دواڕۆژ، کۆچەر عەلی
بەرپرسی لیژنەی وەڵامدانەوەی ڕاپۆرتە نێودەوڵەتییەکان ڕایدەگەیەنێت، لە یەکێتی ئەوروپا کۆنفرانسێک بۆ چۆنێتی دۆزینەوەی ڕێکارێکی یاسایی بۆ دادگاییکردنی چەکدارەکانی #داعش# ئەنجامدەدرێت و دەشڵێت لەهەرێمی کوردستان دوو هەزار و 652 داعش دادگاییکراون و 220 داعش بەهۆی ئەوەی تەمەنیان لەخوار 18 ساڵەوەیە دادگایینەکراون.
دیندار زێباری، بەرپرسی لیژنەی وەڵامدانەوەی ڕاپۆرتە نێودەوڵەتییەکانی حکومەتی هەرێم لە ڕاگەیەندراوێکدا کە وێنەیەکی بۆ دواڕۆژ نێردراوە ئاماژەی بەوەکردووە، لە هەرێمی کوردستان دوو هەزار و 652 داعش دادگاییکراون و 220 داعشیش بەهۆی ئەوەی تەمەنیان لەخوار 18 ساڵەوەیە دادگایی نەکراون.
بەرپرسی لیژنەی وەڵامدانەوەی ڕاپۆرتە نێودەوڵەتییەکان ڕاشیگەیاندووە، لەسەر داوای یەکێتی ئەوروپا وەک نوێنەری حکومەتی هەرێمی کوردستان بەشدارییان لە کۆنفرانسی چۆنێتی دۆزینەوەی هۆکارەکانی نێوخۆیی و نێودەوڵەتی بۆ دادگاییکردنی داعشەکان و گیراوانی داعش کرد.
دیندار زێباری وتیشی کۆنفرانسەکە دوو ڕۆژ بەردەوام دەبێت و دوێنێ‌ یەکەم ڕۆژ دەستیپێکردووە و ئەمڕۆش دووەم ڕۆژە بەردەوام دەبێت کە نوێنەرانی ئەمریکا، پۆلیسی ئینتەرپول، نوێنەرانی یەکێتی ئەوروپا و نوێنەری ئەوروپا بۆ بەرەنگاربوونەوەی تیرۆر و نوێنەری حکومەتی هەرێمی کوردستان و بریکاری وەزیری دەرەوەی عێراق و باڵیۆزی عێراق لە یەکێتی ئەوروپا بەشدارن.
ئەوەشی خستۆتەڕوو، تائێستا لە عێراقدا یاسایەکی تایبەت بە لە ناوبردنی بەکۆمەڵ نییە، ئەوەی هەیە یاسای دژەتیرۆر و تاوانەکانە، یەکێتی ئەوروپاش داوای لە عێراق کردووە ببێتە ئەندام لە دادگای لاهای و ناکرێت بەناوی سەروەرییەوە سوود لە دادگا نێودەوڵەتییەکان وەرنەگیرێت، بەڵام لایەنی عێراقی تێبینییان لەسەر ئەندامبوونەکە هەیە.
ناوبراو داواشی لە کۆمەڵگەی نێودەوڵەتی کردووە هەوڵەکانی هەرێمی کوردستان بە هەند وەربگرێت و لە پڕۆسەی هاوکارییەکانی عێراق هەرێمی کوردستان بەشی هەبێت.
هەر لە ڕاگەیەندراوەکەدا ئەوەشخراوەتەڕوو، حکومەتی هەرێم داوای هاوکاریکردنی ئۆفیسەکانی ڕزگارکردنی کوردانی ئێزدی کراوە کە تاوەکو ئێستا هیچ لایەنێکی نێودەوڵەتی هاوکاری و هەماهەنگی نەکردوون.[1]
10-10-2017