ئەنجوومەنا ئاساییشا هەرێما کوردستانێ، زانیاریێن زێدەتر ل سەر کەتنا هەلیکۆپتەرا شەڤا 15/16ێ ئادارێ ل پارێزگەها دهۆکێ بەلاڤ دکەت.
دەزگەها دژەتەرۆرا کوردستانێ راگهاند، شەڤا 15 ئادارا 2023ێ هەلیکۆپتەرەک ل نێزیکی گوندێ بێرکیات یێ ناڤچەیا چەمانکێ یا سەر ب پارێزگەها دهۆکێ ڤە کەت خوارێ و د ئەنجامێ دە هەموو کەسێن تێدا جانێ خوە ژ دەست دانە کو ئەو ژی سەر ب پەکەکێ ڤەنە.
رۆژا 17ێ ئادارێ ژی هەسەدێ د داخویانیەکێ دا راگهاند کو دو هەلیکۆپتەر کەتنە خوارێ و 9 کەسێن سەر ب هەسەدێ ڤە تێدا هاتنە کوشتن. لێ ئەنجومەنا ئاسایشا هەرێما کوردستانێ هەتا نها کەتنا هەلیکۆپتەرکێ و جانژدەستدانا 7 کەسان پشتراست دکەت.
ئەنجومەنا ئاسایشا هەرێما کوردستانێ راگهاند، ئەو هەلیکۆپتەر بێی ئاگاهدارکرنا سازیێن فەرمی یێن هەرێمێ د ناڤبەرا رۆژئاڤایێ کوردستانێ و سلێمانیێ دا فرین کری یە.
ل گۆری ئەنجومەنا ئاسایشا هەرێما کوردستانێ، ئەو هەلیکۆپتەر ل چەند بارەگەهێن پارێزگەها سلێمانیێ داکەتنە و بەر ب رۆژئاڤایێ کوردستانێ ڤە فرینە.
ئاماژە ب وێ یەکێ ژی کر، ئالیەک ل سلێمانیێ ب ئاوایەکی نهێنی و نەفەرمی پەیوەندیێن هەسەدێ و پەکەکێ هێسان کرنە و ب ئاوایێن جودا ئالیکارییا وان کری یە.
حکوومەتا هەرێما کوردستانێ بانگ ل هێزێن هەڤپەیمانان و حکوومەتا فەدەرال کر کو ئەشکەرە بکەن کو ئەڤ هەلیکۆپتەر ب کیژان دەستوورێ ل سەر خاکا هەرێما کوردستانێ دفرن و کی بەرپرسێ ڤان کریارێن نەیاسایی یە.[1]