#بېسارانی#
ڕېحانی بېگەرد، ڕېحانی بېگەرد
ڕېحانی پەل دېز قەترانی بېگەرد
مەزانی بە وېت وەختی خۆرە زەرد
مەبۊت وە مېمان، زڵېخای هامدەرد
هۊرگېردت نە خاک، کەفتەی ڕۇی زەمین
مەپېچۊت بە چین کڵافەی موشکین
وېنەی زوڵفی وېش پېچنۊت بە دەستە
بۊ مەنیۊنە بۊت چۇن ئاوات وەستە
درېغا بدیات نە ڕۇی سەرزەمین
مەپېچای نە چین کڵافەی موشکین
ڕېحان بەشقی حەق چېوی پەرسۇ لێت
بۊی لەیل وەشتەرەن، یا بۊی بەرگی وېت؟
ڕېحان وات جە من چۇن پەرسات هەواڵ
بە دانای داوەر بەرزی بېمیساڵ
بەو شا بېگەردەن، نەزا و نەمەردەن
منشان جە ئەزرەت زوڵفی لەیل کەردەن
[1]