بەشێکی زۆری ئەو پڕۆژانە لە لایەن وەبەرهێنەرانی ناوخۆییەوە ئەنجامدراون
K24 – هەولێر:
حکومەتی هەرێمی کوردستان لە ماوەی سێ ساڵی ڕابردوو لە سەرجەم سێکتەرەکان، بە تایبەت سێکتەرە خزمەتگوزارییە گشتییەکان، پڕۆژەی تایبەت بە وەبەرهێنانی ئەنجامداوە، بەشێکی زۆری ئەو پڕۆژانە لە لایەن وەبەرهێنەرانی ناوخۆییەوە ئەنجامدراون.
فەرمانگەی میدیا و زانیاری حکومەتی هەرێمی کوردستان، ڕاگەیەندراوێکی بڵاوکردەوە، تێیدا هاتووە، کابینەی نۆیەمی حکومەتی هەرێمی کوردستان له دەستبەکاربوونییەوە لە ماوەی 28ی تەممووزی 2019 تاوەکو 27ی حوزەیرانی ساڵی 2022، لە سەرجەم سێکتەرەکان بە تایبەت سێکتەرە خزمەتگوزارییە گشتییەکان، پڕۆژەی تایبەت بە وەبەرهێنانی ئەنجامداوە و، لەو ماوەیەشدا مۆڵەتی بە 201 پرۆژەی وەبەرهێنان بە سەرمایەی 11 ملیارو 562 ملیۆن و 93 هەزار دۆلار، لەسەر ڕووبەری 10 هەزار و 603 دۆنم زەوی لە ناوچە جیاجیاکانی هەرێمی کوردستان داوە، بەشێکی زۆری ئەو پڕۆژانە لە لایەن وەبەرهێنەرانی ناوخۆییەوە ئەنجامدراون.
ئه و داتایانەی حکومەتی هەرێمی کوردستان بڵاویکردووەتەوە، بەم شێوەن:
ساڵی 2019
ساڵی 2019 سەرەتای دەستپێکی کابینەی نۆیەم بوو، 16 پڕۆژە مۆڵەتیان وەرگرتووە، سەرجەمیان لە لایەن وەبەرهێنەرانی ناوخۆییەوە بوون و سەرمایەکەیان 485 ملیۆن و 204 هەزار و 256 دۆلار بووە.
ساڵی 2020
ساڵی 2020 تێیدا پەتای کۆرۆنا سەرجەم جیهانی گرتەوه، و هەرێمی کوردستانیش لە کاریگەرییە نەرێنییەکانی بێبەش نەبوو، 76 پڕۆژە له و ساڵەدا مۆڵەتیان وەرگرتووە، لە کۆی ئه و ژمارەیە تەنیا 2 پڕۆژە بە هاوبەشی لە نێوان وەبەرهێنەرانی خۆماڵی و بیانی ئەنجامدراوە، 74 پڕۆژەکەی دیکە لەلایەن وەبەرهێنەرانی ناوخۆییەوە ئەنجامدراون، کۆی گشتی پڕۆژەکانیش بە سەرمایەی یەک ملیار و 984 ملیۆن و 591 هەزار و 500 دۆلار بووە، و لەم بڕەدا وەبەرهێنەرانی خۆماڵی یەک ملیار و 967 ملیۆن و 25 هەزار و 500 دۆلار وەبەرهێنانیان کردووە، و پرۆژە هاوبەشەکانیش بە بڕی 17 ملیۆن و 566 هەزار دۆلار ئەنجامدراون.
ساڵی 2021
ساڵی 2021 پڕۆژەکان بەردەوام بوون، تێیدا 70 پڕۆژەی جۆراوجۆر مۆڵەتیان وەرگرتووە، لە کۆی ئه و ژمارەیە تەنیا یەک پڕۆژە لە ڕێگەی وەبەرهێنەری بیانی بووە و، یەک پڕۆژەش بە هاوبەشی بووە، 68 پڕۆژەکەی دیکە لە لایەن وەبەرهێنەری خۆماڵییەوە جێبەجێکراون، کە سەرمایەی هەر 70 پڕۆژەکه 8 ملیار و 515 ملیۆن و 645 هەزار و 864 دۆلار بووە.
ساڵی 2022
لە 6مانگی یەکەمی ساڵی 2022 حکومەتی هەرێمی کوردستان بەردەوام بووە لە پێدانی مۆڵەت بە پڕۆژەکانی وەبەرهێنان، بە شێوەیەک کە 35 پڕۆژەی جۆراو جۆر لە بوارە جیاوازەکان مۆڵەتیان وەرگرتووە بە سەرمایەی 330 ملیۆن 696 هەزار و265 دۆلار، سەرجەمیان لە لایەن کۆمپانیا خۆماڵییەکانەوە جێبەجێکراون.
کۆی گشتی پرۆژەکان
حکومەتی هەرێمی کوردستان لە کابینەی نۆیەمدا مۆڵەتی بە 201 پڕۆژەی هەمەجۆری لە سێکتەرە جیاوازەکان داوە، کە سەرمایەکەیان 11 ملیار و 562 ملیۆن و 93 هەزار دۆلار بووە، و لەسەر ڕووبەری 10 هەزار و 603 دۆنم زەوی ئەنجامدراون.
پرۆژەکانیش بەپێی پارێزگا و ئیدارە سەربەخۆکان دابەشبوون و، بەشی زۆری ئەو پڕۆژانەش لە پارێزگای هەولێر جێبەجێکراون.
پارێزگای هەولێر
پارێزگای هەولێر، لەو ڕێژەیە 87 پڕۆژە بە سەرمایەی 8 ملیار و 906 ملیۆن و 806 هەزار و 129 دۆلاری بەرکەوتووە و، پڕۆژەکانیش لەسەر ڕووبەری 4 هەزار و 861 دۆنم ئەنجامدراون.
