دڵ بیەن سەرشار، دڵ بیەن سەرشار
دڵ بیەن جە جام مەعسییەت سەرشار
کەس نییەن چون من عاسیی خەتابار
عیبرەت لێم گرتەن تائیفەی کوففار
«يا دائم الفضل!» ڕەحمەت بێشومار
«احفضي بالفضل، من عذاب النار»
من بەندەی موزنیب ساحێب تەقسیرم
بەردەن هەوا و نەفس، نامت جە ویرم
هەرچەند شایستەی حەبس تەعزیرم
بافت سزای سەخت نار سەعیرم
«يا عظيم العفو!»، تەوبە و ئیستیغفار
«احفظني بالفضل من عذاب نار»
مەئیووسم کەردەن هەوای نەفس شووم
غەیر جە زات حەق کەس نییەن ئەرجووم
فرێ ڕووزەردم جە فیعل مەزمووم
نەدارۆن تاقەت نائیرەی زەقووم
«يا کثير اللطف!، قديم الاخبار
احفظني بالفضل من عذاب النار»
مەلەرزوون جە خەوف چون شاخ عەرعەر
جە هەیهات هەیهات سەخت پڕخەتەر
جە تەنافبازیی سیرات مەحشەر
جە نرکەی نیران نائیرەی سەقەر
«يا غافرالذنب، ذالجود، جبار!
احفظني بالفضل من عذاب النار»
سەفابەخش بەزم سۆفیان ساف
نیگارندەی چەتر بەرز بێتەناف
«عميم الاحسان، خفي الالطاف
ساترالعيوب جة قاف تا بة قاف!
باجەتی ڕەسوول سەیید موختار
«احفظني بالفضل من عذاب النار»
خانا ها جە خەوف زەمزەمەی حیساب
جە شەکوەی دیوان «شديدالعقاب»
چون مەل نە ئایر، جەرگشەن کەباب
هەردەم مەواچۆ بێ پەردە و حیجاب
«يا جل الاحسان»، سڕپۆش سەتتار!
«احفظني بالفضل من عذاب النار»
#خانای قوبادی# [1]