تەنیایی
وەختێوە کە ئینسان تەنیا گنوونە، گردچېوە لاشەوە مەعنا
پێدا کەرۊنە. تەنیایی جوزئیاتوو دونیای کەشف کەرۊنە و ماناش پەنە مدۆنە. لتەڕۊزنامێوە کە کۊڵانێوە کۊرەنە فڕەدریابۆ وەری بەردەبۆ و کاڵ و کرچ بییەبۊوە و پرتووکیابۊنە، بۊ بە ڕەفێقێوە تاسەبار و ئەرزشمەند.تەنانەت باروو مرۊچێوە، کۊڵ و باروو قۆلاچێوە، باڵگېرتەو پەپوولێوە!ئاوێزانوو دییەیت کەرۊنە، بە بەحت و سەیرەوە تەماشا ئا گېیان دارا کەرینە.
تەنیایی موبارزەن چەنی مەرگی، دۆر و بەرت چۆڵ بۊنە تاوی بی بە شۆڕشگېڕێوە عال. زێهن و مەژگت پاک و خاوێنەن. ئالوودەگی جەستەیچت نمازۊنە.بە پېچەوانەوە دلۍ جەمعێنە نمەتاوی موبارزە کەرینە. دەس و باڵت بینیۆنە و کەلەبچە بۊنە! جەمع سەرسپوردە و موتیع و نۆکەر مائاب بارت مارۆنە!فرەو مارەفەتەکات چەنە گېرۆنە، ڕووت و قووتت کەرۊوە و جیات مازۆنە. جەمع هیچ کە جەستەیت گېرۆ بەڵا و موسیبەتییەرە، دەروونیچت وېران کەرۊنە.
وېم جە شێعرێوەنە بە نامۆ (من ڕۊخانەنا)؛ باسوو تەنیایی کەروونە، ماچوو:
من ڕۊخانەنا
خرۆشېیانانە دلۍ تاریخی و
نەرم نەرم کۆچ کەروونە دلۍ کەلیما و شێعرە و
هەر چوار وەرزوو ساڵێ
جار هەن؛ تووڕەنا و
خڕوو ملو وەهاریەرە و
پرموو ملو تفەنگ و ساچمەی و
هاوار و گرمەیرە!
جار هەن؛ جە میاچەماو کاغەزیەنە
بوو بە شێعرە و
پەیکەرتاشێوە ئەفسوردە و خەمۆک.
جارهەن؛ بووبە تابلۆیېوە سیاو و چەرمە
ملونە کۊشکەکەوکافکای
تەنیایینە بوو بە ڕۊمانێوە قەرەچەناخ و
تا لاو مەرگی، نمازۊم جیای!
یان: جە شێعرەو(ژۆنینە؛ کە یۊ جە هامنەهەوارەکاو هۆرامانین باسوو تەنیاییش کەروونە وەختێوە کە تەنیان پەڕەن شێعرە و فەلسەفە و موسیقا و شەیدایی، ماچوو:
ژۆنی؛
ژەنېوە تەنیا و
درەختېوە پەڕ پەڕ جە شێعرە و
ئورکێسرێوە پەڕ جە شەیدایی.
بورهان ئەختەر.[1]