جوابەنامێوە میرزا ئۆلقاڎرو پاوەی پەی میرزا عەبدوڵڵای پاوەی (مەحرووم) ، باس جە نامەکۍ مەحروومی شاعېر و ڕەفیقیش کەرۊن، کە چەنی بە یاوایش بۊسانش، بیېنە بە مەڵهەمێ پەی زامانی کاریش، ماچۊ: ڕفېقی من و تۊ تازە نېیەن، بېیەن هەر بېیەن.
میرزام نامەکەی
میرزام نامەکەی پەڕ لە ڕەمزەکەت
سفتە دووی دووری دۊزەخ پەزەکەت
تەحریری خامەی خۊش ڕەفتارەکەت
تەقریر دڵگیر شەکەر بارەکەت
یاوا وە سەر وەخت دڵ زوخاڵەکەت
ئاوا کەرد یانەی وېران ماڵەکەت
سەیقەڵ دا وە جام ئاینەی زەینم
ڕۊشن کەردەوە بینایی عەینم
ئافەرین دڵ‌سۊز، دڵ‌جە مەوبەت کەیل
هەر پاسە مەبۊ شەرت و وەفا و مەیل
زاهیرەن ئیزهار لوتفت کەردەبۍ
پرژەت نە پەڕەی کاغەز بەردەبۍ
تەواسام جە دەرد بۊسام جە شاڎیی
ڕۊم بی وە ڕۊی عەید گەردەن ئازاڎیی
مەیل من وە تۊ تازەگی نېیەن
مەبۊ تا مەبۊ بېیەن هەر بېیەن
هەرچن ۋجوودت دوورەن جە مەنزڵ
دڵ پەی پەی مەڎۊ گەواهی جە دڵ
فەڵەک جە ناکا کەڵەک کەرد هەوەس
تۊ کېشا ئەو توون، من بەرد ئەو تەوەس
وە مەرگت یەن زام هیجر تۊ وەردم
جەو دەمدا شېویا قافیەی فەردم
وەشڵەی وە تاڵی وەردەی هەر جاران
سپای زووخاوت جە ڕۊزگاران
گاهێ تۈ مەدای کەم کەم دڵداری
پۊشانم وە تەن جە بوردەباری
سەڎ ڕەحمەت ئەو قەبر فیراق یاران
(قاڎر) پەی (مەحروم) شای وەفاداران
وەس نەبی دوور بیم جە شین و زاری
وەسیەن خار نای زامانی کاری
هەر من بیم تا سەر مەندەی هەواران
وەختەن باوەرۊ قەدەم چوون جاران
خەریکم چەنی مەردم ئازاری
نمەز تۊ تاکەی ئەسرین مەواری
نەزارەن مەنزڵسەرای مەزاران
سیا زوخاڵەن جە ڕۊزگاران
کافیەن خەیاڵ جە شەوبېداری
پۊشانم وەتەن جە بوردەباری.[1]