بۆ بەڕێزان : کاک نۆشیروان،هێرۆخان،کاک کۆسرەت،مەلا بەختیار
سڵاوێکی گەرم
بەهیوای خۆشی و شادیتانین
هەموومان دەزانین کە بارودۆخی کوردستان ئەمڕۆ بە قۆناغێکی زۆر ناسک و هەستیاردا تێدەپەڕێ. میللەتەکەمان بەگشتی و گەلی کوردستان بەتایبەتی لەهەموو کاتێک زیاتر پێویستی بە یەکێتی و تەبایی و برایەتی نێوان لایەنەکانی هەیە. بەتایبەتیش ئەو لایەنانەی کە لە هەموو ڕووێکەوە لەیەکتری نزیکن. دیارە یەکێتیی و گۆڕان – یش لەگەڵ یەکتری کۆرپەیەکی غەریب نین..
ئەمڕۆ کاتی ئەوە هاتوە لە موجامەلاتی یەکتری دەربچین و جەسارەت بکەین، وە بڕیارێکی مێژووییانە بدەین.ئەویش هەوڵدان بەرە و(پرۆسەی یەکگرتنەوەی یەکێتیی نیشتمانیی کوردستان و گۆڕان و ئاشتکردنەوەی هەموو یەکێتییەکان)،واتە پرۆسەی یەکگرتنەوەی یەکێتی و گۆڕان و ئاشتکردنەوەی هەموو ئەو هەڤاڵانەش کەڕۆژێک لەڕۆژان لەناو ڕیزەکانی یەکێتیی نیشتمانیی کوردستان کاریان کردووە و هێنانەوەیان بۆناو ماڵە گەورەکەی یەکێتیی.ئەم ماڵەی کە سەرکردەی مەزن و ڕابەری گەورەمان جەنابی مام جەلال و هەڤاڵەکانی دروستیانکرد.
هەڤاڵانی بەڕێز
کاتی ئەوەیە موبادەرەیەکی مەزن و گۆڕانێکی گەورەو وکارێکی وا بکەین گۆمەکە بهەژێنن و دڵی میللەتەکەمان و جەنابی مام جەلال، خۆش بکەین. ئەم لێکترازان ولێک دورکەوتنەوەیە لەیەکتری، باکۆتایی پێ بێنین. هەوڵی جدی بدەین، هەنگاوی عەمەلی بهاوێین، بۆ یەکخستنەوەی نێو ماڵی یەکێتی و گۆڕان و کۆتایی هێنان بەم لەیەک ترازانەی کە بەداخەوە لەڕابردو ڕویدا، بەڕاستی کاتی هاتوە. ڕونیشە،مرۆڤی سیاسی گەورە،دەبێ بتوانێ کێشەی سیاسی گەورەش چارەسەربکات.
ئیتر هەمووتان دەخەمە بەردەم مەسئولیەتێکی مێژوویی زۆرگەورە. بەتایبەتی کاک نەوشیروان جەنابتان، دڵنیام کە ئێوە هەمووتان بڕیاردەری بڕیاری ڕۆژە سەختەکان و ناخۆشین.وە خوێندکاری قوتابخانەی ئەوسەرکردە گەورە و مەزنەی کەزیاتر لە65 ساڵی تەمەنی خۆی خستە خزمەتی کوردو کوردستان و هەمولایەک،کە ئەویش مام جەلالی پێشمەرگەو هەڤاڵ و سەرۆک و ڕابەرمانە.
یەکێتی و گۆڕان هەردولامان دوو جۆگەلەی یەک کانی و یەک سەرچاوەی سیاسین.ئیتر بەهیوای هیمەت و هەوڵتانین، مێژووش ڕەحم بەکەس ناکات،دڵنیام تەنیا دەستخۆشی لەو دەستوپەنجەو پێنوسانە دەکات کە یەکەم بەیانی یەکگرتنەوەی یەکێتی وگۆڕان دەنوسنەوە. پشتیوانیش لەئێمەو هەموولایەکمان،لەهەرکوێیەک پێویستی بکات،ئامادەین بۆهاوکاریکردنتان وپشتیوانیکردن لەم پرۆسەیە.
