ناونیشان: هاورێیەتی لە نێوان قبوڵکردن و ڕەتکردنەوەدا
نووسەر: #کنێر عەبدوڵڵا#
پەیوەندی مرۆڤەکان لەچوارچێوەی هاورێیەتیدا پرۆسەیەکی دوولایەنەیە و تەنانەت تێگەیشتنیش لێی لەلایەن کەسانی تری دەرەوەی ئەو دوو کەسە؛ قورسە و پێویستی بە ئاستێکی ڕۆشنبیری باڵا هەیە، مەبەست لە دوولایەنە واتە ئەو کاتەی دوو کەسەکە بە پرۆسەیەکی تێگەیشتنی درێژخایەنی ئەزمونداریدا دەتوانن ببنە هاورێی ڕاستەقینە؛ ئەو کات خۆشی و ناخۆشییەکانی ژیان لە نێوانیاندا دابەش دەبێ، لەکاتی پێویستدا بێ داواکردنی لایەک، ئەویتر جێبەجێکەر دەبێت یان هەست و درکی پێدەکات، لەکاتی بۆنە تایبەت و خۆشەکاندا بێ ووتن؛ دەبنە بەشێکی دانەبراو و هاوبەش یەکتری، لە خەم وکێشە و کاتە هەستیارەکاندا بێ ئاگادارکردنەوە درک بە ئەرکەکان دەکەن، خۆ لەکاتی ناکۆکی و لێکتێنەگەیشتنەکانیشدا پشوودرێژ دەبن بۆ دۆزینەوەی ڕێگەچارەکان و نەگەیشتن بە خاڵی کۆتایی، دەرفەتێک ناهێڵنەوە بۆ بێرێزی و بێمتمانەیی بەیەکتر، بۆشاییەک ناهێڵنەوە بۆ تاراتێنی ناحەزان و ڕەفتارە نەشیاوەکان. ساتێک ناهێڵنەوە بۆ گومانکردن و قدەی نەشیاوو سرینەوەی یەکتر، دوورکەوتنەوەیان لەیەکتری نابێتە ساتەوەختی بێدەنگی و فەرامۆشکردن و کەمتەرخەمیان لەگەڵ یەکتردا.
بێگومان دروستبونی ئەمجۆرە پەیوەندییە مرۆییە دەگمەن و پێویستە، چەند پاراستنی لەلایەن دوو کەسەکەوە گرنگە؛ هێندە خۆپاراستنیان پێویستە لە کەسانی دەوروبەر، دەوروبەرێک کە هەمیشە بەئیرەییبردنیان دەیانەوێت پەیوەندییەکە تێکبشکێنن، بە تێنەگەیشتنیان هەوڵ ئەدەن کێشە بخوڵقێنن، بە دواکەوتووییان بەردەوام خوڵقێنەری دەرفەتێکن بۆ کۆتاییهێنان بەو پەیوەندییە، بە گرێ دەرونییەکانیان لە هەوڵی ناشرینکردنی جوانییەکان و ساتە خۆشەکانن، و هەروەها بە عەقڵە بچوکەکانیان بەردەوام دەبن لەوەی کەلێن بخەنە پەیوەندییەکەو کۆتایی پێبهێنن بەهەر شێوەو جۆرێکیش بێت بۆنە خۆشەکان ناخۆش و ناخۆشەکانیش ناخۆشتر دەکەن. ئەوە گەیشتنی مرۆڤە بە لوتکەی ناهۆشیاری و کەسایەتی ئاڵۆز و نەخۆش و خاوەن گرێی دەرونیی، کە هیچ کات ساتێک ناهێڵنەوە بۆ خۆشەویستی، دەرفەتێک ناهێڵنەوە بۆ ئاشتی و هەناسەیەک ناهێڵنەوە بۆ مرۆڤایەتی و بەردەوام دەیانەوێت؛ وەک مرۆڤێکی بچووک بمێننەوە، چونکە هێندەی ئیرەیی و ناژیریی و نارۆشنبیری و هزرتەسکی زاڵە بەسەر کەسایەتیاندا، ئەوەندە لە هەوڵی تێگەیشتندا نابن بۆ تێگەیشتن لەو جۆرە پەیوەندییانە و نزیکبونەوە و دروستکردنی، چونکە لە کۆتاییدا گرفتەکە ئەوەیە پێشوەخت بریاریداوە کە پەسەندنەکراوە، و حوکمیداوە لەسەر جۆری پەیوەندییەکە یان خودی کەسەکە و ئامادە نییە بۆ پێچەوانەکەی، هەر چەند کەسەکانی بەرامبەر شایستەی ئەو حوکمە نەبن یان گۆرانکاریان بەسەرخۆیاندا هێنا بێت یاخود هەر لە بنەرەتەوە بریارو حوکمەکەیان هەڵە و پێویست نەبوو بێت. ئیدی خۆ ئەو دوو هاورێیە گەر دوو ڕەگەزی جیاواز بن، ئەوە ئەگەری ڕودان و سەرهەڵدانی ئەو تێروانین و هەوڵانە زووترو زیاتر دەبێت لەلایەن دەوروبەرەوە، کە دواجار جێی ڕەخنە و داخە، بەڵام دواجاریش ئەوە خودی بژاردەی مرۆڤەکانە کامیان هەڵدەبژێرێت و خۆی لە چ جۆرێکیان پۆلێن دەکات.[1]
Այս տարրը գրվել է (کوردیی ناوەڕاست - Central Kurdish) լեզվով, սեղմեք պատկերակը
![](https://www.kurdipedia.org/images/flags/ku.png)
բացել իրը բնագրի լեզվով
ئەم بابەتە بەزمانی (کوردیی ناوەڕاست - Central Kurdish) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Այս տարրը արդեն դիտվել 977 անգամ
Գրեք ձեր մեկնաբանությունը մոտ այս նյութը!