خوڎا جە سوڵتان مەحمووڎی گۆرەتەرا.

گېڵناوە: سوڵتان مەحمووڎ دڵش مشۊ ژەنەو نەجاری و گنۊ فکروو ئانەیە بە هەر فېڵ و تەڵەکێوە بېیەن، نەجارەکەی فۊتنۊ و ژەنەکېش بەرۊ پەی وېش!!
پېیا کیانۊ شۊنەو نەجارەی و ماراش پەی لایش.
سوڵتان ماچۊ: دیارا تۊ نەجارێوی ژیر و قابلەنی، من گەرەکمەن بە مودەو دوۍ ڕوا پیایە چۊیینم پەی وەش کەری و گېیانیچش وزیەنە!!!
نەجارەکە پەشوکیۊ و ماچۊ: ئاخر قوربان ئی هەرمانۍ کەی بە من کریۊ، چېشت جە من گەرەکا، گوناو من چېشەن؟ پیاوەتی کەرە وازم چنە بارە.
سوڵتان ماچۊ: بېدەنگ بە، بەهانۍ نمەگېرە، ئەر تاکو سەرو واڎەکەی ئی هەرمانۍ نەکەری، مەحکوومەنی بە قەنارەی و حەتمەن هیچ ڕېوە تەرەت نېیەنە.!
نەجارەکە بە دڵ سەردیۆ ملۊوە پەی یانەی و فرە پەشېو و ناڕەحەت بۊ، ژەنەکېش ماچۊ: ئەرۍ پېیاکە چېشتا، چېش قۊمیان، ئانە چی ئاڼە پەشېوەنی؟
نەجار ماچۊ: وەڵڵا ئینە حاڵ و ئینە حەکایەت، سوڵتان بەهانېم وەنە گېرۊ و نمەزانۇو چېشش چنە گەرەکەنا؟
ژەنەکۍ ماچۊ: دەی پېیاکە مەنیشەرە، هۊرزە دەس کەرە بە هەرمانەکۍ، لانی کەم پەیکەرەکەی وەش کەرە.
نەجار ماچۊ: دەی ئانا پەیکەرەکەم وەش کەرد، ئەی چەنی گېیانش وزوەنە!
هیچ نمەکەروو و منیشوو دیارو ڕەحموو خوڎایۆ، ئا وەختە ماچۊ: خوڎا جە سوڵتان مەحمووڎی گۆرەتەرا.
ئاخر شەوەو واڎەکەی، نەجار و ژەنەکېش فرە ناڕەحەتۍ و پەشېوۍ بېنۍ، ژەنەکۍ هەم دیسان ماچۊ: دەی پېیاکە بەشکەم وېت خجڵنی هەرمانەکېوە و بۍ هەرمان مەنیشەرە.
نەجار هەم دیسان قسەکېش ئەواخوا کەردۆو ماچۊ: خوڎا جە سوڵتان مەحمووڎی گۆرەتەرا.
سەوای تلۊع، تەقە دریا بەرەو یانەو نەجاری، ژەنەو نەجارەکەی پەشۊکیاو ماچۊ: ئەرۍ وەڵڵا ئانا پېیاو سوڵتانی ئامان بەرۊت پەی قەنارەی، هەردوېشا بە تەرس و لەرزۆ لوێ بەرەشا کەردۆ، مڎیا پیاو سوڵتانیا و ماچۊ: کاکەی نەجارم گەرەکەن.
ژەنەکۍ فرە تەرساو ماچۊ: پەی چېشیت گەرەکەن؟
پېیاکە ماچۊ: مەتەرسە! هیچ نېیا، سوڵتان مەردەن و گەرەکما تابووتێ عالش پەی تاشۊ و زوو بېیاونۊش پنە!
نەجار ئیمان و شاڎەتش ئاوەردو بە ژەنەکېش ماچۊ: دەی نەواتم خوڎا جە سوڵتان مەحمووڎی گۆرەتەرا.[1]