مەتیلۍ یام دکتور
نویستەی: #هەورامان ڕۆستەمی#
پاسە گېڵناوە، ئۊسا هەرکەس سەرەش یام دلێ لەمش زامڎار بېیەیا، بەتایبەت ئانێ کە جە بەرزیگایەنە کەوتێ بێنېرە وار و حاڵشا خراب بېیەیا، واچېنێ هێڵەڕوەنەش پەی وەش کەردێ و دەیدێش پنە.ئەر هۆرش ئاردەیاوە و قەی پەرۆشش کەردەیا، ئانە حاڵش فرە خراب بۍ و مشېیەیا تەکبیرێوشا کەردەیا. ئێتر یا بەرێنېش پەی لا حەکیمی و دۆکترە وېمانەکا، یام ئەر تاوەیاشا و مەجاڵشا بېیەیا بەرێنېش پەی شاریوی کە دۆکترش چنە بېیەیا. ئیتر یا بڕوو یاگەکێ کەرۍ یام خوانەخاسە دلێ ڕەیەنە تەمام کەرۍ و سەرد بێوە.
ساڵێوە کابرەیو کەوتەبێرە و سەرەش زامار بیەبێ و داواو دلێ لەمېچش کەرۍ و ئەوە ئانەیە شیێ کە پرووکیابۆ، ئاردشاوە سەرو بانە گەورەی و خەڵک جەم بیەبێ دەورش و واتشا با هێڵەڕوەنەش دەیمێ و بزانمێ چېش قومیۆ!
کیاستشا دوێ، یەرێ یانە هامسای چاوەختە شەمسوو کابرای، هێڵېشا نەبېنێ و خۊ پېسە ئیسەیە دووکان و بازاریچ نەبۍ تاکو چاگە بارا.ئا کابرا کە کیاستەبېشا شۆنەو هێڵەکارە، وەروو وېشەرە واتش با بلوو یانەو مەتی فڵانەکەسێ بزانوو هەنېش؟
وەختێو ملۆ خزمەتوو مەتیلەکێ و داواو هێڵا کەرۊ پەی فڵانەکەسی کە کەوتەنەرە و ئینا سەرو بانە گەورەیەوە و ماتڵوو هێڵەڕوەنێن، مەتیلەکێ ماچۊ:
ڕۊڵە وەڵڵا شکە مەبەروو، دەی بنیشدێ با کەرگەکێ هێڵۍ کەرا!
ئیجا ئی داستانێمە پەوکەی گېڵناوە، ئیسەیچ کابرا نەوەش گنۆ و گەرەکشا بلۆ لاو دۆکتری و حاڵش فرە خرابا ماچۊ:
نۆبەت پەی منیۊرە پەی دوێ مانگا تەری!
ئیجا ئەر مەنوو تاکو دوێ مانگێتەر، ئێتر دۆکترم پەی چېشی؟هەرچی مڎیەو قسەکێ مەتیلەکێرە و هێنەو دۆکترەکەیەرە، هێنەکێ مەتیلەکێ هەڵای وەشتەرەنە وئاوەزگېرۆش، چوون کەرگەکێ فرە ماتڵت کەرۊ، ئاخرش تاکو ساحبێو ماتڵت کەرۊ و ئێتر هێڵەت پەی کەرۊ، بەڵام دۆکترەکێ ئېمە دوێ، یەرێ مانگێ ماتڵت کەرا.
ئیسە، قسەکێ کامیشا بەدڵتانە؟مەتیلێ یام دۆکتر؟[1]