قوماش 147
نووسینی: #ئوسامە جەمیل#

نەخۆشکەتنی هەناری زۆر بێتاقەتی کردین، لەماریمە وەکی برێی تازیەمان هەبوو، زوو زوو تەلەفۆنم لۆ سەفینی دەکردو لە تەندروستی هەناریم دەپرسی، لەگەر ئەوەی سەفین ورەی بەرز بوو، بەران سەتاسەت درنیابوو کە هەنار زۆر ناژی و ڕۆژ لەپاش ڕۆژ زیاتر لە مردنی نێزیک دەبتەوە، لەوناوەی ماری بایی سەفینی و مندارەکانی قادرەفەندی هەستیان دەکرد شتەک هەیەو ئەمە لێیان دەشارینەوە، هێوارەکی داک و بابی هاتنە مارێمەو زۆریان پرسیار لەمەکرد، سەفین لۆ ئەوها بێتاقەتەو وەکی جاران نییە، ئەوان ناهەق نەبوون، چونکە سەفین کوڕەکی زۆر سوحبەتچیبوو، ئاخیر نوکتە لەکنەویبوو، هەموودەمێ زەردەخەنەی لەسەر لێوانیبوو، بەران لەگەر نەخۆشکەتنی هەناری بەتەواوی بێتاقەتببوو، هەرچەندە دەیوویست بەهێزبی و نەڕوخێ، بەران کە بەتەنێ قسەی لەگەر من دەکرد، ئاگری لە هەناوی دەهاتە دەرێ و فرمێسک بە هەردوو چاوانی دەهاتە خوارێ، هەر چەند ئەمن ئەو فرمێسکانەم نەدەدیت، بەران لە ناوەندی درمەوە هەستم بە و فرمێسکانە دەکرد!
هەرکووی هەبوو ئەمن و داکم و بابم تانیمان قەناعەت بە داک و بابی سەفینی بکەین، کەوا ئەمەش وەکی وان هیچ نازانین و سەفین باسی هیچی نەکردیە، هەردووکیان لەڕۆیشتنێ تەماشا منیان کردو گۆتیان: هەر چەند تەماشا ئەو چاوانەی توو دەکەین، هەست دەکەین نهێنیەک لەناو سینگی توو دایەو لەمەی دەشاریەوە، هەندەی نەمابوو فرمێسک بەهەر دوو چاوم دابێتە خوارێ و هەموو شتی ئاشکرابکەم، باشبوو بابم فریام کەت و گۆتیە بابی سەفینی: کاک حاجی تەئکیدبە ئەو کوڕەی من هەر شتەکی بزانی بەمنی دەرێ! قسەکەی بابم زۆر تەواوبوو، چونکە ئەو خەبەرەی ئەمن زانیبووم، ڕێک بەبابمم گۆتبوو، باشبوو بەو قسەی بابم قەناعەتیانکردو ڕۆیشتن.
