داستانۊ حەیدەری و سنۊبەرۍ
بەشۍ حەفتا و یەرەمە (دما بەشە)
شا عەباسی دوەم، دمای گفتوگۊیش چنی سنۊبەرۍ، بە خاترۊ ئازایی و دلېریی حەیدەر بەگی و ئاوەزداریی سنۊبەرۍ، قەرارێ پېیایانە و ئازایانەش دا، بە سنۊبەرۍ واتش: تۊ، ببە بە کناچۍ من و ژەنۊ حەیدەری. ئیتر حەیدەر و سنۊبەرە وەشیېنە خاکو وەردەمو شا عەباسیشان ماچ کەرد. شا عەباس بە وەردەسەکا وېش فەرمانش دا، کە ئاهەنگېوی گۆرە، بە گۊرانییۍ و موسیقا ڕاوەبەرا، تەمامو تەدارەکی حازر کەران، تەمامو پەنەوازییەکا حەیدەری و سنۊبەرۍ ئاماڎەکەران، چل شەوۍ و چل ڕۊوۍ، شارو ئەسفەهانی چراخان کریا:
شا وات ئافەرین ئەی شەمسی خاوەر
کناچۍ وېم بی، بەخشایم بە حەیدەر
حەیدەر، کەفت نە خاک، چەنی سنۊبەر
بۊسان پایەی تەخت، شای فەرەیدوون فەڕ
شا وات بەگەنجوور: خەڵات کەر حازر
پەرێ هەردووشان، بکەرە حازر
دەردەم فەرمان دا، شای واڵا مەکان
جاڕچی جار کېشا، موڵکی ئەسفەهان
چل ڕوز ئەساسەی شاڎیی، بەرپاکەن
چەشنی دەماودەم، غوڵامی شاکەن
خەراجی سێ ساڵ، تەمامی ئێران
بە ڕەعیەت بەخشا، پەرێ چراغان
چل ڕۆژ، چراخان، کریا، ئەسفەهان
جە یۊمنی ئېقباڵ، ئەو ماهی تابان
سەڎای سنجی ساز، ناڵەی کەڕەنا
مەنیشت وە گەردوون، وە چەرخی مینا
سەڎای، تەقداق، چەنگ و چەقانە
ڕەقسی ڕەقاسان، شەیدای زەمانە
ناڵەی موترېبان، بەربەت چەنی ڕوود
سەوتی خوشخوانان، چوون نەغمەی داود
غەمزەی موترېبان، شەیدای شۊخی شەنگ
ڕەفتی مەڕەقسان، بە ئاهەنگی چەنگ
عېشوەی ساقېیان، جەمین قورسی نوور
مەگېڵان، چەنی پېیاڵەی بلوور
کاکۊڵ چەنی زوڵف، چین وەردەی چین چین
ئەفشان کەردەبۍ، نە پای عەرەقچین
سەروەران، سروود جە بادەی شاڎی
ڕەعیەت، جە خۊفی، خەراج ئازادی
یە گشت پەی ئەساس، شاڎیی سنۊبەر
پەی عەیش و نیشان، شېری دلاوەر
وەلحاسڵ یاران، بە ساعەتی خوەش
بەستشان نیکاح، ماهی پەری وەش
چوون تاوسی مەس کەردەن تەیاریی
کېشاشان، بەسەر، بەرقەی گوڵناریی
وە ساعەتی خۆش، کەردشان سوار
چراخان کریا، مەیدان و بازاڕ
تا شیلان کېشا، مەردوم شیی بە ڕا
حەیدەر هۊرېزا، جە پابۊسی شا
حەیدەر بەگ لوا، نە تۊی پەردەی ناز
واتش: ئەلسەلام، ئەی یاری دەمساز
دەم نېیا، نە چا، تینی زەردەوە
بۊسا، پەیا پەی، شوکرش کەردەوە
نە دڵ، بە دڵشاڎ، نامی خوڎا بەرد
لوا، پاسەبان، بەندش، ڕەها کەرد
دەس نېیا وە بان، سینەی عەنبەرین
بە سەڎ نەزاکەت، وستەش بە زەمین
دېیا، کە موهرەن، ئەو گەنجی پەنهان
کلید بەر ئاوەرد نېیاش وە جیبان
سەڎ هەزار سەڵوات، بەڵکم زېیاتەر
بدەران، بە دیڎەی پاکی پېغامبەر.
[1]