Koordînasyona Kongra Star li Ewropayê diyar kir ku lidarxistina 2`yemîn Konferansa Jinan a Navneteweyî pêwîstiyeke demê bû û got: “Felsefeya jiyana azad em anîn cem hev. Me yekitiya jinên cîhanê di konferansê de dît. Divê em felsefeya Jin, Jiyan, Azadî bi jiyanê, civakê û xwezayê re bikin yek.”
Di 5 û 6`ê Mijdarê de li paytexta Almanya Berlînê 2`yemîn Konferansa Jinan a Navneteweyî ji aliyê Tevna Jin Siberojê Dihûnin ve hat lidarxistin. Ji çar hêlên cîhanê, bi sedan jin bi cil û bergên xwe yên neteweyî di bin dirûşma “Şoreşa me; Azadkirina Jiyanê” de hatin cem hev.
Koordînasyona Kongra Star li Ewropayê Rojîn Remo ku beşdarî konferansê bûbû, di bernameya taybet a ajansa me de qala girîngiya konferasnê kir.
Rojîn Remo lidarxistina konferansê li tevahî jinên kekdar, jinên şoreşger û li Rêber Apo pîroz kir û diyar kir ku lidarxistina konferasnê di vê demê de ku li Rojhilata Kurdistanê şoreşa jinan li dar e û Şerê Cîhanê yê Sêyemîn tê meşandin, xwedî girîngiyeke dîrokî û ya demê ya gelekî bi qîmet û hêja bû.

'ŞOREŞEKE JINAN A CÎHANÎ LI DAR E'
Ji 41 welatên cîhanê jin beşdarî konferasnê bûbûn. Li ser vê yekê Rojîn dibêje: “Her jinek bi rengê xwe, bi dengê xwe, bi îradeya xwe li wir bû. Dema êş û azarên ku ji sîtsemên desthilatdar kişandine dianîne ziman, kîna mirov li hember wan sîsteman hîn zêdetir dibû û daxwazên azadiyê di hundirê her jinekê de bilindtir dibûn. Bi xwe re hêzeke jinan a hevbeş derdixist. Ji Hindistan, Somalya, Yemenê, ji tevahî welatên Ewropayê û ji her cihekî jin kom bûbûn û nêrînên xwe pêşkêş dikirin. Di nîqaşan de hat xuyakirin ku şoreşeke jinan a cîhanî li dar e û êdî jin bi dirûşma 'Jin, Jiyan, Azadî' li hemû kolanan li ber xwe didin û bi vê dirûşmê ji bo mafê xwe têdikoşin.”
'JI BO JINAN PÊWÎSTIYEKE DEMÊ BÛ'
Rojîn destnîşan kir ku her çiqasî çand û olên her jinekê ji hev cuda bin, lê belê pirsgirêkên wan yên hevbeş hene û ji bo azadiyê, ji bo sekinadina li hember sîstemên desthilatdar ên baviksalar êş û azarên wan yek in, armanca wan yek e, di têkoşînê de jî xalên hevbeş wan tînin cem hev û wiha pê de çû: “Konferans pir rengîn bû, gelek ziman hebûn, gelek çandên rengîn hebûn. Bernameya konferansê jî gelek rengîn bû. Tê de atolya, beşê mûzîk, perwerde bi rengê panel û nêrîn parvekirin jî hebû. Bi xwe re di hundir hola konferansê de coş û heycanek pir mezin da avakirin. Bawer im ev coş û ev heyecan wê bigihêje tevahî jinan û di vê dema ewqasî girîng de wê rolekê bide avakirin. Lidarxistina vê konferasnê tiştekî hevbeş bû ku me anî cem hev. Ji bo jinan pêwîstiyeke demê bû.”
Rojîn Remo di axaftina xwe de bal kişand ser têkoşîna jinên Kurd li hember zihniyeta êrişkar a li dijî jinan û got: “Li Rojhilatê Kurdistanê Jîna, li Silêmaniyê Nagîhan û li Rojava Zeyneb Saroxan, zihniyeta êrişkar yek e. Li welatê me êrişî jinan dikin, em vê rastiyê bi tevahî cîhanê didin naskirin. Em têkoşîna vê dikin û em soza tolhildana van jinan didin. Wek jinên Kurd em ji her demê xurttir in, tu têkoşîna wekî têkoşîna jina Kurd xwedî hêz, parastin, îdeolojî û xwedî felsefeyeke azadiyê tune ye. Îro tevahî jin ji vê sûd werdigirin. Li konferasnê jî mohra xwe lê da.”

