فەڵەک بار دەرد، فەڵەک بار دەرد
تاکەی بکێشم سزای باردەرد
وەهار دا نه تەپڵ، زمستان ویەرد
تاکەی جەور دەرد ڕەنگم کەرۆ زەرد
مەرپێت نەیاوان دوود ئاﮪ من
هەناسان سەرد سەحەرگاﮪ من
شین شەوناڵین نامۊرادی من
گرەی کۊرێ دڵ دوورجە شادی من
کزەی زۊخ خەم نادیاری من
قرچەی ئوستۊخان، دەرد کاری من
مەر من جەئومەت مۊستەفا سەوام
چۊن سکەی خارج قەڵبی ناڕەوام
من پەیکۊڵ نەڕای ڕەسووڵ نەشەندم
نەدانم پەی ئادەم، گەواهی گەندم
کارێ نامشروع ناما جەدەستم
پەی قەتڵ قاتڵ کەمەر نەبەستم
کوففارێ کافر نەکێشام نەشار
زەکەریام نەکۊشت بەمەودای مشار
نەکەردم کۊفران مائیدەی عیسا
خەتاکار نەبیم وێنەی «برڵیڵا»
بار نەفت و نار نەمروود نەپاشام
مەنجەنیق پەی مەرگ خەلیل نەتاشام
ناقەی ساڵحم وەسەرقەت نەبەرد
میناکاری تەخت فێرعەونم نەکەرد
تیرم ڕشتەی هوون ناما نە دامان
فۆراتم نەبەست نەڕوی ئێمامان
چەنی قەو مۍ لووت مەی نۊشیم نەکەرد
پەی قەتڵێ حۆسەین سەرگوشیم نەکەرد
ڕای کەعبەم نەگێرت نەڕووی حاجیان
تێغ نەدام نەفەرق فرقەی حاجیان
راگەی عەتەبات نەکەردەنم بەند
باجم نەعازم ڕای نەجەف نەسەند
فەڵەک من پەیڕەو دینۍ نەبی بیم
چەند ساڵ نەپەی دین من مەکتەبی بیم
بێ ڕاز وبێ عەیب، بێ کۊفر و کین بیم
حەقیر مەزڵووم ڕووی سەرزەمین بیم
حەق وېش گەواهەن نمەک شناس بیم
حەکاکۍ پرکار خەواسێ خاس بیم
ئەر سزاوارم عێتابم تاکو کەی؟
ئەر موسوڵمانم، عەز ابم تاکو کەی؟
با ڕەحمەت بەیۊ وەجەستەو حاڵم
ناڵەم جێت ویەرد تاکو کەی بناڵم
بە حاجەتی نوور شای «خيرالبشر»
ببەخشەم بە نوورشەفێع مەحشەر
هەرچەند من عاسی مەعسیەت بارم
بەلۊتف یەکتا ئومێدوارم
خالق، تۊ قادر بەندەی عەبدێ تۊم
نەدەرگانەی تۊ هەرئێدەن ئەرجۊم
نە جۊر مۍ «ئەحمەد» بوویەرە قادر
هەرچەند گۆناهان لێش بیەن سادر
#ئەحمەد بەگی کۊماسی# [1]