرۆزبایی لەخاتوو نادیە و گشت کچانی کورد لەهەموو بەشەکانی کوردستان دەکەین، کە ئەمڕۆ کچێکی کورد ئەم پلەیەی لەلایەن نەتەوە یەکگرتووەکان پێبەخشرا، ئافرەتی کورد هەمیشە وابووە لەسەنگەری پێشەوەی تێکۆشان و خەباتی گەلی کوردستان بووەو، شۆڕش و ڕاپەڕینەکانی کورد بێ ئافرەت نەبوونە و هەر ئەوان داینەمۆ و بلیسەی شۆڕشگێڕی و ئازایەتی و خۆڕاگری نەتەوەیی کورد بوونه، نمونەتان زۆر بێ و پاڵپشتتانین بۆ گەیاندنی دەنگی کچانی یەزیدی و کورد بەگشتی بۆ نێوەندە نێونەتەوەییەکان بۆ فەراهەمکردنی پاڵپشتی زیاتر بۆ دۆزی ڕەوای گەلی کوردستان و هەنگاونان بەرەو ڕیفراندۆم و سەربەخۆیی کوردستان، خوازیارین لەئاییندەیەکی نزیکدا نوێنەرایەتیتان ببێتە هۆکارێک بۆ ڕزگاربوونی سەرجەم کچان و ئافرەت و منداڵان لە چنگ و چڕنووکی تیرۆریستانی داعش و پاکبوونەوەی کوردستان لەو دڕندانە.
ئێمە و خەڵکی کوردستان سەربەرزین و شانازی بەتۆو سەرجەم پێشمەرگە و شەڕڤانان دەکەین که لەئیستادا ئاخ و وڵات دەپارێزن و کوردستانیان کردۆتە گۆڕستان بۆ داعش و دوژمنانی کورد و کوردستان.
- نەمری و سەربەرزی بۆ شەهیدانی کوردستان.
- سەرشۆڕی و نەمان بۆ داعش و داگیرکەرانی کوردستان.
مەکتەبی سیاسی
یەکێتی نەتەوەیی دیموکراتی کوردستان YNDK
17-09-2016
هەولێر - باشووری کوردستان