قۊناغەو هەرزەکاریم
بەشۍ: پەنجەمە
هەرچن یانەو برایەکام وېشا بە ساحیب یانە نەزانېنۍ، بەڵام هەر ئیحساسو بی تەکلیفیو سەرباریی کەرېنۍ. ئاما سەرەمۆری سەفەرو خارجی کەرو، چاوەختەنە خەلک بە تەزویرو چېو سەفەر کەرېنۍ، خەبەرم کیاست پیایانە قۆمېوی عالما پاسپورتەکەو وېش پەی کیاستانۍ، بەڵام ئەنحاو ڕەسم فاڕاکەیەنە پاسپورتەکەشا خرابنابۍ، ئیتر کەڵکو بەکار ئاردێچ نەبۍ، نەیارایچم بە خرابی کیانوشۆ پەی ساحیبەکەیش، نەوەکو ڕانە گېریۊو تووشو گرفتێ بۊن، مەجبور دلېمەنە بەرد، بەڵام حەتتا مەنەنا حەر مەمنوونو ئا پیاوەتیە عالەیشەنا. منیچ داخۍ پاسپورتەیو بۍ تەکلیفی وېمەنە زیاتەر ناڕەحەت بېنۍ، ئڼەش پەنە نەشی عەفواتێ دریا، بە نائومیڎانە وېم کەردۆ عێراقەرە.
عەسکەری کەردەی خەبەرېوش نەبۍ، بەتاڵو حەتاڵ بېنۍ، ڕەفېقېم گرد پەرەم پەرەمۍ بیېبینۍ و نیمەشا ئێران بېنېو نیمەشا زانکۆکانەو بەعزېویچ عەسکەری و باقیچشا ئەهلو مزگی بېنۍ. ڕوێشا تاکو وېرەگا چەنی مام کەریمو مام ڕەحمانی و کاک قاڎری زەمایما کە هامسێچما بېنۍ تاوڵە کەرېنمۍ یان کتېبۍ وانېنېوە. جارجارێچ چەنی مەرحوم موساو حاجی ڕەشەیچ دومینە کەرېنمۍ.
هامنو (1983ز) دوەبارە چڕیانېشاوە پەی عەسکەری، من کە یەرۍ چوار ساڵۍ گولانەتەرشا نویستەبېنۍ، بېیانۍ هام عمرو وە شەریکە عەسکەری سەعدوڵڵاو مامۊ حەمەی، وە یۊ جە کوڕەکا حاجی محمد باموکی، مەزانو کامشا بۍ، ئڼە مزانو دوڵەمەن بۍ، سەیارېوی توېتای کەوەش بۍ.
هۆلېر دوۍ یەرۍ حەفتی عەسکەرۍ بېنمۍ، عال ویرما هامنو (1983ز) بۍ، ڕوێشا ئامانۍ پەی بازاری، دیم مەنشەئە دماو مەنشەئەی کە جە ژمارە نەیینۍ، پەڕۍ بېنۍ جامەڎانە سوورۍ بەرزانیۍ. منیچ ئاما خېیاڵمۆری کە پاسی مەنشەئی عادەتەن پەی سەفرەو سیاحەتی بەکار ئەیینۍ! سواریشا فرە گران بۍ، تۊ واچی سەدام پەی قینیاو زارۊڵاو مەڵڵا مسەفای خزمەتو ئی بەرزانیا کەرۊ یام پېسە چېوېوی خەریکنۊشا بە سێران و سەفاوە، وەیان نمەکگیرېشا کەرۊ، کە هیچ نەبۊ لایەنگیری و هامکاری حەرەکەو پارتی و بەرزانی نەکەرا. کەچی بە داخۆ ئانە سێرانو مەرگو (8000) پیا بەرزانیەکا بەرشی، یۊ چانیشاچە جارېوتەر خاکو کوردستانیشا نەڎیۆ.
دماو یەرۍ حەفتا یان چواری عال ویرم نیا، تەسرېحېشا کەردیمۍ، چوونکوم سەدام ئیتر ئیعتیمادش بە کوردی نەبۍ بەتایبە خەڵکو قەزاو هەڵەبجەی عەسکەریش پەی کەرۊ.
ڕەفیقۍ فرە نزیکېم دوەبارە مام کەریمو کاک قاڎر بۍ، جارجارێچ سەردانو زارۊڵا خاڵۆ حەمەمین بەگو ئاواو ڕوسەم بەگی کەرېنۍ، چەنی کاک حسێن جافی و کاک ئاراسی برایش، حاجی ئاسۆو مام بارامی وەختانیوی وەش بە گاڵتەو گەپ بەرېنمۍ سەر، مەتی خاتوو مەلی ئەڎاشا کەرۍ قۆمەو تاتێم. دوکتور سەباحیچ جار جار ئێوە یەکتری وینېنمۍ، پېوەرە کتېبی وانېنمېوە، مەناقەشەو کۊمۆنیزمی و ئیدیۆلۆژیاو چەپی کەرېنمۍ.
ڕوێشا مام کەریم کە موەزەفو بەلەدیەو سیروانی بۍ، ماچو مژدېوی وەشم پەنەن، واتم چېشا؟
ماچۊ بەلەدیەو سیروانی موەزەفېوشا پەنەۋازا، بوۊ تەقدیمش کەرە، وۑچم کومەکیت کەرو. منیچ وەشیېنە قاچېم ئەرە زەمین نەگنېنۍ. وېش عەریزەکەش پەی نویستاو سەوایشۆ تەقدیمم کەردو بەردم پەی بەلەدیاتو سلێمانی موافەقەتیم ئاردۆ، دماتەر کیاستانېشا پەی لاو ڕەئیسو منەزەمەو بەعسی کە هەمان حۆشەنە بۍ، کابرێوی فرە عال بۍ، بە ئیبنی ئیبنی قسېم چەنی کەرۍ. (دمایی بەرکۆت، کە کەسېوی شیعە بېیەنو چیرەنە چەنی دەعوەی ئیسلامی هەرمانەش کەردېنە، زانانشا پەنەو ئیعدامشا کەردەن) . کەمېو باسو وېم کەردو کە خەریجەناو ئینسانېوی بۍ لایەنەناو ئینېشا، ئیتر ئاڎ فرە پرسیارېش نەکەردۍ، منیچ درېژەم نەڎا پەنە، چوونکوم عەرەبیەکێچم ئنە عال نەبۍ. ڕەئیس ماچو أبني مامشکلة، فقد انت لازم تصير بعسی، هاذا قانون التعينات هەلیەوم ئەچی قسا، منیچ واتم سیدی إذا آنی اکون بعسی و أخوية بالئەحمەدئاوا یصير مشکلة عليه، ولکن أنا مواطن مخلص، ما عندی علاقە بهما، ئەچی قساو حەر پی نەصیچە، ئاڎیچ فرە سەرش نەلاو. ماچۊ ما موشکلە أبنی.
دماو حەفتېوی جوابەکە بە (نەخێر) بە مامو کەریمیەرە ئاماوەو، دیسانۆ لوانێ تیلی حەرە وارینە.
ئڼەش پەنە نەشی کاک شۆکەتی پېخامش پەی کیاستا کە بلوە پەی ئێرانی، ڕاو بەری کریێنۆ.
‎فاروق سان ئەحمەد.[1]