پارێزگای سلێمانی
پارێزگای سلێمانی بە پلەی دووەم دێت، کە 53 پڕۆژە بە سەرمایەی یەک ملیار و 559 ملیۆن و 982 هەزار و 213 دۆلار لە سەر ڕووبەری هەزار و 928 دۆنمی تێدا ئەنجامدراون.
پارێزگای دهۆک
لەپارێزگای دهۆک 45 پڕۆژە بە سەرمایەی 589 ملیۆن و 554 هەزار و 88 دۆلار لە سەر ڕووبەری 2 هەزار و 750 دۆنم زەوی ئەنجامدراون.
پارێزگای هەڵەبجە
لە پارێزگای هەڵەبجەش یەک پرۆژە بە سەرمایەی 6 ملیۆن و 846 هەزار دۆلار لەسەر ڕووبەری 7 دۆنم زەوی ئەنجامدراوە.
ئیدارەی سەربەخۆی گەرمیان
لە ئیدارەی سەربەخۆی گەرمیان 10 پڕۆژە بە سەرمایەی 333 ملیۆن و 475 هەزار و 89 دۆلار و لە سەر ڕووبەری 935 دۆنم زەوی ئەنجامدراون.
ئیدارەی سەربەخۆی ڕاپەڕین
لە ئیدارەی سەربەخۆی ڕاپەڕین 5 پڕۆژە بە گوژمەی 125 ملیۆن و 429 هەزار و 481 دۆلار لە سەر ڕووبەری 119 دۆنم زەوی پڕۆژەی جیاواز ئەنجامدراون.
سێکتەرە جیاوازەکان
گرنگترین ئه و سێکتەرانەی کە پڕۆژەی تێدا ئەنجامدراوە، بریتییە لە سێکتەری بازرگانی کە 49 پڕۆژە بووە، بە سەرمایەی 638 ملیۆن و 265 هەزار و 11 دۆلار، لە سەر ڕووبەری 709 دۆنم زەوی.
پڕۆژەی بانکەکانیش 2 پڕۆژه بوون، بە سەرمایەی 19 ملیۆن و 415 هەزار دۆلار لە سەر ڕووبەری 1.2 دۆنم زەوی.
پڕۆژە تەندروستییەکانیش 12 پڕۆژە بوون، بە سەرمایەی 92 ملیۆن و 345 هەزار و 500 دۆلار، لە سەر ڕووبەری 15 دۆنم زەوی.
پڕۆژەی پیشەسازی 58 پڕۆژە بوون، بە سەرمایەی 1 ملیار و 771 ملیۆن و 220 هەزار و 943 دۆلار، لە سەر ڕووبەری 2 هەزار و 190 دۆنم زەوی.
پڕۆژەی خزمەتگوزاری یەک پڕۆژە بووە، بە سەرمایەی 9 ملیۆن و491 هەزار لە سەر ڕووبەری 21 دۆنم زەوی.
پڕۆژەی گەشتیاری 29 پڕۆژە بوون، بە سەرمایەی 7 ملیار و122 ملیۆن و606 هەزار و 299 دۆلار، لە سەر ڕووبەری 2 هەزار و 856 دۆنم زەوی.
پڕۆژەی فێرکردن 21 پڕۆژە بوون، بە سەرمایەی 229 ملیۆن و 946 هەزار و 290 دۆلار، لە سەر ڕووبەری542 دۆنم زەوی.
پڕۆژەی کشتوکاڵی 8 پڕۆژە بوون، بە سەرمایەی 320 ملیۆن و669 هەزار و 500 دۆلار، لە سەر ڕووبەری 2 هەزار و 879 دۆنم زەوی.
پڕۆژەکانی کەرتی نیشتەجێبوون 13 پڕۆژە بوون، بە سەرمایەی یەک ملیار 288 ملیۆن و 168 هەزار دۆلارو لە سەر ڕووبەری هەزار و 351 دۆنم زەوی.
لە سێکتەری هونەریش یەک پڕۆژە ئەنجامدراوە، بە سەرمایەی 9 ملیۆن و 234 هەزار دۆلار، لە سەر ڕووبەری 10 دۆنم زەوی.
لە سێکتەری وەرزشیش 7 پڕۆژە ئەنجامدراوە، بە سەرمایەی 60 ملیۆن و 731 هەزار و 457 دۆلار لە سەر ڕووبەری 25 دۆنم زەوی.
پرۆژە خۆماڵییەکان
لە کۆی ئه و 201 پڕۆژەیەی کە لە ماوەی سێ ساڵی کابینەی نۆیەم مۆڵەتیان پێدراوە، 197 پڕۆژەیان لەلایەن کۆمپانیا و وەبەرهێنەری ناوخۆییەوە جێبەجێکراون ، تەنیا یەک پڕۆژە لە لایەن وەبەرهێنەری بیانی بووە و سێ پڕۆژەش بە هاوبەشی ئەنجامدراون.
کۆی سەرمایەی پرۆژەکان
کۆی گشتی سەرمایەی ئه و پڕۆژانەی لە لایەن کۆمپانیا و وەبەرهێنەری ناوخۆیی جێبەجێکراون بریتی بووە لە 6 ملیار و 618 ملیۆن و 559 هەزار دۆلار.
هەروەها سەرمایەی سێ پڕۆژە هاوبەشەکە بریتی بووە له 37 ملیۆن و 384هەزار دۆلار .
ئه و تاکە پڕۆژەیەش کە لە لایەن کۆمپانیایەکی بیانییەوە ئەنجامدراوە، سەرمایەکەی 4 ملیار و 906 ملیۆن و 110 هەزار دۆلار بووە.[1]
1