باخچێوە بېگەرد
نویستەی: میرزا ئۆلقاڎرو پاوەی
بەشۍ: سی و ششەمە

میرزا ئۆلقاڎرو پاوەی باس چا ساتەوەختا کەرۊن، هەکە جوبرەئیل ئاما پەی لاو حەزرەتو(نووح)ی و هەواڵو لافاوە گەورەکەیش دا پەنە، دماتەر دارێ جە دارەکاو بەهەشتیش ئارد پەی حەزرەتو نووحی و ماچۊ بنیەش نە خاک، با پەی پەی باڵاکەرۊن و دمایی بڕدېشۆو موورۍ دارەکەی باردېرە پەی تەختا، چا تەختا کەشتیێ درووسکەردۍ پەی ڕزگار کەردەی ئەهلەکەیت:
وات، تەوفی تۊفان، مەجمەعەی ئاوان
واڎەی دووریش، ها، وە نزیک یاوان
هەنیی چېش واچوون، نزییک، تا وە دوور
حەقق وېش فەرماوان، وە فاروتتەننور
یەک تووڵە ساج باغی بەهەشتی
ئاوەردم، پەرێ، ئەسبابی کەشتی
مەسروور بیی، جە وەصی، پادشای جەلیل
نووح بە ئیشارە، ئەخی جوبرەئیل
تووڵە ساج بەردش، نیشاناش وە خاک
سەبز بی جە قودرەت، حەیی تەنیای تاک
هەفتە، دوو هەفتە، جە مابەین، ویەرد
تووڵەساج، جە خاک ڕیشەش مەحکەم کەرد
جەو دما، کەمکەم، بوڵند بیی باڵاش
سەیوان کەرد، ئەو ساج، کاکۊڵی ئاڵاش
پەی پەی، پەیا پەی، ئەو مەکەرد نۊشش
دایېم جوبرەئیل، مەکېشا گۊشش
جە کوورەی ئەفلاک، سەرخامش ویەرد
وە بورجی میزان، وېش مەقابل کەرد
قەد و قامەتش، مەکەرد بۍ خیلاف
قایېمتەر جە قەد، بەرزی قوولەی قاف
غەرەز تا بیست ساڵ، باڵاش هەر ویەرد
ڕۊ جە ڕۊ فېشتەر، هەر کەشش مەکەرد
خەبەر دا بە نووح، وات: بە مەودای تېخ
ئەلعان داری ساج، پەیکەران، جە بېخ
حەسەبلئەمر، پادشای فەردەن
دارش، پەی کەشتیی، ئافەرید کەردەن
شەقشەق، بکەرە، بۍ زیاڎ و کەم
پەی تەختەی کەشتیی، ئەولادی ئاڎەم
ببۊ وە کەشتی، چوون ڕەوانی ڕۊح
پەی تایفەی پاکی، ئەهلی بەیتی نۊح.[1]