باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و سی و چوارەمە
محەمەد تەشریفش بەرد پەی یانەو وەرەقە و بن نوفلی، چاگە بارو زرووف و وېش بەیان کەرد.
حەزرەت، تەشریفش، لای وەرەقە بەرد
واقیعاتی وېش، یەکیەک، بەیان کەرد
وەرەقە، سێ نۊبەت، پەیا پەی جە نۊ
وات: ئەی محەمەد، موژدە بۊ، وە تۊ
بە ڕاستی من، جە ڕای سەروەریت
گەواهی مدەون، بە پېغەمەریت
بە قدوومی تۊ، عیسا، بنی مریەم
بەشارەتش دان، بەبۍ زیاڎ و کەم
واتشان شەخسێ، بەتحا، مەقامش
جە ئاسمانان، ئەحمەدەن، نامش
چوون کە جە ئینجیل، وەسفش عەیانەن
ئانە پېغەمبەر، ئاخر زەمانەن
یەقین جوبرەئیل، جە سەدرەی مەنزڵ
تەشریفش وە لای تۊ بېیەن نازڵ
وەرەقە ئاخېز کەرد، مدرا، وە پاوە
فەرقی موبارەک، حەزرەت، بۊساوە
واتش: نزیکەن، وە چاری ناچار
ماموور بی پەی جەنگ، مەعرەکەی کوففار
ئەی کاشکی جەو دەم من جە حەیات بام
دایېم، جە حوزوور، خاک و پات، مەبام
قەومی قوڕەیش، تۊ، بەرکەران جەی زەید
سیوای زاتی حەقق، نەداری ئومېد
حەزرەت فەرماوا: یانێ ڕوئیەتەن
قەومان، بەرکەران، من جە ئەی وەتەن
وەرەقە، وات: بەڵ، مەر بە تەناوەت
کەس نېیەن چەنیت، نەبۊش، عەداوەت
ڕەزاشان، نېیەن، کەس، بە تەرغیبت
مەکېشان زوان، گرد پەی تەکزیبت.[1]