هێوارەکی درەنگ لە بازاڕی گەڕامەوە، وەکی چوومەوە ژۆرێ، دیتم هاژەی خوشکە گچکەکەی هەناری لەگەر برایەکی لەماریمە دانیشتبوون، سەلامم کردو بەخێراتنم کردن، پاش چاک وچۆنی، گۆتیان: هەورین ئەمەی ناردیە و سەلامی لێدەکردی، گۆتی بڕۆن سوندی بدەن و بزانن چدەزانی دەربارەی هەنارو سەفینی! کەتمە وەزعەکی خراپ و نەمزانی چبرێم، دوایێ گۆتم: باشە لۆ دەپرسن، هیچ بووە؟ گۆتیان: زۆرجار دەمانەوێ قسەی لەگەر هەناری بکەین، سەفین خۆی دەدزتەوەو تەلەفۆنەکەی ناداتە هەناری، دەرێ لەدەرێیە، یان دەرێ نووستیە، یان دەرێ چوویتە ئیشێ، لە دەجاری جارەک قسەی لەگەر هەناری دەکەین، ئەویش لە قسەکردنێ زۆر بێتاقەتەو بەزەحمەت قسەی پێدەکرێ، لۆیێ هەورین بەمەیگۆ: تەئکیدم ئەو شتەکی دەزانی، چونکە سەفین زۆر برادەریتی و هیچ شتەکی لەوی ناشارتەوە! گۆتم: سەلام لە هەورینی بکەن و پێیبرێن چەند ئەو ئاگادارە ئەمنیش هەر ئەوەندە، سەفین هیچ قسەکی لەکنەمن نەکردیە، ئیشاڵلا هیچیش لەگۆڕێ نییەو ئەوان سەلامەتن، دەی ئەگەر نەخۆشیشبن، لەوێ توب زۆر پێشکەتییەو ئیشاڵڵا چارەسەری خۆیان دەکەن، هەرکووی هەبوو تانیم قەناعەت بە هاژەو برایەکەی بکەم کەوا هیچ نازانین، گۆتم زۆر سەلام لە هەورینی بکەن و پێی برێن با تەئکیدبی ئەگەر شتەکی بزانم ئەوا پێی دەرێم، کە ئەوان ڕۆیشتن، بابم گۆتی: کوڕم شتی وانابی و لەتام چووە دەرێ، ئەمە ئەوە سێ مانگە ئەو دوو مارەی دەینین و دەبەین و هیچیان پێنارێین، خوا ئەوەی قبورناکا، دەبی لەگەریان باس بکەین و برێین حاروحساب ئەوهایە، گۆتم: ئەمن لەو یەک دوو ڕۆژەی دەچم تەلەفۆنی لەگەر سەفینی دەکەم و دەرێم هیچ مەجال نەماو دەبی بەماری بابت و خەزورت برێم، گۆتی: زۆر باشە کوڕم، ئەدی خۆناکرێ ئەمە هەر لەو خەمەی دابین!
دوو ڕۆژ تێپەڕی و لەسەر جادەی شێستی چوومە نووسینگەکی و ژمارەی سەفینم دانێ و گۆتم ئەو تەلەفۆنەم لۆ وەرگرن، دوو سێ جار تەلەفۆنیان لۆ سەفینی کرد، هەر هەرینەگرت، زیاتر لە سعاتەکی دانیشتم و بێ فایدەبوو، هەر لەخۆمەوە درم کەتە قرتوفرت، کەوا هەنار شتەکی لێهاتبی، پێشی بڕۆم گۆتمە نووسینگەکەی خێرتان دەگاتێ دە ئەوجارەش تەلەفۆنی لۆبکەنەوە، ئەوانیش گۆتیان بەچاوان، تەلەفۆنیان لۆکردەوەو سێ چار جار جەڕەس لێیدا، وەختەکی سەفین وەرامی داوە، گۆتیانە من بڕۆ کابینەی ژمارە سێ و قسەی لەگەر بکە، چووم و تەلەفۆنەکەم بەگێی وەنا، گۆتم: سەفین! سەفین دەنگی نەبوو، دووسێ جاریدی دووبارەم کردەوە، وەختەکی گێم لەدەنگی گریانی سەفینی بوو، گۆتم: سەفین دەقسانبکە، هەنار کوە؟ سەفین بە قوڕگی پڕ لەگریانەوە گۆتی: هەنار تەواو، هەنار مرد!

