ناونیشانی بابەت: خوێندنەوە ڕووناکیی ژیانە
ناوی نووسەر: #ڕۆستەم خامۆش#
بۆ ئەوەی ژیانی هەموان ڕووناک و پڕ لە ئاشتی و ئاسوودەیی بێ، ئەوا خوێندنەوە پەنجەرەی ڕوانینە بۆ ڕووناکیی و بەختەوەر بوون لە ژیان، بەڵام بۆ بە کەلتوور کردنی خوێندنەوە، سەرەتا پێویستە لە منداڵەوە دەست پێبکەین، بۆیە گرنگیی خوێندنەوە، لەم چەند خاڵەی خوارەوە دەخەمە ڕوو.
1- ئەگەر منداڵ هەر لە تەمەنی بچووکییەوە ئاشناو هۆگری پەڕتووک و گۆڤار بکرێ، ئەوا بێگومان ئاستی خوێندەواریی و ژیریی و زیرەکیی بەرز دەبێتەوە، کە گەورەش بوو کەسێکی باش و بەڕێز و سوودبەخش دەبێ لەنێو کۆمەڵگە.
2- هەر دایک و باوکێک خۆی بە خەمخۆر و دڵسۆزی منداڵەکانی دەزانێ، پێویستە پەڕتووک و گۆڤاری تایبەت بەخۆیانیان بۆ دەستەبەر بکەن.
3- هەر کەسێک دەیەوێ کۆمەڵگەیەکی هۆشیار و ڕۆشنبیر و ئاشتیخواز بێتە ئاراوە، ئەوا دەبێ پەروەردەی منداڵ یەکەم هەنگاو بێ و لە پێش هەموو کارەکانی دیکەوە بێ، هەر لەم بارەوە چەندین پێناسە سەبارەت بە پەروەردەوە هەیە، لەنێو هەموو پێناسەکان، کە لەبارەی پەروەردەوە گوتراون، جوانترینیان بریتییە لە: (ئامادەکردنی تاک بۆ ژیان) ، کەواتە با هەموو تاکەکان ئامادە بکرێن بۆ ژیان، بەڵکوو هەموان بە تەبایی و ڕاستگۆیی و خۆشەویستیی و پاکیی بژین.
4- منداڵان، حەزیان بە گوێگرتنە لە شیعر و چیرۆک، یان خۆیان ئارەزووی خوێندنەوەیان دەکەن، بۆیە پێویستە پەڕتووکی شیعر و چیرۆکیان بۆ دابین بکرێ، بەڵکوو لەو چێژە ئەدەبییە گرنگە بێبەش نەبن.
5- بۆ ئەوەی منداڵەکانمان کەلتووری خۆیان خۆشبوێ و هەستی نیشتمانیی و نەتەوەیی و مرۆڤدۆستی لەنێو دڵ و مێشکیان بڕوێنین، دەبێ لە هەموو ڕێگەکانی پەروەردەوە، هەنگاوی بۆ بنرێ. [1]