'FELSEFEYA JIYANA AZAD EM ANÎN CEM HEV'
Rojîn diyar kir ku 'Jin, Jiyan, Azadî' felsefeyeke û wiha dirêjî da axaftina xwe: “Rêber Apo ev felsefe pêşkêşî tevahî jinan kiriye û yên ku di serî de têkoşîna vê kirin jinên Kurd in, yên ku hiştiye ev deng li tevahî cîhanê jî belav bibe jinên Kurd in. Ji 41 welatan tiştên ku jin anîne cem hev felsefeya jiyana azad e, felsefeya ku êdî jin nema serê xwe ji koletiyê re ditewîne ye.”

TÊKOŞÎNA JINÊN KURD ROJEVEKE SEREKE YA KONFERANSÊ BÛ
Koordînasyona Kongra Star li Ewropayê Rojîn Remo daxuyand ku amadekariya konferasnê di asteke mezin de li ser milê jinên Kurd hat meşandin û wiha domand: “Ev ji bo me cihê serbilindiyê ye. Ev encama keda hevalên me ye, yên ku ji bo azadiyê her tişt feda kirin. Di konferansê de beşekî sereke jî jinên Kurd bûn, şoreşa, berxwedan, têkoşîn û xweparastina jinên Kurd bû. Jineolojî jî bi berfirehî hat nîqaşkirin. Ev encama şoreşa jin bû ku demeke dirêj ked û qehremaniya herî mezin ku di cîhanê de kirin. Li çiyayê Kurdistanê eger îro dijmin bi hovîtiyeke mezin êriş dike û çekên qedexekirî li ser gerîlayên Kurd, li ser jinên Kurd bi kar tîne, ev encama binkeftina van hêzên desthilatdar e. Ev yek di konferasnê de gelek hat nîqaşkirin, pêwîstî hat dîtin ku tevahî jin vê rastiyê bibînin û li hember wê xwedî helwest bin.”
Rojîn daxuyand ku dema rewşa jinên Kurd û rêxistina jina Kurd dihat şîrovekirin, bi xwe re coşeke pir cuda dida avakirin, germbûn û girêdaneke pir cuda di çavên jinan de xuya dikir û wiha pê de çû: “Di slogan û dengê wan re xuya dikir. Şoreşa jin, xweparastina wê, li hember DAIŞ`ê şerkirina jina Kurd ya ji bo parastina tevahî mirovahiyê, nîşaneyên serkeftinê, nîşaneyên dîrokî bûn. Her kesî ev rastî didît, her kesî jê hêz û moralekî pir cuda digirt. Her kesî xwest xwedî lê derkeve.”

'EM FELSEFEYA JIN, JIYAN, AZADÎ BI JIYANÊ RE BIKIN YEK'
Têkildarî erkên demê yên dikevin ser milên jinan, Rojîn ev tişt anîn ziman: “Yek ji sedemên hatina me ya cem hev, hêza ku şoreşa jinan li tevahî cîhanê xurt bibe û vê şoreşê bi pêş bixe ye. Dirûşma 'Jin, Jiyan, Azadî' felsefeya jiyana azad e, felsefeya jinên azad e. Divê em li her cihî serê xwe rakin û şoreşa xwe ya jinan xurt bikin da ku em jiyaneke azad ava bikin. Divê em têkoşîneke xurt li hember van sîstemên deshilatdar bimeşînin. Mîna van konferansan ne her çar salan carekê, divê leztir em werin cem hev du. Divê li her derê em felsefeya Jin, Jiyan, Azadî bi jiyanê re bikin yek, bi xwezayê re, bi civakê re bikin yek. Em xwe xurt bikin, giranî bidin ser parastina xwe. Wê jin bi îradeya xwe bi ser bikeve.”

'EM JI HER DEMÊ ZÊDETIR NÊZÎ AZADIYÊ NE'
Koordînasyona Kongra Star li Ewropayê Rojîn Remo di dawiya axaftina xwe de ev peyam da jinan: “Em bi hêvî ne ku tevahî jinên cîhanê li felsefeya azadiyê, li felsefeya 'Jin, Jiyan, Azadî' xwedî derkevin, da ku em karibin di warê jiyanî de pêk bînin. Bi taybet jinên Kurd ji her kesî zêdetir divê li vê felsefeyê xwedî derkevin, li azadiya xwe û li azadiya Rêber Apo wedî derkevin. Yên ku ji bo vê felsefeya jiyana azad herî zêde xwîna daye, şehîd dane, jinên Kurd in. Wêneyên Nagîhan Akarsel, Jîna Emînî, Zeyneb Saroxan, Jiyan Tolhildan yên di hola konferansê de nîşaneya vê bûn. Bi îradeya jina azad dê civaka azad çêbibe, gavên li ser xaka me hatine avêtin dê li tevahî cîhanê jî bên avêtin. Em ji her demê zêdetir nêzî azadiyê ne. Me yekitiya jinên cîhanê bi çavê xwe di vê konferansê de dît. Bi baweriyeke hîn mezintir, ji her demê zêdetir em ê têkoşîna xwe xurt bikin.”[1]