دواڕۆژ، کۆچەر عەلی
بەپێی ئامارێکی ڕێکخراوی ئاشتی و ئازادی لە ماوەی حەوت مانگی ڕابدووی ئەمساڵ-دا لە هەرێمی کوردستان 169 پێشێلکاری بەرامبەر 272 کەس و دەزگای ڕاگەیاندن و خۆپیشاندەر و چالاکوانی مەدەنی ئەنجامدراون.
ئەمڕۆ چوارشەممە 15ی ئاب، ڕێکخراوی ئاشتی و ئازادی بە هاوکاری ڕێکخراوی فریاگوزاری گەلی نەرویجی (ANP) ئاماری حەوت مانگی یەکەمی ئەمساڵی لەبارەی پێشلکارییەکان بەرامبەر بە ڕۆژنامەنووسان و دەزگاکانی ڕاگەیاندن و خۆپیشاندەران بڵاوکردوە.
لە کۆنگرەیەکی ڕۆژنامەوانیدا هیوا عومەر، بەڕێوبەری ڕێکخراوی ئاشتی و ئازادی ڕایگەیاند، ماوەی حەوت مانگی یەکەمی ئەمساڵ لە هەرێمی کوردستان 169 پێشێلکاری بەرامبەر بە 272 کەس و دەزگای ڕاگەیاندن ئەنجامدراوە.
هەر لە کۆنگرە ڕۆژنامەوانیەکەدا بەڕێوبەری ڕێکخراوی ئاشتی ناوەڕۆکی ڕاپۆرتەکەی خستەڕوو و ڕایگەیاند، لە ئەمساڵدا 14 کەناڵ ڕووبەڕووی داخستن و ڕاگرتنی پەخش بوونەتەوە، 24 ڕۆژنامەوان دەستگیرکراون، 64 حاڵەتی ڕێگری لە ڕووماڵ کراوە، 20 حاڵەتی هەڕەشەی سەر ڕۆژنامەوان و چالاکوانانی مەدەنی و 20 حاڵەتی لێدان و ئەشکەنجەدانی خۆپیشاندەر و 7 حاڵەتی سوکایەتیپێکردن ئەنجامدراوە، لەگەڵ ئەوەشدا 67 خۆپیشاندەر دەستگیرکراون و 10 حاڵەتی ڕێگری لە خۆپیشاندەران و چالاکی سەر شەقام 2 ڕێکخراوی کۆمەڵگای مەدەنی ڕووبەرووی داخستن بوونەتەوە لە دەرەوەی یاسادا. 9 حاڵەتی ڕێگری لە کۆبوونەوەی ڕێکخراوەکانی کۆمەڵگای مەدەنی تۆمارکراوە.
ئەوەشی خستەڕوو، لە ڕۆژی 20 لەسەر 21 کانوونی دووەمی 2018 لە شارۆچکەی #کەلار# هێزەکانی ئاسایش ڕێگریانکردووە لە تیمێکی ڕۆژنامەنوسی و بۆماوەیەکیش تیمەکە دەستگیرکراوە.
رونیشیکردەوە، ڕێکەوتی 22ی کانونی دووەم، لە شاری #دهۆک# پێشێلکاری بەرامبەر بە ژمارەیەک دەزگای ڕاگەیاندن ئەنجامدراوە، ئەوانیش هەریەکە لە کوردسات نیوز و کەناڵی ڕێگا و کەی ئێن ئێن بوون.[1]
#15-08-2018#