شیرینی دۊسان..
جە لاو میرزا ئۆلقاڎریۆ، شیرینی و دیاری و سەوقاتی یاران، تەنیا دۊعاو سڵام و نامەو هەواڵ پەرسایەن، دیاری مادی نېیەن، شیرینی شاران نېیەن، بەڵکم نامەو یاران، هەواڵ پەرسیشان، هەم سەوقاتی و هەم شیرینییەن.
میرزا ناهەقش نېیەن، چوونکم وەڵۍ ئاڎییچی مەولەوی پاسەش فەرماوان: وەختێ یار دوورەن، سەوقاتی چ سوودێش هەن؟.
قادریچ چەنی یارەکېش دنیاش وە کارەن، بە بۍ ئاڎۍ ژیوایش چوون ژاری مارەن، چوونکم تۊتۊی دەروونش گەر بگېڵۍ، بېغەیر نیگارو نازدارېش هیچش نېیەن چەنە.
شیرینی دۊسان دۊعا و سەڵامەن
سەوقاتی یاران نامە و پەیامەن
شیرەی موحببەت مابەین یاران
وەشتەرەن جە تام شیرینی شاران
نوقڵ و شیرینیم نەقڵ نامەی تۊن
هەدیە و بەراتم ڕېزەی خامەی تۊن
باقی تەعاروف ڕەسمی زیادەن
ئیسرافی مەعرووف لوقمەی بېدادەن
فەرموودەی مەعدووم سەرای خاک ماوان
دەک وە ڕەحمەت بۊ، چ خاس فەرماوان
«دەروون وە مەودای دووریت بیەن ڕېش
هەی خاکم وە سەر سەوقاتم پەی چېش»
من هەر تۊم هەنی نەک واچی تۊم بۊ
تۊم بۊ چەنی عام نیەن چەنی تۊ
سا تۊ بۊ دیڎەم بېپەروا و بۍ خەم
تۊ، تۊتۊی جەرگم جیا کەر جە هەم
جا تۊتۊی دەروون بگېڵە پېشدا
ئەر تۊ دیت تۊیە غەیر جە تۊ تېشدا
تووخوڎا وېت ئاسا باوەرەش وە بەر
وە مەودای موژگان پارەپارەش کەر
(قاڎر) چەنی تۊ دنیاش وە کارەن
بۍ تۊ زیندەگیش چوون ژار مارەن.[1]