داستانۊ شېخی سەنعانی
بەشۍ چوارەمە
شېخی سەنعان بە دیڎارو (تەرسا)ی گاۋرۍ شاڎ مەبۊن، وەردەمشەنە دەردەدڵیۍ وېش بەرمەوزۊن، باس جە عەشقی بۍ ئیرادەو وېش کەرۊن، کە یاونانش شەرارەی مەردەن، کە چەنی کابەی موبارەکش جیائاستەن و ڕوەش کەردېنە بتپەرەسی.
ڕۊخ ماڵا، نە خاک پیری ئەندوبار
واتش ئەی نازار، زینهار سەد زینهار
من شېخی سەنعان مەواچان نامم
ئەگەر قەبووڵ بۊ، بەندە فرمانم
پەی تۊ ئەراگېڵ دەورەی زەمانم
پەی تۊ خاکستەر، بووڵی بانانم
پەی تۊ بېزارم جە قەوم و خوېشان
وېم کەرد وەسەرگەرد ڕاگەی کەشیشان
پەی تۊ ویەردم جە کەعبەی شەریف
ئامام ئاستانەت، وە پای وېم زەریف
پەی تۊ شەو تا ڕۊ، شین و زاریمەن
پەرێ تۊ دایېم بېقەراریمەن
پەی تۊ نە جەرگم زوخاو سەرکەردەن
پەی تۊ وېم بەردەن شەرارەی مەردەن
یە چنڎێ وەختەن نەکەردەنم خاو
پەی تۊ دەروونم گڕ بەستەن بەتاو
پەی تۊ، جە گیانی شیرین ویەردم
نیگا کەر، بە ڕەنگ، ڕۊخساری زەردم
دەخیلم، ئەی ماه، شەمسی خاوەریی
ڕەحمێ بە سککەی سفیدیم کەری
بۊ، تۊ بە حاجەت، یانەی کلیسا
ببەخشم بە لوتف، ئەنفاسی عیسا
با ڕەحمێ خەیرت، ببۊ بە حاڵم
خەیلێوەن پەرێ دییەنت عەبداڵم.[1]