وەکی سەفین ئەو قسەیکرد، ماتبووم، بەینەکی تەواو بێدەنگبووم، سەفینیش هەر دەگریا، ئیدی لەگەوی دەستم بەگریانێکرد، زۆر گریام و نەئەو قسەی پێکراو نەئەمن، ئاخیری بەناچاری تەلەفۆنەکەم قەپاتکرد، چوومەوە لای کارمەندەکەی نووسینگەی، دیتی وەزعم تەواونییە، گۆتی: دەرێی شتەک بووە؟ گۆتم: بەرێ، خێزانی ئازیزترین کەسم مردیە، گۆتی: زۆر بەداخەوەو خوا لێی خۆشبی، ئیدی پارەکەم دایێ و لەنووسینگەکەی هاتمە دەرێ، تاقەتم نەبوو بەپێیان بڕۆم، یەکسەر تەکسییەکم گرتوو گەڕامەوە لای مارێ، چوومەوە ژۆرێ، دیتم داکم و بابم وا لەحەوشێ دانیشتینە، داکم هەر ئەمنی دیت، زانی شتەک بووە، هەستاوەو گۆتی: هەنار مایە؟ گۆتم: ناوەڵلا مردیە، داکم دەستی بەگریانێ کرد، بابم بەهێمنی گۆتی: اناللە واناالیە ڕاجعون، هەموومان دەگەڕێینەوە لای خوای گەورە، یاڕەبی کیژم خوا هەقتبکا، گۆتم: ئێستا ئەمە چبکەین و کو خەبەر بدەینە ماری سەفینی و مندارەکانی قادرەفەندی ڕەحمەتی؟ بابم گۆتی: کوڕم ئەوەی لۆمن لێگەڕێ و ئەمن لەگەر دختۆر شێرۆی دەچم و وەزعەکەیان تێدەگەینم، بڕۆ بزانە دختۆر شێرۆ لەمارێیە، چوومە ماری دختۆر شێرۆی، دیاربوو لەمارێ نەبوو، گۆتمە مندارەکان ئەگەر بابتان هاتەوە، یەکسەر بابێتە کن بابم، ئیشەکی زەروری پێیە، گۆتیان بەچاوان، ئیدی چوومەوە مارێ و بەوپەڕی خەمباری لێی دانیشتم، خەمی گەورەی من هەورین بوو، دەمزانی ئەو خەبەرەی بزانی شتەکی دەکا، دوعام دەکرد بەس خۆی نەکوژی، ئەویدی کێشە نییە، خەیارم لۆ ئەوەش دەچوو یان سەرۆک جاشەکەی یان کوڕی بکوژی، تەمەننای ئەوەشم دەکرد سەفین بێتەوەو پێکەوە دەست و برد بکەین و لێنەگەڕێین کفنی هەناری زەردبی و تۆرەی بکەینەوە.
لەگەر بابم و داکم دانیشتبووین و خەممان لۆ وەزعی هەنار و سەفینی دەخوارد، داکم گۆتی: وەی لۆت کۆرەبم سەفین، دەبی لەوراتی غەریبی وەزعت کووبی، هەونکە بەتاقی تەنێ دەبی چبکاو کوو خۆی کووشتبی لۆ هەنارۆکەی، باشە کوڕم نەیگۆ مەیتەکەی دەینمەوە یان نا؟ گۆتم: ناوەڵلا دایە، بەران بەو وەزعەی قەت ناتانی مەیتەکەی بینتەوە، سەتاسەت لەوێی دەشاردەوە، تازە باوەڕناکەم سەفین بێی هەناری لەوێ ئیدارەبکا، تەئکید ئەوێ بەجێدێلی و دێتەوە، داکم گۆتی: کا لۆ ئەوێ ڕۆژی بێتەوەو ئەو جاشانە بتۆپێنی و تۆرەی هەنارۆکەی بکاتەوە! وەختەکی دختۆر شێرۆ لەدەرکەیداو هاتە ژۆرێ، سەلامیکردو وەکی چاوی بەمەکەت بێتاقەتین، یەکسەر گۆتی: هەنار چیلێهاتیە؟ بابم گۆتی: دیارە ئاگات لەوەزعەکەیە؟ گۆتی: ئەدی ئەمن یەکەمجار لەگە کاکەی پێکەوە نەچووینە نووسینگەی، لەوێ هەمووشتم زانی، بەران لەکن کەس باسم نەکردیە، بابم گۆتی: وەڵلا دختۆر شێرۆ چت لێبشارمەوە هەنار وەفاتیکردیە، دەوجە بابچین خەبەر بدەینە مارێ سەفینی و مندارەکانی قادرەفەندی، گۆتم: بابە ئەمنیش بێم؟ گۆتی: نا کوڕم نا، ئەتوو بەرگەی ئەو کارەساتەی ناگری، ئەمن و دختۆر شێرۆ دەچین و بەهێوری مەسەلەکەیان تێدەگەینین، ئیدی بابم چووە ژۆرێ جلکی بگۆڕی، هەندەی پێنەچوو هاتەدەرێ و لەگەر دختۆر شێرۆی ڕۆیشتن، ئەمن و داکیشم بەتەنێ لەمارێ ماینەوە.
