یانیهای نامە بە هووناو جەرگ
مەنووسۆم وە لای پۆست پڵەنگ بەرگ
نویسا ئازیز عەمۆزای دۆسم
شەریک مۆبەت، ئی جەرگ و پۆسم
نامەی گلەیی دڵگیریت یاوا
وانام و بۆسام وە دیدەم ساوا
تەبریک مەنزڵ بە تیر و تانە
کەردەبێت جە من، دۆس بێگانە
ئی مەنزڵ وە دڵ ڕەزای دڵ نەبی
وە مەرام دڵ من حاسڵ نەبی
یە زۆر فەرمان بابۆمەن ئارۆ
حەق جە باڵای سەر لێش هۆر نەدارۆ
پەنجەی چەنی غەیر تۆ کەرۆ بازی
قەتعش مەکەرۆم بە تێغ تازی
خیزاب غەیر پەی تۆ وە سیاقیر بۆ
وە گڵ نە ڕووی فەرق ئازیەتی گیر بۆ
قەسەم بەو خوا وێش تەنیا و فەردەن
من و تۆش جە هەم وا جودا کەردەن
شەرتم یەک شەرتەن وە بەین دروستم
وە مەیل و مۆبەت مەعشووقیت مەستم
خاترت جەم بۆ خەم بدەر وە باد
دنیام فەرامۆش هەر تۆمەن وە یاد
گەنج سەر بە مۆهر ساق و سڵامەت
مەبۆ بمانۆ تا ڕۆی قیامەت
هەر تا کە زیندەم مایەی ژینمی
قووەی بەسیرەت دنیا و دینمی
دمای مەردەنیش وە تەمای وەسڵم
چون مورغ مەفرووق مایل وە ئەسڵم
هەی ڕۆ نەواچی لەیل لێم غافڵەن
خۆ وێت مەزانی، دڵ ڕاش نە دڵەن
جە دووریت دایم زار و ڕەنجوورم
زایف و زەردەن جەمین بلوورم
وە گیانت قەسەم نزیکەن مەرگم
نێش نەومێدی گیرەن نە جەرگم
هەر تا نەوانان یاسین مەرگم
سفیدی کەفەن نەبیەن بە بەرگم
ڕەنگم ڕۆژ بە ڕۆژ چون خەزان زەردەن
وا مەدۆ پەنەم مزگانی مەردەن
زوو بەیۆ بە لام ئاخر دیدارەن
پەی دیدار لەقات دڵ ئینتیزارەن
جە داغ دەروون، جە ئێش و ئازار
مەشۆم وە مەیدان گوڵباغچەی گوڵزار
بەڵکە جەو گوڵزار بوینۆم لەقات
ئیتر جە عوقبا وادەی مەلاقات
ئامان سەد ئامان نەبۆ فەرامۆش
بە واتەی بەدان لەیل نەشۆت نە هۆش
من ئەو وەفادار عالی گەوهەرم
بێ پەروا جە خۆف باب و شەوهەرم
غەیر جە دیدەنی دووراودوور وە چەم
ئیبن سەلامم نەدیەن خاترجەم
چون زەمین تینوو وە باران غەیس
لەیل عامیری هەوادار قەیس
نامەش دا بە دەست قاسید بی ڕاهی
بەردش وە لای قەیس بە خاترخواهی
ئەو نامەش وانا سەر تا وە دامان
نیا وە ڕووی دڵ پەی شەفای زامان
#خانای قوبادی# [1]