باخچێوە بېگەرد
نویستەی: میرزا ئۆلقاڎرو پاوەی
بەشۍ: حەفتا و یەکەمە

میرزا ئۆلقاڎرو پاوەی، باس جە بارو ژیوای تایەفەو قوڕەیشی کەرۊن، هەکە وەڵتەر خەریکۍ بت و بتخانەی، عەیش و نۊشۍ بېنۍ، بەڵام بە ئامای محەمەدی (ص) ، بازارشان پېچیاوە، بت و بتخانېشا مەڕیێ و ۋڕێ، شەراب و خەمرشان چەنە حەرام کریا:
تایەفەی قوڕەیش، ئەز کینە کېشان
شین وە زیارەت، بتخانەی وېشان
نە بتخانە، نۊش و عەیش، مەکەردەن
تەعام و شەراب، شەربەت، مەوەردەن
عیدی ئەو، جە نۊ، مەولوودی خاتەم
ئەتفاق، ئەو شووهەر، دوور کەفت وە هەم
دیشان یەکایەک، سەرنگوون بییەن
هیچ کام، چوون، جاران، بەرقەرار، نېیەن
هەرکام، نە جای وېش، کەفتەن، نە ڕووی خاک
لېش واران غوبار، سیای سەهمناک
قەبیلەی قوڕەیش، سەراسیمە وار
گرد، وە ئاهی سەرد، حەیران بین جە کار
یەکیەک، نیشانان، هەم، وە بانی تەخت
بتان، جە ڕووی خاک، هۊرگېرتەن، وە جەخت
غەرەز، تا سێ جار، وەی حاڵ، پەرېشان
بتان، هەم نیان، وە جاگەی، وېشان
نگوون بین، سێ جار، نە ڕووی خاک و خەم
ئەسرین چوون سەیلات، مەڕېزان، نە چەم
تایفەی قوڕەیش، وە شین و زاریی
عیدشان، گېڵا، وە دەردی کاریی
واتشان: سەوگەند وە ڕوتبەی بتان
سا، ئاخر، یە چېش، قۊمیان، لېشان
یەک بتی عەزیم، ئەعلای ئەوان، بۍ
جە لاشان، مەعبوود، باقی بتان، بۍ
شەیتان شیی، نە تۊی، ئەوچۊی، سەندەل تەرز
ئاما، وە جواب، وە ئاوازی، بەرز
وات: ئەی موعاشەر، نېیەن، ئاگاتان
خراب بیی مەسکەن، بتخانە و جاتان
ئېشەو محەمەد، مەحموودی موختار
موستەفای مورسەل، حەبیبی، نازدار
تەوەللود بییەن، جە واڎەیی، وېش
ئامان، وە دنیا، بۍ خەوف و ئەندېش
نە عەیش مەمانۊ، نە هەواو هەوەس
نە بت مەمانۊ، نە بتخانەی کەس
گرد مەبۊ باتڵ، وەی وە یانەم وەی
تەرک، مەبۊ بازار، نۊشانۊشی، مەی
چونکوم، پېخامبەر، ئاخر زەمانەن
ناسخ و مەنسووخ، باقی، ئەدیانەن.[1]