دەوری دوو سعاتەکی پێچوو، بابم و دختۆر شێرۆ هاتنەوە، سەلامیان کردو گۆتم: چتانکرد؟ بابم گۆتی: وەڵلا کوڕم چمانکرد، مەسەلەکەمان تێگەیاندن و بووە شین و ڕۆڕۆ لەهەردوو ماری، وەڵڵا کافر زگی پێدەسووتان، ئەمان چدەکەی، دەبی بەبڕیاری خوای ڕازیبین و تەسلیمی ئەمری باری تەعالا ببین، گۆتم: تازیەی دادەنێن؟ گۆتی: بەرێ بەتەمانە لە مزگەفتەکەی لای ماری سەفینی دابنێن، گۆتم: سبەینێ پێکەوە دەچین، گۆتی: پێمباشە ئەتوو نێی، لەوانەیە ئەو سەرۆک جاشە یان کوڕەکەی تاقیبت بکەن و زەڕبەکت لێبدەن، ئەتوو لەمارێبە، هەر دووسێ ڕۆژیش مایە مەکتەب دەستپێبکاتەوە، دەبی خۆت خڕکەیەوەو بچیەوە گوندی!

دە ڕۆژەک مەشغولی تازیەی بووین، ئەوەی زۆر زۆر بێتاقەتبوو هەورین بوو، ئەو ناهەق نەبوو، ئاخر ئەوان بە خاوو خێزانەوە کۆربوونەوە، کێیان ما، هەموویان تەفروتوونا بوون، داک و بابی سەفینیش زۆر تێکچوون و قەت لەو باوەڕەی دانەبوون کوڕەکەیان تووشی ئەو بەرایەی ببی و خوای گەورە بەمردنی هەناری تاقیبکاتەوە، داکم لۆی باس دەکردم هەورین چی بەسەرهاتیەو چەند جار لەناو تازیەی لەخۆچووە، لەبنی درم ئازارم پێدەگەیی و تازیەکە نەلەماری بابی سەفینی بوو، نەلەماری قادرەفەندی، بەرکو لەناو جەرگ و هەناوی منبوو، بەران چدەکەیی و دەستەرات چیە! بڕیارمدا یەک تۆز وەزعەکە هێور بیتەوە تۆرەی هەموو ئەوانە بکەمەوە کە بوونە قوربانی ئەو سەرۆک جاشەو کوڕەکەی، کە ژیانی من و هەورین و سەفین و هەناریان تارکرد!
