سبەینێ جەژنە، جەژنی قوربانە. بەداخەوە ئێمە ئەمسالیش لە دۆخێکی ئاڵۆزدا جەژن دەکەین. لە تەواوی کوردستان هێرشی لەناوبردن بەرامبەر گەلی ئێمە بەردەوامە. خەڵکی کوردستان دەکوژرێن و سروشتی ولاتەکەشمان وێران دەکرێت. هەڕەشەو داگیرکاریی هەتا دێ لەسەر باشوور و ڕۆژاوای کوردستان زێدەتر دەبێت. لە ڕۆژهەڵاتی کوردستانیش گوشاری دەولەت لەسەر خەڵک ڕۆژ بەرۆژ لە زیدبووندایە. کێشەکانیش بەردەوام قووڵتر دەبنەوە. لە باشوور کێشە ئابووری و سیاسی و کۆمەڵاتییەکان درێژەیان هەیە. پرسی ناوچە دابڕاوەکان ئالۆزتر و بێچارەسەر ماون. هێرش و داگیرکاریی دەولەتی تورکیاشیان هاتۆتە سەر. لە باکوریش شەڕی مان و نەمان لەگەڵ دەوڵەتی تورکیا بەردەوامە. لەم دۆخە ئاڵۆزەشدا، پەتای کۆرۆنا سەرتاسەری کوردستانی گرتۆتەوە.
دەولەتی تورکیا نەک هەر لە باکور، لە باشوور و ڕۆژاواش پەلاماری گەلی کوردستان دەدات. ئەو دەولەتە بەشێک لە خاکی ڕۆژاواو باشووری کوردستانیشی داگیر کردووە. لەهەوڵی ئەوەشدایە داگیرکارییەکانی فراوانتر بکات. نزیکەی مانگ و نیوێکە بە هەموو هیزی خۆیەوە هێرشی بۆ سەر باشوور دەستپێکردووە. بەتایبەتیش لە ناوچەی هەفتەنین دەیەوێت شوێنی زێدەتر داگیر بکات. لەبەرامبەر ئەو هێرشانەشدا، گەلی کوردستان و جەنگاوەرانی ئازادیی بە هەموو شێوەیەک بەرگریی دەکەن. بە قارەمانیی و فیداکارییەکی بێوێنەوە ڕووبەڕووی هێرشەکان بوونەوەو پووچەڵیان کردوونەوە. بەرخۆدانی هێزی گەریلا لە هەفتەنین وەک داستانێک دەگێڕدرێتەوە. بەو بۆنەوە ئێمە سڵاو بۆ هەموو بەرخۆدەرانی کوردستان دەنێرین و بە سەرکەوتنەکانیان سەربڵندین. هەمانکات لە کەسێتی شەهیدانی هەفتەنیندا هەموو شەهیدانی ئازادی بەڕێزەوە بەبیردێنینەوە. لە حزوری ڕۆحی ئەواندا، وابەستەیی خۆمان بە ڕێگای تێکوشانی ئەوانەوە دووبارە دەکەینەوە.
بێگومان لە هەرچوار پارچەی کوردستان و لە هەموو شوێنێکی دی، گەلی ئێمە ئەو گەلەی جاران نییە. ئێستا خاوەنی هۆشیارییەکی زێدەتر و لەناو تێکۆشانێکی نەتەوەیی و دیموکراتخوازیی سەردەمییدایە. ئیدی نە لە زۆراداران دەپاڕێتەوە و نە ژێردەستیش قبوڵ دەکات. ئیدی هیوای خۆی تەنیا بەخۆی و ڕێبەریی و تێکۆشەرانی خۆیەوە گرێ داوە.
بەداخەوە لەبەر پەتای کۆرۆنا ناتوانین وەک هەر جارێک جەژنە پێرۆزە بەڕێوە ببەین. هیوادارین گەلی ئێمە بە وریایی و خۆپاراستنەوە جەژنی قوربان پیرۆزبکەن و ڕێنماییە پێویستەکانی خۆپاراستن پەیڕەو بکەن.
ئێمە بەهیواین لە کاتێکی نزیکدا ئیدی گەلی کوردستان بتوانێ بە ئارامی و ئاشتی و ئازادی جەژن و شادییەکانی پیرۆز بکات. بەو بۆنەوە ئێمە پیرۆزبایی جەژنی قوربان سەرەتا لە زیندانیان و جەنگاوەرانی ئازادی و گەلی کوردستان و تەواوی جیهانی ئیسلامیی دەکەین.
#31-07-2020#