داستانۊ گوڵ و بولبولی
بەشۍ سېڼزەهەمە
سەباحی ساڵحان ئەڎاو بەچە بولبولی هېلیانەکېشنە بە نیازو پېڎاکەردەی ئاو و دانۍ، پەروازش کەرد، بەچە بولبول جیامەند، بە فرسەتش زانا کە چۊڵەن، چەمەڕاو نەسیمیش مەکەرد، وەختێ نەسیم ئاما، بەچە بولبول بە پەلە پېوایشۆ لوا و دامانش گېرت و واتش:
هەم وە ستەمکېش بوڵبوڵی غەمبار
بەرشیی، حاشیان، وېنەی هەردەجار
ڕوو کەرد وە کۊدا، پەی ئاب و دانە
تەنیا، مەند بەچەش جە ئاشیانە
دیڎە پەڕ تەسکین، دڵ پەڕ خەیاڵ بۍ
چەمەڕای ئامای بادی شەماڵ بۍ
بەڵکو دووبارە بەیۊ، بەو مەسکەن
باوەرۊ بۊی دۊس، ئەو شەهر و گوڵشەن
جە ناکا نەسیم، شەماڵی سوبخېز
ئاما، وە بۊی عەتر، عەنبەری دەستبېز
غوبارێ ئاوەر، تووتیا، دەستوور
پەی کەحلی دیڎەی ئاشقی مەهجوور
بەچە بولبول دیش، ئەو گەردو غوبار
زاناش، شەماڵەن، ئاوەردەن، بۊی یار
کەفت نە دەماخش، نەسیمێ بۊی گول
هەنیی، پېش نەمەند سەبر و تەحەممول
تا نەسیمی گوڵ، وە بولبول یاوا
غونچەی منقارش دەردەم شکاوا
بە نەغمەدانی نەجا، کەرد ئاخېز
شیی وە ئیستیقبال، بادی عەتر ئامېز
بە ساڎ و ڕوور بە سوز و ئاهەنگ
دامانی شەماڵ مەحکەم گرت بە چەنگ
واتش: ئەی شەماڵ مەحرەمی گوڵشەن
وەش ئامای وە خەیر، دیڎەم بیی ڕەوشەن
عەترت ڕۊشن کەرد، ئاینەی زەینم
غوبارت، جەلا، بەخشا بە عەینم
فیدات بام شەماڵ، نەسیمی ڕابەر
جە ڕاگەی ئەڵتاف، دەستگیریم کەر
هەنیی نەمەندەن، سەبر و قەرارم
مونتەزیر، بە دییەن، شەهری گوڵزارم
کارێ پېم کەردەن، ئېشی دەردی دڵ
چوون نېشی عەقرەب، نە دڵ مەڎۊ چڵ
چوون ئەوەڵ، شەماڵ، لوتفی خەیرت کەرد
نە شەهری گوڵزار، بۊی گوڵت ئاوەرد
بۊی عەتری دولبەر، دای نە مەشامم
دېوانەم کەردیی، لېم سەندی فامم
ئیسەیچ کەرەمکەر، چوون جوانمەردان
خەلاسیم بدەر، جە باری دەوران
جە گېجاوی بەحر، غوسسە و پەژاران
خەلاسیم بکەر، چوون کەرەم داران
عەرەبم دەخیل، بادە، بۊ عەنبەر
تەبیبان دەستوور، دەوای دەردم بەر.[1]