وەزعەکە بڕەک هێور بۆوەو داکم و بابم هاتنەوە مارێ، وەختی ئەوەی هاتبوو بچمەوە مەکتەبێ و دەست بەدەوامێ بکەمەوە، داک و بابیشم حەزیان لێبوو بچمەوە دەوامێ، بەشکو بڕەک خەمی درم لەبیر دەکەم و مەشغولی مەکتەب و دەرس گۆتنەوەی دەبم، کەلوپەل و جانتام پێچاوەو شێرۆ ئەمنی گەیاندە گەراجی، هەندەی نەبرد تڕومبێلەک هات و سواربووم و بەڕێکەتین، لە سەیتەرەکان تووشی هەمان دەردەسەریبووم، بەتایبەتی لەگەر کابرای گۆرین کە داوای گیزی کردبوو، دیسان هەر ئەمنی دیت گۆتی: کا گیز؟ گۆتم: تازیەمان هەبووەو ئەوەی لەبیرم نەبووە گیزبووە، گۆتی: بەخۆت خۆشبی و بینە بیست دیناری، بەناچاری بیست دینارم دایێ و ئیزنی دام، بەرەبەری ڕۆژئاوابوونێ گەیشتمە گوندی، ئەوەی باشبوو حەسەنەفەندی مدیر ژۆرەکی لۆمن و مامەستایەکیدی بەناوی مەڕبێنەفەندی تەرتیب کردبوو، مەڕبێن دیانی هەرمۆتەی لای کۆیێ بوو، بە مامەستای کوردی دامەزرابوو، وەکی چووم ئەو لەوێبوو، ئێکدیمان ناسی و خۆشحاربووم کە ڕەفیقەکم لەگەرە لەو ژۆرەیی و بەتاقی تەنێ نیمە، مەڕبێن تەمەنی لەدەوری بیست و سێ ساری دەبوو، پیاوەکی بەڕێزو لەسەرخۆبوو، لەبەر ناوەکەی نەبا نەمدەزانی دیانە، چونکە وەکیمە قسەی دەکردو کوردییەکی زۆر ڕاست و ڕەوانی دەزانی، ئەو هێوارەی مەڕبێن تەماتەو ڕوونی لێنابوو، ئەلهەقی حەسەنەفەندی نەیهێشت تەماتەو ڕوونی بخۆین، گۆتی: دەبی هەر بێنە مارێمەو داکی منداران ماسی لێنایە، خۆم تەنها کردو لەگەر مەڕبێن و حەسەنەفەندی شۆڕبووینەوە لۆ مارێ حەسەنەفەندی، حەسەنەفەندی عەلەنتریکی پێکردبوو، ئەو بەپێشکەتبوو، ئەمەش لەدووی دەڕۆیشتین، وەختەکی ڕۆناکی عەلەنتریکەکیدی بەرامبەرمان هات، نێزیکبوونەوە دیتم عەبۆکەو شلێرخانی خێزانی بوون، سەلامیان کردو گۆتیان: ئەوە کێوە دەچن؟ گۆتم: وەڵڵا دەچینە ماری حەسەنەفەندی، گۆتیان: قەت قبور ناکەین و دەبی هەر بێنە ماریمە، ئەمە واهاتینە هەر دوو مامەستای ببەینەوە ماری خۆمان، حەسەنەفەندی گۆتی: بابە شتی وا نابی، ئەوانە ئەوڕۆ مێوانی منن، عەبۆکە ئەنگۆ دەعوەتەکەی لۆ ڕۆژەکیدی هەگرن! عەبۆکەو شلێر قەناعەتیان نەدەکرد، ئەمن دەستم لەملی عەبۆکەی کردو گۆتم: ئەوڕۆ ئیزنمان بدە، کاکە وەعدبی ڕۆژەکیدی بێینە مارینگۆ، ئیدی باشبوو قەناعەتیان کردو ئەوان شۆڕبوونەوە لۆلای ماری خۆیان و ئەمەش چووینە ماری حەسەنەفەندی.
نانمان خواردو هەتا درەنگی شەوێمان بەقسەی خۆش بەڕێکرد، ئەوان نوکتەی خۆشیان دەگێڕاوەو ئەمن بە عەستەم زەردەخەنەم دەکرد، هەستیانکرد ئەمن تەواو نیمە، لۆیێ حەسەنەفەندی گۆتی: ئوستاز دەرێی کێشەکت هەیە، خەمبار دیاری خەمبار، گۆتم: چت لێبشارمەوە، خێزانی برادەرەکی زۆر ئازیزم مردیەو لەبە هەندێ زۆر بێتاقەتم، ئەوانیش بێتاقەتبوون و زۆریان دوعاکرد، خوای گەورە لێی خۆشبی و سێبوری کەسوکاریشی بدا.