بۆ ئەم مەبەستەش بەندە ئەو پێشنیارەم کردووە و پرۆژەیەکم نوسیوە،لەگەڵ ئەم نامەیە بۆ بەڕێزتانی دەنێرم. هیوادارم وەک دەستپێک،سودی بۆ پرۆسەکەمان هەبێت،(پرۆسەی یەکگرتنەوەی یەکێتیی وگۆڕان وئاشتکردنەوەی گشت یەکێتییەکان).....
هەڤاڵتان بەهرۆز گەڵاڵی ئەنکەرە 14-3-2015
(پرۆژەی یەکگرتنەوەی یەکێتی و گۆڕان و ئاشتکردنەوەی گشت یەکێتییەکان)
قۆناغی یەکەم: بڕیار و جەسارەت
1- دەستکردن بەگفتوگۆی چڕوپڕ لەنێوان هەردوولادا،بۆ هەنگاو نانی عەمەلی، وەچۆنیەتی هەنگاونان بۆ یەکگرتنەوەکەیەکی پتەو،وە لەسەربنچینەی چاکسازی لەهەموو جومگەوبوارەکاندا.
2- ڕاگرتنی هەموو جۆرە پرۆپاگەندە و دژایەتیکردنێکی یەکتری لەهەردوولاوە.وە خۆشکردنی بنەماو زەمینە ئامادەکردن بۆ گفتوگۆیەکی مەسئولەنەو دۆستانەو هەڤاڵانە، لەنێوان هەردوولاداو یەکخستنی گوتاری ئیعلامی.
قۆناغی دووەم: هەنگاونانی جدی وعەمەلی
1- یەکخستنی هەڵوێستی سیاسی لەبەرانبەر ناوخۆ،بەغدا،دەروجیران ودەرەوە.وە لەسەر هەموو ئاست و هەموو جۆرە بابەتێکی: سیاسی،ئابووری،نەوت وگاز،بازرگانی،ئەمنی،ئیداری، دارایی.... هتد.
2- یەکخستنی هەردوو فراکسۆنی پەڕلەمانی یەکێتی و گۆڕان لە پەرلەمانی کوردستان وپەرلەمانی بەغدا.هەروەک یەکخستنی فراکسیۆنی هەردوولادا لە ئەنجومەنی پارێزگاکان.
3- یەکخستنی ئیرادەو و چۆنیەتی بەڕێوەبردنی ئیشوکارەکان لە سۆنی سەوزدا لەنێوان هەردوولادا بەبێ جیاوازی.
قۆناغی سێیەم : بەرەویەکگرتنەوەی یەکێتی و گۆڕان
1- ئیمزاکردنی پلاتفۆرمێک لەنێوان سەرکردایەتی هەردوولادا،بۆ بە ئەنجامگەیاندنی ناوەڕۆکی ئەم پرۆژەیەو ئیدارەدانی هەردوولا تا کۆنگرە.
2- دروستکردنی کۆنسەیەکی هاوبەش بۆ سەرکردایەتیکردنی یەکێتی و گۆڕان تا کۆنگرە.
3- زەمینە خۆشکردن و خۆئامادەکردن بۆ بەستنی کۆنگرەیەکی هاوبەش لەنێوان یەکێتی و گۆڕان و ئاشتکردنەوەی هەموو یەکێتییەکان و ئەو ڕێکخراوە دیموکراتخوازانەی تریش کە دەیانەوێ بێنە ناو ئەو پرۆسە نوێیەی یەکێتی نیشتمانی کوردستان و گۆڕان.
بەهرۆز گەڵاڵی ئەنکەرە 14-3-2015