داراو خەمانا
میرزا ئۆلقاڎر، هایەو مایەش خەمەن، ئاڎ داراو خەمان، خەزېنەش پەڕ جە خەمەن، دڵش هەر پېسە دووکانچەو عەتارا پەڕەن، بەڵام نە گوڵاو، بەڵکم پەڕ خەمەن، میرزایچ هەر پېسە بېسارانی گۆرەی، دماجار ماچۊ: خەم چەنی خەمان زوو مەبۊ ساکن.
دارای خەمانم دارای خەمانم
سەرقەیتولەی خەم دارای خەمانم
خەم بېیەن وە مار پەی ڕیشەی گیانم
نېش خەم نیشتەن نە ئوستخوانم
مەتای خەم داروون کاڵای سەد وېنە
سەرمایەم خەمەن خەمم خەزېنە
بارخانەی خەمم باربەندی کەردەن
دەفتەرش جە حەد حیساب ویەردەن
دڵ چوون دووکانچەی تازەی عەتاران
ڕەنگینەن جە خەم فیراق یاران
خالق وجوودم جە خەم سروشتەن
تاس تالعم هەر وە خەم ڕشتەن
چوون مۊرەی بەختم وە خەم پەروەردەن
دووشەش لازمەن دوویەک ئاوردەن
خەم یانەی ئەفشار شەش‌دەر لیم بەستەن
قوشەی خەم قشوون شادیم شکەستەن
ڕای گوزەر نیەن جە عەدووی موشکڵ
خەتمەن جە لەشکەر خەمان یانەی دڵ
ئه و هەرکۊ مەدیۊ نەزەرگام خەمەن
تا (مُدّالبصَر) تەماشام خەمەن
تۊعمەی لەزایز خوراکم خەمەن
فاخرەی ئەلوان پۊشاکم خەمەن
شەوان تا وە ڕۊ هامڕازم خەمەن
ڕەفیقی گیانی دەمسازم خەمەن
ڕەخت ڕەنگاوڕەنگ شه و خەمەن
نمدادەی گوڵاو کەلاوم خەمەن
ساقی سیم ئەندام سادەی من خەمەن
نۊشانۊش جام بادەی من خەمەن
سەفای سەر هەردان شکارم خەمەن
تەفریح گوڵ‌گەشت وەهارم خەمەن
تەهیەی تەداروک تفاقم خەمەن
مەزەی تەبیعەت مەزاقم خەمەن
بەزم شادی و زەوق سروورم خەمەن
کزەی سەڎای ساز سەمتوورم خەمەن
چوون جە ڕۊی ئەزەڵ من زادەی خەمم
تا مەحشەر چەنی خەمان هاودەمم
ئوستادم خەمەن جە مەدرەسەی خەم
دەرس خەم وانان جە لام بیەن جەم
دەرس من خەمەن هەر خەم موانوون
غەیر جە خەم فېشتەر هیچ نمەزانوون
خەم زەدەی خەمبار ڕۊزگارانم
خەم‌کېش دڵڕېش هیجری یارانم
سا هەرکەس خەمۍ نەدەروون دارۊ
دووربای وېنەی من وە خەم مەویارۊ
خەم بڎۊ وە باد بەیۊ وەلای من
خەم چەنی خەمان زوومەبۊ ساکن
(قاڎر) چوون وە خەم د نیاش ویاران
دینش تەسکینەن پەری خەمباران.[1]