سعات بووە دەوری یازدەی شەوێ و چونکە ماندی سەفەرەکەی بووم و لەڕێیێش وەکی جاری پێشی زۆر ئەزیەت درابووم، گۆتمە مەڕبێنی: مامەستا وەچاکە بکەینە شەو، گۆتی: با بەکەیفی تووبی، حەسەنەفەندی زۆری تەکلیفکرد شەوێ لەوێبین، گۆتمان: وەڵڵا مادام جێگاو ڕێگا هەیە دەگەڕێینەوە ژۆرەکەی خۆمان، گۆتی: عەلەنتریکتان پێیە؟ گۆتم: ئەمن هینایتم، بەران لەناو جانتایە، مەڕبێن گۆتی ئەمنیش قلەکم لەگەر خۆم هینایە، حەسەنەفەندی گۆتی: مادام وەیە هەتا مەکتەبێ لەگەرتان دێم هەتا فانۆسی پێدەکەن و جێتان تەرتیب دەکەن، ئەوجە دەگەڕێمەوە مارێ، گۆتمان: زۆرباشە، هەستاین و زۆر مەمنونی خێزانی حەسەنەفەندی بووین لۆ ئەو ماسییە خۆشەی کە لێی نابوو، خواحافیزیمان کردو گەڕاینەوە مەکتەبێ، فانۆسمان پێکردو جێ و ڕێمان تەرتیب کردو حەسەنەفەندی خواحافیزی کردو گەڕاوە ماری خۆی، ئەمن و مەڕبێنیش خۆمان گۆڕی و مەڕبێن پاریداوەو ئەمنیش نوێژی عیشاێم کردو لێم پارداوە، چونکە هیلاکبووم هەر زوو خەوم لێکەت.
لەگەر دەنگی بانگە مەلای بەخەبەر هاتم، دەستنوێژم شووشت و ویستم بچمە مزگەفتێ نوێژەکەی بکەم، دوایێ گۆتم: با جارێ شارەزای ڕییەکان ببم و سەی گوندی بمناسن، ئەوجە دەچمە مزگەفتێ، نوێژم کردو لێم پارداوە، دەوری سعات حەفتی بەیانی بوو حەسەنەفەندی بەخۆو بە سنیە خواردنەکی بەژۆرێکەت، گۆتی: یاڵلا مامەستاینە هەستن نانەکەی بخۆن و خۆتان حازرکەن، هەونکە تەلەبە بەمەکتەبێ وەردەبن، گۆتمان: وەڵڵا ئەو ئەزیەتەی نەدەویست حەسەنەفەندی، گۆتی: بابە ئەزیەتی چییەو هەر ئەوڕۆیە، ئیدی لەوەپاش دەبی بەخۆتان هیممەت بکەن! دەست و چاومان شووشت و نانمان خوارد و جلکمان لەبەر کرد، هوردە هوردە تەلەبەش هاتنە مەکتەبێ، مەکتەب پێنج پۆل بوو، هەر پۆلی دەوری دە هەتا دوازدە تەلەبەی هەبوو، ئەمەش هەر ئەو دوو مامەستایەو حەسەنەفەندی بەڕێوەبەر بووین!
بڕیارمدا مانگەکی ڕەبەق بمێنیمەوەو تۆزەک مێشکم بێتەوە سەرەخۆ ئەوجە بگەڕێمەوە هەولێرێ، دەوری بیست و پێنج ڕؤژەک تێپەڕیبوو، دەوری عەسرێبوو، لەگەر مەڕبێنی ویستمان پیاسەکی بکەین، هاتینە دەرێ و دیتم لە دووریڕا چار پێنج کەس دەهاتن، دیاربوو لەدەرێی گوندیڕا دەهاتن، هەر چەند تەماشام دەکرد ئێکەکیان زۆر بە دختۆر شێرۆی دەچوو، گۆتم دەبی چاوم ڕەشکەو پێشکەی بکا، ئەو نێزیک دەبۆوەو زیاتر دەچۆوە سەر دختۆر شێرۆی، مەڕبێنەفەندی گۆتی: کاکە بابڕۆین درەنگە! گۆتم: ڕاوەستە، وابزانم ئەوانەی لەوسەریڕا دێن ئێکیان جیرانی منەو لۆکنەمن هاتیە!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!