باخچێوە بېگەرد
ئەوەنویستەی و دەسکاریکەردەی: ئەسعەد ڕەشید
بەشۍ سەڎ و پەنجاهەمە
حەزرەت تەشریفش بەرد پەی دلۍ کافر و موشریکا، پەی موچیاری کەردەیشان، پەی یاونای پېخامەکەیش پەنەشان.
حەزرەت وات ئەی قەوم تاکەی قیل و قال
قەسەم وە مەعبوود زاتی بۍ زەوال
نەفسی محەمەد جە یەک سیفەتش
دایېم ها جە یەد قەبزەی قودرەتش
جە قەومی ناهاڵ ڕەنجم ئاوەردەن
هەرگیز وە خیلاف ئەمرم نەکەردەن
ساکە ئېد شنەفت قەومی کینە کېش
ساکین بین جە دەرد، سەر وستەن وە پېش
کەمالی قوڕەیش فیرقەی زیبا و زشت
ئەهلی نحووسات بەڎتەرین گشت
دمای تەوازوع گفتوگۊ کەردەن
ئادابی دنیا وە جا ئاوەردەن
وات: یا محەمەد تۊ نەجاهیلی
بەڵ خەیلێ بوزورگ دانا وکامیلی
خولاسە حەزرەت کەردش ڕەوانە
تاکە تەشریف بەرد وە دەوڵەتخانە
دیسان قوڕەشی گوڕای کینەباز
بەزمی عەداوەت جە نۊ کەردەن ساز
یەکسەر ئیجتیماع بەردەن ئەو حەجەر
بکەران قەتڵی پاکی پېغەمبەر
دیسان محەمەد چېش کەردەن پېمان
ئېمە نەداریم خەبەر جە وېمان
جە ناگاه حەزرەت باز هەم تەشریف بەرد
عەزمی زیارەت کەعبەتوڵڵا کەرد
موشریک جە غەرەز یەکسەر ماتەم بین
چوون خونەخوارە نە دەورش جەم بین
واتشان دەرحەق ئېمە چېش کەردی
ئابرووی قوڕەیش یەکسەر گرد بەردی
نەکەردی ئەندېش جە وجوودتان
چن جار دشمنان دای وە مەعبوودمان
حەزرەت وات: بەڵ کەردەنم پېتان
جە ڕووی قیامەت دوزەخەن جېتان.[1]