ئامادەکردنی: #زریان سەرچناری#
سلێمانی 2018
زێوەر
لە هیجرا
لە هیجرا ڕوو لە ساقی و شیشەیی صەبا نەکەم چ بکەم؟
وجوودم گەر بەفەرشی مەیکەدە و مینا نەکەم چ بکەم؟
لە ناو تۆفانی ئەفکارا نەهەنگی (لا الە) هەستێ
تەشەبوس گەر بە کەشتی نووحی (إلا الله) نەکەم چ بکەم؟
مەتاعی حوسنی ئه و مەحبوبە نەقدی داغ و سەودایە
لە بازاڕی مەحیببەتدا بە ڕۆح سەودا نەکەم چ بکەم؟
ئەوا مەحرومی خۆی کردم دڵی بردم دەری کردم
بە سۆزی دڵ هەموو دەم ڕوو لە قاپی خوا نەکەم چ بکەم؟
لە هەرلا زەبتی ناکەم موددەعی تا تۆ ڕەئیسم بی
بە قانوونی مرووەت گەر ڕەجا ئیجرا نەکەم چ بکەم؟
بە ڕوتبەی وەصڵی ئەو ناگەم ئەگەر عومرم هەموو دانێم
لە دەست ئه و زاڵمە لەم کارە ئیستغنا نەکەم چ بکەم؟
ئەڵێن ئەوراقی زوڵمی تۆ تەواو نابێ بە تەحریرات
وەکو (زێوەر) بە تەقریر گەر ئەدای مەعنا نەکەم چ بکەم؟
کەتۆ ڕۆیی
کەتۆ ڕۆیی بەجوز ناڵاندن و گریان زووبان چبکا؟
کە ئاهوو ڕەم بکا صەییاد بەجوز ناڵە و فوغان چبکا؟
لە سایەی عەسکەری موژگان و توڕڕەی زولفی شەوڕەنگی
نیگارم پادشای حوسنە، لە حاڵی عاشقان چبکا؟
ئەلا ئەی عاشقی بێ دڵ نیگارت میهرجۆ نابێ
لە قاپیدا عەبەس کەوتوی فەقیرە دەرگەوان چبکا؟
بەوەعزی و پەندی دانا مەردی نادان بەهرەوەر نابێ
کە بەخت و تالعی ڕەش بێ گەڕانی ئاسمان چبکا؟
لە هەرلا ئیتتیفاقێ بوو، ئەگەر کێوە عەدوو هیچە
کە پەششە ئیتیفاقی بوو ئەبێ فیلی دەمان چبکا؟
بە حوکمی حەق ڕەزا نابێ ئەبەد مەتڕود و مەحکومی
ئەلا ئەی نەفسی دوون شەیتان ئەبێ غەیری زیان چبکا؟
کە بەد خولقی تەبیعەت بێ بە میصقەل زەحمەتە لاچێ
لە دەست بوجەهل و ئەمسالی ڕەسولی ئینس و جن چبکا؟
لە دوری تۆ ڕەفیقان و هەموو دنیام لەلا مەحوە
کە فەسڵی گوڵ نەما، بولبول لە باغ و باغەبان چبکا؟
لە جیلوەی گوڵ لە نەشئەی مەی لە عەکسی تەلعەتی ساقی
کەدڵ ژەنگی غەمی تیابێ ئەبێ (زێوەر) لەوان چبکا؟[1]